Jeremias

32 Ti sao a dimteng ken Jeremias manipud ken Jehova iti maikasangapulo a tawen ni Zedekias nga ari ti Juda,+ awan sabali, ti maikasangapulo ket walo a tawen ni Nabucodorosor.+ 2 Ket iti dayta a tiempo, dagiti puersa militar ti ari ti Babilonia laklakubenda idi ti Jerusalem;+ ket no maipapan ken Jeremias a mammadto, mapawpawilan idiay Paraangan ti Guardia+ nga adda iti balay ti ari ti Juda; 3 agsipud ta isu pinawilan ni Zedekias nga ari ti Juda,+ a kunkunana:

“Apay nga agipadpadtoka,+ a kunkunaem, ‘Daytoy ti kinuna ni Jehova: “Adtoy itedko daytoy a siudad iti ima ti ari ti Babilonia, ket sigurado a kautibuennanto dayta;+ 4 ket ni met laeng Zedekias, ti ari ti Juda, saanto a makatalaw iti ima dagiti Caldeo, ta isu di bumurong a mayawatto iti ima ti ari ti Babilonia, ket ti ngiwatna pudno a makisaonto iti ngiwat dayta, ket dagiti bukodna a mata makitananto uray dagiti mata dayta”’;+ 5 ‘ket ipannanto ni Zedekias idiay Babilonia, ket sadiay agtalinaedto agingga nga iturongko ti asikasok kenkuana,’+ kuna ni Jehova; ‘nupay makigubgubatkayo kadagiti Caldeo, saankayto nga agballigi’?”+

6 Ket kinuna ni Jeremias: “Ti sao ni Jehova dimteng kaniak, a kunkunana, 7 ‘Adtoy umay kenka ni Hanamel nga anak ni Sallum nga ulitegmo iti ama, a kunaenna: “Gatangem maipaay kenka ti talonko nga adda idiay Anatot,+ agsipud ta kukuam ti kalintegan a mangsaka tapno gatangem dayta.”’”+

8 Idi agangay immay kaniak ni Hanamel nga anak ti ulitegko iti ama, maitunos iti sao ni Jehova, iti Paraangan ti Guardia,+ ket kinunana kaniak: “Gatangem, pangngaasim, ti talonko nga adda idiay Anatot,+ nga adda iti daga ti Benjamin,+ ta kukuam ti kalintegan iti pagtatawidan a sanikua, ket ti pannakabalin a mangsaka kukuam. Gatangem dayta maipaay kenka.” Iti kasta naammuak a dayta idi ti sao ni Jehova.+

9 Gapuna ginatangko ken Hanamel+ nga anak ti ulitegko iti ama ti talon nga adda idiay Anatot.+ Ket rinugiak a timbangen kenkuana ti kuarta,+ pito a siklo ken sangapulo a kapisi a pirak. 10 Idin insuratko iti maysa a kasuratan+ ket inkapetko ti selio+ ket nangalaak kadagiti saksi+ bayat a tinimbangko+ ti kuarta iti timbangan. 11 Kalpasan dayta innalak ti kasuratan ti pananggatang, daydiay naselioan maitunos iti bilin ken kadagiti alagaden,+ ken daydiay nabaybay-an a silulukat; 12 ket kalpasanna intedko ti kasuratan ti pananggatang ken Baruc+ nga anak ni Nerias+ nga anak ni Masias iti imatang ni Hanamel nga anak ti ulitegko iti ama ken iti imatang dagiti saksi, dagidiay agsursurat iti kasuratan ti pananggatang,+ iti imatang dagiti amin a Judio a situtugaw iti Paraangan ti Guardia.+

13 Binilinko ita ni Baruc iti imatangda, a kinunak: 14 “Daytoy ti kinuna ni Jehova ti buybuyot, ti Dios ti Israel, ‘Iti panangalam kadagitoy a kasuratan, daytoy a kasuratan ti pananggatang, ti mismo a naselioan, ken ti sabali pay a kasuratan a nabaybay-an a silulukat,+ masapul nga ikabilmo met ida iti maysa a basehas a damili, tapno makapagpautda iti adu nga aldaw.’ 15 Ta daytoy ti kinuna ni Jehova ti buybuyot, ti Dios ti Israel, ‘Balbalay ken taltalon ken kaub-ubasan ti magatangto pay iti daytoy a daga.’”+

16 Ket nangrugiak nga agkararag+ ken Jehova kalpasan ti panangitedko ken Baruc+ nga anak ni Nerias+ ti kasuratan ti pananggatang, a kinunak: 17 “Ay, O Soberano nga Apo Jehova!+ Adtoy sika inaramidmo ti langlangit ken ti daga babaen ti dakkel a pannakabalinmo+ ken babaen ti siuunnat a takiagmo.+ Ti intero a banag saan a nakaskasdaaw unay kenka,+ 18 Daydiay mangwatwatwat iti naayat a kinamanangngaasi maipaay iti rinibu,+ ken mangsupsupapak iti biddut dagiti amma iti saklot ti annakda iti kalpasanda,+ ti pudno a Dios, Daydiay naindaklan,+ Daydiay mannakabalin,+ a ti naganna+ Jehova ti buybuyot,+ 19 naindaklan iti pammatigmaan+ ken naruay iti ar-aramid,+ sika a dagiti matana silulukat iti amin a daldalan ti annak ti tattao,+ tapno itden iti tunggal maysa ti maitunos iti daldalanna ken maitunos iti bunga dagiti pannakilangenna;+ 20 sika a nangikabil kadagiti pagilasinan ken kadagiti milagro iti daga ti Egipto agingga itoy nga aldaw ken iti Israel ken iti tengnga dagiti tattao,+ tapno mangaramidka koma iti maysa a nagan maipaay iti bagim, kas itoy nga aldaw.+ 21 Ket inruarmo ti ilim nga Israel manipud iti daga ti Egipto,+ babaen kadagiti pagilasinan ken babaen kadagiti milagro+ ken babaen iti maysa a napigsa nga ima ken babaen iti maysa a siuunnat a takiag ken babaen iti dakkel a pagbutbutngan.+

22 “Idi agangay intedmo kadakuada daytoy a daga nga insapatam kadagidi ammada nga itedmo kadakuada,+ maysa a daga a pagay-ayusan ti gatas ken diro.+ 23 Ket simrekda ken tinagikuada dayta,+ ngem saanda a nagtulnog iti timekmo, ket iti lintegmo saanda a nagna.+ Ti amin a bambanag nga imbilinmo kadakuada nga aramidenda saanda nga inaramid,+ iti kasta impagtengmo kadakuada ti isuamin daytoy a didigra.+ 24 Adtoy! Buyogen dagiti baluarte a panglakub+ immay dagiti tattao iti siudad tapno kautibuenda dayta,+ ket ti mismo a siudad pudno unay a maitedto iti ima dagiti Caldeo a makiruprupak maibusor iti dayta,+ gapu iti kampilan+ ken iti nakaro a bisin+ ken iti angol;+ ket napasamak no ania ti kinunam, ket adtoy makitkitam dayta.+ 25 Kaskasdi a sika kinunam kaniak, O Soberano nga Apo Jehova, ‘Gatangem maipaay kenka ti talon babaen ti kuarta+ ket mangalaka kadagiti saksi,’+ nupay ti met laeng siudad masapul a maited iti ima dagiti Caldeo.”+

26 Iti kasta ti sao ni Jehova dimteng ken Jeremias, a kunkunana: 27 “Adtoyak, ni Jehova, ti Dios ti isuamin a lasag.+ Adda aya aniaman a banag a nakaskasdaaw unay kaniak?+ 28 Gapuna daytoy ti kinuna ni Jehova, ‘Adtoy itedko daytoy a siudad iti ima dagiti Caldeo ken iti ima ni Nabucodorosor nga ari ti Babilonia, ket masapul a kautibuenna dayta.+ 29 Ket dagiti Caldeo a makiruprupak iti daytoy a siudad masapul a sumrekda ket pasgedanda daytoy a siudad iti apuy ket masapul a puoranda dayta+ ken dagiti balay nga iti rabaw dagiti atepda nangpataudda iti asuk a sakripisio ken Baal ken nagibukbokda kadagiti daton nga inumen kadagiti sabali a didios iti panggep a panangrurod kaniak.’+

30 “‘Ta ti annak ti Israel ken ti annak ti Juda nagbalinda a managaramid laeng iti dakes kadagiti matak, manipud pay kinaagtutuboda ken agpatpatuloy;+ ta ti annak ti Israel pagrurrurodendak a mismo babaen iti aramid dagiti imada,’+ kuna ni Jehova. 31 ‘Ta daytoy a siudad, manipud iti aldaw a panangibangonda iti dayta, agingga itoy nga aldaw, nagbalin a maysa laeng a pakaigapuan ti panagungetko+ ken maysa a pakaigapuan ti panagpungtotko, tapno ikkatek dayta iti sanguanan ti rupak,+ 32 maigapu iti isuamin a kinadakes ti annak ti Israel+ ken ti annak ti Juda+ nga inaramidda tapno pagrurodendak,+ isuda, ti ar-arida,+ ti piprinsipeda,+ ti papadida+ ken dagiti mammadtoda,+ ken dagiti tattao ti Juda ken dagiti agnanaed iti Jerusalem. 33 Ket intultuloyda nga insango kaniak ti bukot ket saan a ti rupa;+ nupay adda panangisuro kadakuada, ibabangon a nasapa ken panangisuro, ngem awan kadakuada ti umim-imdeng tapno umawat iti disiplina.+ 34 Ket inkabilda ti makarimon a bambanagda iti balay a nakayawagan ti naganko, tapno tulawanda dayta.+ 35 Kanayonanna pay, binangonda dagiti nangato a disso ni Baal+ nga adda iti ginget ti anak ni Hinnom,+ tapno ti annakda a lallaki ken annakda a babbai ipalasatda iti apuy+ ken Molec,+ banag a saanko nga imbilin kadakuada,+ saan met a timpuar dayta iti pusok nga aramidenda daytoy a nakarimrimon a banag,+ iti panggep a panamagbasol iti Juda.’+

36 “Ket ita, ngarud, daytoy ti kinuna ni Jehova a Dios ti Israel maipapan iti daytoy a siudad a kunkunaenyo a sigurado a maitedto iti ima ti ari ti Babilonia babaen ti kampilan ken babaen ti nakaro a bisin ken babaen ti angol,+ 37 ‘Adtoy ummongek ida a sangsangkamaysa manipud kadagiti amin a daga a sadiay ti nangiwarawaraakton kadakuada iti ungetko ken iti pungtotko ken iti dakkel a rurodko;+ ket isublikto ida iti daytoy a lugar ket pagnaedekto ida a sitatalged.+ 38 Ket pudno unay nga agbalindanto nga ilik,+ ket siak agbalinakto a Diosda.+ 39 Ket mangtedakto kadakuada iti maysa a puso+ ken maysa a dalan tapno kanayon nga agbutengda kaniak, maipaay iti pagimbaganda ken iti annakda iti kalpasanda.+ 40 Ket mamatalgedakto kadakuada iti di nakedngan ti kapautna a tulag,+ a saanakto nga agbaw-ing manipud iti likudanda, tapno agaramidak kadakuada iti naimbag;+ ket ti panagbuteng kaniak ikabilkonto iti pusoda tapno saanda a sumiasi kaniak.+ 41 Ket agrag-oakto gapu kadakuada tapno aramidek kadakuada ti naimbag,+ ket imulakto ida iti daytoy a daga+ iti kinapudno buyogen ti isuamin a pusok ken buyogen ti isuamin a kararuak.’”

42 “Ta daytoy ti kinuna ni Jehova, ‘No kasano nga iti daytoy nga ili impagtengko ti isuamin daytoy a dakkel a didigra, kasta ti panangipagtengko kadakuada ti isuamin a kinaimbag a sasawek maipapan kadakuada.+ 43 Ket dagiti talon pudno unay a magatangto iti daytoy a daga+ a pangikunaanyonto: “Maysa dayta a langalang a rebbek+ nga awanan tao ken naamo nga animal. Naited dayta iti ima dagiti Caldeo.”’+

44 “‘Babaen iti kuarta gumatangto a mismo dagiti tattao kadagiti talon, ket addanto panangilista iti kasuratan+ ken panangselio ken panangala kadagiti saksi+ iti daga ti Benjamin+ ken kadagiti aglawlaw ti Jerusalem+ ken kadagiti siudad ti Juda+ ken kadagiti siudad ti nakabambantay a rehion ken kadagiti siudad ti patad a daga+ ken kadagiti siudad ti abagatan,+ agsipud ta isublikto dagiti kautibo kadakuada,’+ kuna ni Jehova.”