Inaramidda ti Pagayatan ni Jehova

Inwayaan ni Jesus ti Nakilangen Kadagiti Ubbing

UMAS-ASIDEG idin ti panagngudo ti tallo ket kagudua a tawen a ministerio ni Jesus. Di agbayag mapanen sadiay Jerusalem ket agsagaba iti nasaem nga ipapatay. Pagaammona unay ti masakbayanna, ta imbagana kadagiti adalanna: “Ti Anak ti tao mayawat iti im-ima dagiti tattao, ket papatayendanto.”​—Marcos 9:31.

Sigurado, kayat nga aprobetsaren ni Jesus ti tunggal aldaw, tunggal oras, tunggal kanito a nabatbati. Masapul pay nga asikasuenna dagiti adalanna. Ammo ni Jesus a kasapulanda pay ti nabileg a pammagbaga maipapan iti kinapateg ti kinapakumbaba ken ti kanayon a peggad ti pannakaitibkolda. (Marcos 9:35-37, 42-48) Masapulda met ti instruksion maipapan iti panagasawa, diborsio, ken panagsolsolo. (Mateo 19:3-12) Gapu ta ammona a dandanin matay, di pagduaduaan a pangababaen ti pannakisarita ni Jesus kadagiti adalanna a buyogen ti kinaganetget. Nakapatpateg ti tiempona​—a namagbalin nga ad-adda a nagpaiduma ti simmaruno nga inaramid ni Jesus.

Inabrasa ni Jesus Dagiti Ubbing

Kuna ti salaysay ti Biblia: “Dagiti tattao rinugianda nga iyeg kenkuana dagiti ubbing tapno sagidenna dagitoy.” Idi nakita daytoy dagiti adalanna, dagdagusda nga imparit. Nalabit impapanda nga importante unay ni Jesus wenno okupado unay ket dina maasikaso dagiti ubbing. Agasenyo, ngarud, ti siddaaw dagiti adalan idi tininggar ida ni Jesus! “Bay-anyo dagiti ubbing nga umay kaniak,” kinunana kadakuada. “Dikay padasen a pawilan ida, ta ti pagarian ti Dios kukua dagiti kakasta.” Kalpasanna innayon ni Jesus: “Pudno kunak kadakayo, Siasinoman a di umawat iti pagarian ti Dios a kas iti maysa nga ubing saanto a pulos makastrek iti dayta.”​—Marcos 10:13-15.

Nakita ni Jesus dagiti nakaay-ayat a kababalin dagiti ubbing. Masansan a managpalutpot ken nalakada nga agtalek. Patienda ti sasao dagiti dadakkelda ket inkalinteganda ida kadagiti dadduma nga ubbing. Ti sidadaan, nalaka nga isuro a kababalinda ket maitutop a tuladen dagiti amin nga agtarigagay a sumrek iti Pagarian ti Dios. Kas kinuna ni Jesus, “ti pagarian ti Dios kukua dagiti kakasta.”​—Idiligyo ti Mateo 18:1-5.

Ngem saan laeng nga inusar ni Jesus dagitoy nga ubbing kas ilustrasion. Ibatad ti salaysay a pudpudno a pagay-ayat ni Jesus ti makilangen kadakuada. Insurat ni Marcos a ni Jesus “innalana dagiti ubbing kadagiti takkiagna ket rinugianna a bendisionan ida, nga impatayna kadakuada dagiti imana.” (Marcos 10:16) Ti laeng salaysay ni Marcos ti nangdakamat iti nabara a detalye a ni Jesus “innalana dagiti ubbing kadagiti takkiagna.”a Linab-awan ngarud ni Jesus ti namnamaen dagiti natataengan, a nangyasideg kadagitoy nga ubbing ken Jesus tapno “sagidenna” laeng koma ida.

Aniat’ kayulogan ti ‘panangipatay’ ni Jesus ‘kadagiti imana’ kadagiti ubbing? Awan ti naipasimudaag ditoy a relihioso a seremonia, kas iti bautismo. Nupay iti dadduma nga okasion, ti panangipatay kadagiti ima kaipapananna ti panangdutok, kadagiti dadduma nga okasion kayuloganna laeng ti panangbendision. (Genesis 48:14; Aramid 6:6) Isu a nalabit binendisionan laeng ni Jesus dagiti ubbing.

Kaskasdi, nabileg a sao ti inusar ni Marcos ditoy para iti “bendision” (ka·teu·lo·geʹo), nga ipasimudaagna ti naganetget a puersa. Ipamatmat daytoy a binendisionan ni Jesus dagiti ubbing a sipapasnek, sidudungngo, ken sibabara. Nalawag, dina minatmatan dagiti ubbing a kas dadagsen a pakasayangan ti panawen.

Ti Maadaltayo

Saan a makapaamak wenno mangpabain ti wagas a pannakilangen ni Jesus agpadpada kadagiti ubbing ken natataengan. “Nalabit nalaka nga umisem ken agkatawa a sirarag-o,” kuna ti maysa a libro. Isu met laeng a komportable amin a tattao a nagduduma ti edadda no makilangenda kenkuana. No usigentayo ti ehemplo ni Jesus, mayimtuodtayo iti bagitayo, ‘Nalakadak kadi a maasitgan dagiti sabsabali?’ ‘Kaslaak kadi okupado unay a masinga kadagiti aktibidad ken pakaseknan dagiti dadduma?’ Ti napasnek a panaginteres kadagiti tattao gutugotennatayo nga agtignay a sibubulos, kas iti inaramid ni Jesus. Madlawto dagiti dadduma ti pudpudno a panaginterestayo ket umasidegda kadatayo.​—Proverbio 11:25.

Kas ipakita ti salaysay ni Marcos, tinagiragsak ni Jesus ti nakilangen kadagiti ubbing. Nalabit, pinalpaliiwna ida nga agay-ayam, ta dinakamatna dagiti ay-ayamda iti maysa kadagiti ilustrasionna. (Mateo 11:16-19) Nalabit dadduma kadagidi ubbing a binendisionan ni Jesus ubbingda pay unay ket dida naawatan ti kinasiasinona ken ti insurona. Ngem dina impapan a sayang laeng ti tiempona. Inwayaanna ti nakilangen kadagiti ubbing gapu ta ay-ayatenna ida. Nalabit, adu kadagidi ubbing a nakalangen ni Jesus kabayatan ti ministeriona ti natignay idi agangay a mangsubad iti ayatna babaen ti panagbalinda nga adalanna.

No inwayaan ni Jesus ti nakilangen kadagiti ubbing idi maudin a lawlawas ti panagbiagna, sigurado a maiwayaantay met ti tiempotayo para kadakuada nupay okupadotayo. Nangnangruna koma a sipapanunottayo kadagidiay addaan iti naisangsangayan a kasapulan, kas kadagiti ulila nga ubbing. Wen, rumang-ay amin nga ubbing no maasikasoda, ket tarigagayan ni Jehova nga ipaayantay ida iti ayat ken tulong a kabaelantayo nga ited.​—Salmo 10:14.

[Footnote]