Ti Maikadua a Cronicas

13 Iti maika-18 a tawen ti panagturay ni Ari Jeroboam, nagbalin ni Abias nga ari iti Juda.+ 2 Nagturay iti tallo a tawen idiay Jerusalem. Ti nanangna ket ni Mikaias+ nga anak ni Uriel a taga-Gibea.+ Adda idi panagginnubat da Abias ken Jeroboam.+

3 Iti kasta, napan nakigubat ni Abias a kaduana ti armadana a buklen ti 400,000 a nabileg ken nasanay* a mannakigubat.+ Nagpuesto a makigubat kenkuana ni Jeroboam nga addaan iti 800,000 a nasanay* a lallaki, nabibileg a mannakigubat. 4 Timmakder ni Abias iti rabaw ti Bantay Zemaraim, iti kabambantayan ti Efraim, ket kinunana: “Denggendak, O Jeroboam ken ti intero nga Israel. 5 Diyo kadi ammo nga inted ni Jehova a Dios ti Israel ken ni David ti maysa a pagarian a mangituray iti Israel iti agnanayon,+ agpaay kenkuana ken kadagiti annakna,+ babaen ti tulag ti asin?*+ 6 Ngem ni Jeroboam+ nga anak ni Nebat, ti adipen ni Solomon nga anak ni David, ket nagrebelde iti apona.+ 7 Nakikadua kenkuana ti adu a lallaki nga awan obrana ken awan serserbina. Nagballigida a bimmusor ken Rehoboam nga anak ni Solomon, idi ubing pay ni Rehoboam ken nakapuy ti pakinakemna ken saanna a kabaelan a labanan ida.

8 “Ket ita, pagarupenyo a kabaelanyo a labanan ti pagarian ni Jehova nga iturturayan dagiti annak ni David gapu ta nakaad-adukayo ken adda kadakayo dagiti balitok nga urbon a baka nga inaramid ni Jeroboam kas diosyo.+ 9 Saan kadi a pinagtalawyo dagiti papadi ni Jehova+ a kaputotan ni Aaron ken dagiti Levita sa nangdutokkayo iti bukodyo a papadi a kas kadagiti tattao iti sabali a pagilian?+ Asinoman nga umay nga addaan* iti maysa nga urbon a kalakian a baka ken pito nga urbon a karnero ket mabalinnan ti agserbi a padi dagiti idolo a saan a dios. 10 Ngem ni Jehova ti Diosmi,+ ket saanmi a binaybay-an. Dagiti padimi a kaputotan ni Aaron ti agserserbi iti sanguanan ni Jehova, ket tultulongan ida dagiti Levita. 11 Binigat ken rinabii+ a mangipaayda ken Jehova iti daton a mapuoran kasta met iti nabanglo nga insienso,+ ket adda napagtutuon a tinapay*+ iti lamisaan a puro a balitok, ken rinabii a sindianda ti balitok a kandelero+ ken dagiti lamparana,+ ta itungtungpalmi ti responsabilidadmi ken Jehova a Diosmi; ngem isu ket binaybay-anyo. 12 Adda kadakami ti pudno a Dios, a mangiturturong kadakami, agraman dagiti papadina ken dagiti trumpeta a mangipakaammo iti pannakigubatmi kadakayo. O lallaki ti Israel, dikay makigubat ken Jehova a Dios dagidi ammayo, ta saankayto nga agballigi.”+

13 Ngem nangibaon ni Jeroboam iti agtambang iti likudan, isu nga addada iti sango ti Juda ken adda dagiti agtambang iti likudan ti Juda. 14 Idi timmaliaw dagiti lallaki ti Juda, nakitada a masapul a makigubatda iti sanguanan ken iti likudanda. Iti kasta, nagpatulongda ken Jehova,+ bayat a sipipigsa nga agtrumtrumpeta dagiti papadi. 15 Agpukpukkaw a dimmarup dagiti lallaki ti Juda, ket ti pudno a Dios pinarmekna ni Jeroboam ken ti intero nga Israel iti sanguanan ni Abias ken ti Juda. 16 Nagtataray dagiti Israelita iti sanguanan ti Juda, ket inyawat ida ti Dios iti imada. 17 Adu nga Israelita ti pinapatay ni Abias ken dagiti tattaona, ket agdagup iti 500,000 a nasanay* a lallaki ti napapatay iti Israel. 18 Iti kasta, naibabain dagiti lallaki ti Israel iti dayta a tiempo, ta nabilbileg dagiti lallaki ti Juda gapu ta nagtalekda* ken Jehova a Dios dagidi ammada.+ 19 Kinamkamat ni Abias ni Jeroboam ket sinakupna dagiti siudad ni Jeroboam, ti Bethel+ ken dagiti ili iti aglawlawna, ti Jesana ken dagiti ili iti aglawlawna, ken ti Efrain+ ken dagiti ili iti aglawlawna. 20 Saanen a napasubli ni Jeroboam ti bilegna idi tiempo ni Abias. Dinusa ni Jehova ket natay.+

21 Ngem bimmileg ni Abias. Nangala iti 14 nga assawa,+ ket naaddaan iti annak a 22 a lallaki ken 16 a babbai. 22 Ti dadduma pay a pasamak iti pakasaritaan ni Abias, dagiti inaramid ken imbagana, ket nairekord kadagiti surat* ni propeta Iddo.+