Dagiti Saludsod Manipud Kadagiti Agbasbasa
Tangay ikagkagumaan dagiti Saksi ni Jehova ti agbalin a mapagpiaran ken adda talekda iti maysa ken maysa, apay a napateg kadakuada ti panangaramid iti naisurat a tulagan kadagiti negosioda?
Nainkasuratan, praktikal, ken naayat ti panangaramidda iti dayta. Kasano a kasta? Bueno, usigentayo dagitoy nga aspeto kadagiti kontrata iti negosio.
Adda ipakita ti Biblia a naisurat a rekord ti pannakilangen ti Dios iti naitulag nga ilina, dagiti Israelita. Ramanenna dagiti transaksion iti negosio a pakainaigan dagiti pudno a managdaydayaw. Adda maysa a mabalintay nga usigen iti Genesis kapitulo 23. Idi natay ni patpatgenna a Sara, kayat ni Abraham ti mangala iti disso a pagitaneman. Nakitransaksion kadagiti Cananeo nga agnanaed iti asideg ti Hebron. Ipakita ti bersikulo 7-9 a nangidiaya iti masnup a gatad para iti daga a kayatna. Paneknekan ti bersikulo 10 a naaramid daytoy a diaya iti publiko, a dengdenggen dagiti sabsabali nga adda iti ruangan ti siudad. Ipakita ti bersikulo 13 nga intukon ti makinkukua nga ipadawatna ti daga ken ni Abraham, ngem kinuna ni Abraham a sana la alaen ti daga no mailako kenkuana. Ket ilawlawag ti bersikulo 17, 18, ken 20 a kasta ti naaramid, a napatalgedan “iti sango dagiti annak ni Heth, iti imatang dagiti amin a simrek iti ruangan ti ilina.”
Nupay kasta, adda kadi dumana no agpada a pudno a managdaydayaw ti dua a nairaman iti kasta a transaksion? Adda sungbat nga ipaay ti kapitulo 32 ti Jeremias. Manipud iti bersikulo 6, makitatayo a gimmatang ni Jeremias iti daga iti kasinsinna. Ipakita ti bersikulo 9 nga adda nainkalintegan a gatad a napagnumuanda. Ita basaenyo ti bersikulo 10-12: “Ket [siak ni Jeremias] pinirmaak ti dokumento, ket tinimbreak ken immayabak kadagiti saksi, ket tinimbengko ti pirak kadagiti pagtimbengan a maipaay kenkuana. Iti kasta innalak ti dokumento ti panaggatang, a natimbrean, a mayalubog iti linteg ken kadawyan, ken kasta met ti silulukat: Ket intedko ti dokumento ti pananggatang ken Baruc nga anak a lalaki ni Nerias nga anak a lalaki ni Maasias, iti imatang ni Hanamel nga anak a lalaki ni ulitegko, ken iti imatang dagiti saksi a nagpirma iti dokumento ti pananggatang, iti sanguanan dagiti amin a Judios a nagtugaw iti paraangan ti guardia.”
Wen, nupay padana a managdaydayaw ti gimmatangan ni Jeremias, kabagianna pay ketdi, sinurotna dagiti nainkalintegan a legal a pagannurotan. Naaramid ti dua a dokumento—ti maysa a silulukat tapno madadaan a pagkonsultaan, ti maikadua a natimbrean tapno maaramat a pammasingked no adda agduadua iti kinaumiso daydiay silulukat. Naaramid amin daytoy “iti sanguananda,” kas kuna ti bersikulo 13. Isu a maysa daytoy a publiko, legal a transaksion nga addaan kadagiti saksi. No kasta, nalawag nga adda Nainkasuratan a pagtuladan iti panangtaming dagiti pudno a managdaydayaw kadagiti bambanag iti wagas a napatalgedan ken dokumentado.
Praktikal met dayta. Ammotayo a pudno ti pagsasao a ti “panawen ken di mapakpakadaan a pasamak dumteng kadakuada amin.” (Eclesiastes 9:11, NW) Mairaman iti dayta dagiti napasnek ken matalek a Kristiano. Kastoy ti kuna ti Santiago 4:13, 14: “Umaykayo, ita, dakayo nga agkuna: ‘Ita nga aldaw wenno inton bigat agbaniagakaminto nga agturong iti daytoy a siudad ket busbosenminto ti makatawen sadiay, ket agnegosiokaminto ken agganansiakami,’ idinto ta dikay ammo no anianto ti pagbalinan ti biagyo inton bigat.” Gapuna, mabalin a mangirugitayo iti proyekto, kas ti panaggatang, panangaramid iti napagnumuan a trabaho wenno serbisio, wenno panangpataud iti maysa a banag para iti sabali a tao. Ngem anianto ti mapasamak inton bigat—wenno iti umay a bulan wenno iti umay a tawen? Kasanon no naaksidentetayo wenno ti nakitulagantayo? Nalabit dayta ti mamagbalin a kasla imposible a tungpalen ti tulagan. Kasanon no ditay maaramid ti trabaho wenno serbisio, wenno kasla din mabayadan wenno di matungpal ti katulagtayo ti obligasionna? No awan naisurat a katulagan, mabalin a tumaud dagiti napaypayso a parikut, parparikut a marisut koma wenno naliklikan babaen ti kaadda ti simple a naisurat a katulagan.
Maysa pay, ditay koma liplipatan a ti di pannakasigurado iti adu nga aspeto ti biag mabalin a kaipapananna pay ketdi a maipabaklay wenno tamingen ti sabali a tao ti obligasiontayo (wenno daydiay nakitulagantayo). Innayon ni Santiago iti bersikulo 14: “Ta maysakayo nga angep nga agparang iti apagbiit ket kalpasanna agpukaw.” Kinapudnona, mabalin a mataytayo a di mapakpakadaan. No adda naisurat a katulagan, wenno kontrata, maituloy dagiti sabsabali a tamingen dagiti bambanag no bilang adda di mapakpakadaan a mapasamak iti asinoman kadagiti nagtulag.
Mangiturong met daytoy iti maikatlo nga aspeto—dagiti naisurat a katulagan ket ebkas ti ayat. Kinapudnona, no natay wenno naaksidente ket saanen a makabalin ti asinoman kadagiti nagtulag, maikuna a naayat ti maysa a Kristiano no nangaramid iti naisurat a rekord dagiti obligasionna wenno dagiti namnamaenna a maibayad. Ket imbes nga ipasimudaagna ti kinaawan panagtalek, maysa nga ebkas ti ayat iti kabsat a katulagtayo no mangaramidtayo iti naisurat a katulagan a mangipakita a silalawag ken siuumiso no ania ti obligado nga aramiden wenno awatenna. Daytoy a naayat nga addang lapdanna ti sinnakit ti nakem wenno panagginnura no kas pagarigan ta malipatan ti maysa kadagiti imperpekto a nagtinnulag ti dadduma kadagiti detalye wenno responsabilidad. Ket asino kadatayo ti saan nga imperpekto, saan a makalipat, wenno di makatarus no dadduma kadagiti detalye wenno motibo?—Mateo 16:5.
Adda dadduma pay a pamay-an no kasano a ti panangaramid iti naisurat a katulagan iti negosio iyanninawna ti ayat iti kabsattayo, iti pamiliatayo, ken iti kongregasion. Ngem nabatad a malaksid pay iti panagbalin a naayat, ti kakasta a naisurat a rekord a naglaon iti umdas a detalye ket praktikal ken Nainkasuratan.