2 Cronicas

13 Iti maikasangapulo ket walo a tawen ni Ari Jeroboam ti panangrugi ni Abias nga agturay iti Juda.+ 2 Tallo a tawen a nagturay idiay Jerusalem, ket ti nagan ti inana Mikaias+ nga anak ni Uriel ti Gabaa.+ Ket napasamak ti mismo a gubat iti nagbaetan da Abias ken Jeroboam.+

3 Gapuna nakigubat ni Abias buyogen ti puersa militar nga uppat a gasut a ribu a nabileg a lallaki ti gubat,+ napili a lallaki. Ket ni met laeng Jeroboam nangurnos iti pannakibakal kenkuana buyogen ti walo gasut a ribu a napili a lallaki, mamaingel, nabileg a lallaki.+ 4 Timmakder ita ni Abias iti rabaw ti Bantay Zemaraim, nga adda iti nakabambantay a rehion ti Efraim,+ ket kinunana: “Denggendak, O Jeroboam ken intero nga Israel. 5 Saan kadi a rebbeng nga ammoyo a ni met laeng Jehova a Dios ti Israel nangted ken David iti maysa a pagarian+ iti Israel agingga iti tiempo a di nakedngan,+ kenkuana ken iti annakna,+ babaen ti maysa a tulag ti asin?+ 6 Ket ni Jeroboam+ nga anak ni Nebat, ti adipen+ ni Solomon nga anak ni David, timmakder ket nagrebelde+ ken apona.+ 7 Ket dagiti bayanggudaw a lallaki,+ awan kaes-eskanna a tattao,+ nagtultuloyda a naguummong a sangsangkamaysa iti sibayna. Kamaudiananna nagbalinda a nabilbileg ngem ni Rehoboam nga anak ni Solomon, idi a ni met laeng Rehoboam+ agtutubo pay laeng ken managkullayaw ti pusona,+ ket saanna a nataginayon ti takderna maibusor kadakuada.

8 “Ket ita pampanunotenyo a taginayonen ti takderyo maibusor iti pagarian ni Jehova iti ima ti annak ni David,+ idinto ta maysakayo a dakkel a bunggoy+ ket adda kadakayo dagiti nabalitokan a kigaw a baka nga inaramid ni Jeroboam maipaay kadakayo kas didios.+ 9 Saan aya a pinagtalawyo ti papadi ni Jehova,+ ti annak ni Aaron, ken dagiti Levita, ket saan aya a mangar-aramidkayo iti papadi maipaay kadakayo kas kadagiti ili ti dagdaga?+ No maipapan iti asinoman nga immay ken nangpunno iti imana iti pannakabalin babaen ti maysa nga urbon a toro ken pito a kalakian a karnero, isu nagbalin a padi iti saan a didios.+ 10 No maipapan kadakami, ni Jehova ti Diosmi,+ ket saanmi a binaybay-an; no di ket ti papadi agserserbida ken Jehova, ti annak ni Aaron, ken kasta met dagiti Levita nga adda iti trabaho.+ 11 Ket pagas-asukenda dagiti mapuoran a daton ken Jehova iti binigat ken iti rinabii+ ken kasta met ti napabanglo nga insienso;+ ket dagiti palunapin ti tinapay addada iti rabaw ti lamisaan a puro a balitok,+ ket adda ti nabalitokan a pagsaadan ti silaw+ ken dagiti pagsilawanna a gangtan iti rinabii;+ agsipud ta salsalimetmetanmi ti pagrebbengan+ ken Jehova a Diosmi, ngem isu binaybay-anyo.+ 12 Ket, adtoy! iti sanguanan adda a kaduami ti pudno a Dios+ agraman ti papadina+ ken dagiti pagilasinan a trumpeta+ a pangpaguni iti alarma ti bakal maibusor kadakayo. O annak ti Israel, dikay makirupak ken Jehova a Dios dagidi ammayo,+ ta saankayto nga agballigi.”+

13 Ket ni Jeroboam, iti biangna, nangibaon iti maysa a pangsaneb nga umay iti likudanda, iti kasta naaddada iti sango ti Juda ket ti pangsaneb iti likudanda.+ 14 Idi a timmaliaw dagiti kameng ti Juda, ay ket, sadiay adda ti bakal iti sanguanan ken iti likudanda.+ Ket nangrugida nga umkis ken Jehova,+ bayat a ti papadi sipipigsa a pagunienda dagiti trumpeta. 15 Ket giddato nga inriaw dagiti lallaki ti Juda ti ikkis ti gubat.+ Ket naaramid nga, idi inriaw dagiti lallaki ti Juda ti ikkis ti gubat, iti kasta ti met laeng pudno a Dios inabakna+ ni Jeroboam ken ti intero nga Israel iti sanguanan ni Abias+ ken ti Juda. 16 Ket nagtalaw ti annak ti Israel manipud sanguanan ti Juda, ket kalpasanna inyawat ida ti Dios iti imada.+ 17 Ket kinabil ida ni Abias ken dagiti tattaona buyogen ti nakadakdakkel a pananggudas; ket ti napapatay iti Israel nagtultuloy a napasag, lima gasut a ribu a napili a lallaki. 18 Iti kasta napagpakumbaba ti annak ti Israel iti dayta a tiempo, ngem nagbalin a nabilbileg ti annak ti Juda agsipud ta nagkammatalekda+ ken Jehova a Dios dagidi ammada. 19 Ket ni Abias kinamkamatna ni Jeroboam ket nakakautibo kadagiti siudad manipud kenkuana, ti Bethel+ ken dagiti agpampannuray nga ilina, ken ti Jesana ken dagiti agpampannuray nga ilina, ken ti Efrain ken dagiti agpampannuray nga ilina.+ 20 Ket ni Jeroboam saanen a naaddaan iti aniaman a pannakabalin+ idi kaaldawan ni Abias; no di ket isu kinabil ni Jehova,+ iti kasta natay.

21 Ket intuloy ni Abias a papigsaen ti bagina.+ Idi agangay nangala iti sangapulo ket uppat nga assawa maipaay iti bagina,+ ket nagbalin nga ama ti duapulo ket dua nga annak a lallaki+ ken sangapulo ket innem nga annak a babbai. 22 Ket ti dadduma kadagiti pasamak ni Abias, ti mismo a daldalanna ken sasaona, naisuratda iti salaysay ni mammadto nga Iddo.+