Marcos

10 Manipud sadiay isu timmakder ket dimteng kadagiti beddeng ti Judea ken iti ballasiw ti Jordan, ket immay manen a sangsangkamaysa kenkuana dagiti bunggoy, ket kas iti nayugalina nga aramiden insursurona ida manen.+ 2 Immasideg ita dagiti Fariseo ket, tapno subokenda, rinugianda a sinaludsod kenkuana no nainkalintegan a ti maysa a lalaki mangidiborsio iti asawa.+ 3 Kas sungbat kinunana kadakuada: “Ania kadi ti imbilin kadakayo ni Moises?” 4 Kinunada: “Impalubos ni Moises ti panangisurat iti kasuratan ti panamagtalaw ken panangidiborsio kenkuana.”+ 5 Ngem kinuna kadakuada ni Jesus: “Maipagapu iti kinatangken ti panagpuspusoyo+ insuratna kadakayo daytoy a bilin. 6 Nupay kasta, nanipud idi panangrugi ti panamarsua ‘Isu inaramidna ida a lalaki ken babai.+ 7 Gapu itoy ti maysa a lalaki panawannanto ti amana ken inana, 8 ket dagiti dua maymaysadanton a lasag’;+ iti kasta saandan a dua, no di ket maymaysadan a lasag. 9 Gapuna ti pinagsinnangol ti Dios saan koma a pagsinaen ti tao.”+ 10 Idi adda manen iti balay+ rinugian dagiti adalan ti agsaludsod kenkuana maipapan iti daytoy. 11 Ket kinunana kadakuada: “Siasinoman a mangidiborsio iti asawana a babai ket mangasawa iti sabali makaaramid iti pannakikamalala+ maibusor kenkuana, 12 ket no ti babai, kalpasan ti panangidiborsiona iti asawana, makiasawa iti sabali, makaaramid iti pannakikamalala.”+

13 Ita rinugian dagiti tattao nga inyeg kenkuana dagiti ubbing tapno sagidenna dagitoy; ngem tininggar ida dagiti adalan.+ 14 Idi makitana daytoy nagrurod ni Jesus ket kinunana kadakuada: “Bay-anyo dagiti ubbing nga umay kaniak; dikay padasen a pawilan ida, ta ti pagarian ti Dios kukua dagiti kasta.+ 15 Pudno kunak kadakayo, Siasinoman a saan nga umawat iti pagarian ti Dios a kas iti maysa nga ubing saanto a pulos makastrek iti dayta.”+ 16 Ket innalana dagiti ubbing kadagiti takiagna ket rinugianna a binendisionan ida, nga impatayna kadakuada dagiti imana.+

17 Ket bayat nga isu rumrummuaren, maysa a lalaki ti nagtaray nga immasideg ket nagparintumeng iti sanguananna ket insaludsodna kenkuana: “Naimbag a Mannursuro, ania ti masapul nga aramidek tapno agtawidak iti agnanayon a biag?”+ 18 Kinuna kenkuana ni Jesus: “Apay nga awagannak iti naimbag?+ Awan asinoman a naimbag, malaksid ti maysa, ti Dios.+ 19 Ammom dagiti bilin, ‘Dika mamapatay,+ Dika makikamalala,+ Dika agtakaw,+ Dika mangsaksi iti ulbod,+ Dika mangsaur,+ Dayawem ni amam ken ni inam.’”+ 20 Kinuna kenkuana ti lalaki: “Mannursuro, amin dagitoy a banag sinalimetmetakon nanipud pay kinaagtutubok.” 21 Minatmatan ni Jesus ket nariknana ti panagayat kenkuana ket kinunana kenkuana: “Maysa a banag ti agkurang kenka: Inka, ilakom no ania a bambanag ti adda kenka ket itedmo kadagiti napanglaw, ket maaddaankanto iti gameng idiay langit, ket umayka agbalinka a pasurotko.”+ 22 Ngem isu nagliday iti sao ket pimmanaw a sileleddaang, ta agik-ikut idi iti adu a sanikua.+

23 Kalpasan a kimmita iti aglikmut kinuna ni Jesus kadagiti adalanna: “Anian a nakarigrigatto a banag kadagidiay addaan kuarta+ ti sumrek iti pagarian ti Dios!”+ 24 Ngem dagiti adalan nagsiddaawda+ iti sasaona. Kas sungbat kinuna manen kadakuada ni Jesus: “Annak, anian a nakarigrigat a banag ti sumrek iti pagarian ti Dios! 25 Ti maysa a kamelio nalaklaka a lumsot iti abut ti dagum ngem iti maysa a nabaknang a tao a sumrek iti pagarian ti Dios.”+ 26 Ad-adda pay a nagsiddaawda ket kinunada kenkuana: “Siasino, iti kinapudnona, ti mabalin a maisalakan?”+ 27 Idi impamaysana a minatmatan ida kinuna ni Jesus: “Kadagiti tattao di mabalin dayta, ngem saan a kasta iti Dios, ta amin a bambanag mabalin iti Dios.”+ 28 Rinugian a kunaen kenkuana ni Pedro: “Adtoy! Pinanawanmi ti amin a bambanag ket simmursurotkami kenka.”+ 29 Kinuna ni Jesus: “Pudno kunak kadakayo, Awan asinoman a nangpanaw iti balay wenno kakabsat a lallaki wenno kakabsat a babbai wenno ina wenno ama wenno annak wenno taltalon maigapu kaniak ken maigapu iti naimbag a damag+ 30 a saanto nga umawat iti maminsangagasut+ ita iti daytoy a las-ud ti tiempo, kadagiti balay ken kakabsat a lallaki ken kakabsat a babbai ken inna ken annak ken taltalon, agraman kadagiti pannakaidadanes,+ ket iti um-umay a sistema ti bambanag agnanayon a biag. 31 Nupay kasta, adu dagiti umuna a maudinto, ken dagiti maudi nga umuna.”+

32 Ita sumangsang-atdan iti dalan nga agturong idiay Jerusalem, ket ni Jesus mapmapan idi iti sanguananda, ket nagsiddaawda; ngem dagidiay simmurot nangrugida nga agbuteng. Naminsan manen nga inlasinna dagiti sangapulo ket dua ket rinugianna nga ibaga kadakuada dagitoy a banag a naikeddeng a mapagteng kenkuana:+ 33 “Adtoy, sumangsang-attayon idiay Jerusalem, ket ti Anak ti tao mayawatto iti panguluen a papadi ken kadagiti eskriba, ket kondenarendanto a matay ket iyawatdanto kadagiti tattao iti nasnasion,+ 34 ket pagang-angawandanto ken tupraandanto ken saplitenda ken papatayenda, ngem tallo nga aldaw kalpasanna bumangonto.”+

35 Ket da Santiago ken Juan, ti dua nga annak ni Zebedeo,+ immasidegda kenkuana ket kinunada kenkuana: “Mannursuro, kayatmi nga aramidem maipaay kadakami ti aniaman a dawatenmi kenka.”+ 36 Kinunana kadakuada: “Ania ti kayatyo nga aramidek maipaay kadakayo?” 37 Kinunada kenkuana: “Palubosannakami nga agtugaw iti dayagmo, maysa iti makannawanmo ken maysa iti makannigidmo.”+ 38 Ngem kinuna kadakuada ni Jesus: “Saanyo nga ammo no ania ti dawdawatenyo. Mabalinanyo kadi ti uminum iti kopa nga in-inumak, wenno ti mabautisaran iti bautismo a pakabautisarak?”+ 39 Kinunada kenkuana: “Mabalinanmi.” Iti kasta kinuna kadakuada ni Jesus: “Iti kopa nga in-inumak uminumkayto, ket iti bautismo a pakabautisarak mabautisarankayto.+ 40 Nupay kasta, daytoy panagtugaw iti makannawanko wenno iti makannigidko saanko a biang ti mangipaay,+ no di ket kukua dayta dagidiay nakaisaganaanna.”

41 Ala ket, idi a nangngeg ti sangapulo a sabsabali ti maipapan iti dayta, nangrugida nga agrurod kada Santiago ken Juan.+ 42 Ngem ni Jesus, kalpasan nga inayabanna ida, kinunana kadakuada: “Ammoyo a dagidiay agparang a kasla a mangiturturay kadagiti nasion dominaranda ida ket dagiti naindaklanda aramatenda ti autoridad kadakuada.+ 43 Saan a kastoy kadakayo; no di ket siasinoman a kayatna ti agbalin a naindaklan kadakayo masapul nga agserbi kadakayo,+ 44 ket siasinoman a kayatna ti agbalin nga umuna kadakayo masapul nga agbalin nga adipen ti isuamin.+ 45 Ta uray pay ti Anak ti tao immay, saan a tapno pagserbian,+ no di ket tapno agserbi ken tapno itedna ti kararuana kas subbot+ a kasukat dagiti adu.”+

46 Ket dimtengda idiay Jerico. Ngem bayat nga isu ken dagiti adalanna ken ti maysa a dakkel a bunggoy rumrummuarda idi iti Jerico, ni Bartimeo (nga anak ni Timeo), maysa a bulsek nga agpalpalama, agtugtugaw iti igid ti dalan.+ 47 Idi nangngegna a ni Jesus a Nazareno dayta, rinugianna nga impukkaw ken kinuna: “Anak ni David,+ Jesus, maasianka kaniak!”+ 48 Gapu itoy adu ti nangrugi a nangibaga a siiinget kenkuana nga agulimek; ngem ad-adda pay nga impukpukkawna: “Anak ni David, maasianka kaniak!”+ 49 Gapuna nagsardeng ni Jesus ket kinunana: “Ayabanyo.” Ket inayabanda ti bulsek a lalaki, a kunkunada kenkuana: “Bumilegka, tumakderka, ay-ayabannaka.”+ 50 Idi impalladawna ti makinruar a kawesna, isu limmagto ket napan ken Jesus. 51 Ket kas sungbat kenkuana kinuna ni Jesus: “Ania ti kayatmo nga aramidek kenka?”+ Kinuna kenkuana ti bulsek a lalaki: “Rabboni, mapasubli koma ti panagkitak.”+ 52 Ket kinuna kenkuana ni Jesus: “Mapankan, ti pammatim pinaimbagnaka.”+ Ket dagus a nagsubli ti panagkitana,+ ket nangrugi a sumurot kenkuana iti dalan.+