Deuteronomio

22 “Saanmo koma a makita ti toro ti kabsatmo wenno ti karnerona nga agkalkallautang ket igagaram a liklikan ida.+ Di bumurong nga iturongmo ida nga agsubli iti kabsatmo.+ 2 Ket no saan nga asideg kenka ti kabsatmo ket saanmo a naam-ammo, masapul met nga iyawidmo dayta iti uneg ti balaymo, ket masapul nga agtalinaed kenka agingga a biroken ti kabsatmo. Ket masapul nga isublim kenkuana.+ 3 Kasta met ti aramidemto iti asnona, ket kasta ti aramidemto iti kagayna, ket kasta ti aramidemto iti aniaman a banag a napukaw a kukua ti kabsatmo, a mapukaw kenkuana ket nasarakam. Saankanto a mapalubosan a mangiliklik iti bagim.

4 “Saanmo koma a makita ti asno ti kabsatmo wenno ti torona a mapaidda iti dalan ket igagaram a liklikan ida. Di bumurong nga isu tulongam a mangpatakder kadakuada.+

5 “Awan lupot ti nabaneg a lalaki ti rebbeng a maikapet iti maysa a babai, saan met nga agkawes ti nabaneg a lalaki iti kagay ti maysa a babai;+ ta asinoman nga agar-aramid kadagitoy a banag ket nakarimrimon ken Jehova a Diosmo.

6 “No kas pagarigan ti maysa nga umok ti tumatayab nairana nga adda iti sangom iti dalan, iti aniaman a kayo wenno iti daga nga addaan kadagiti urbon+ wenno kadagiti itlog, ket ti ina salsallukobanna dagiti urbon wenno dagiti itlog, dika alaen ti ina a mairaman iti annak.+ 7 Di bumurong a bulosam ti ina, ngem mabalinmo nga alaen ti annak a maipaay kenka; tapno naimbag ti lak-ammo, ket pudno a mapaatiddogmo ti al-aldawmo.+

8 “No kas pagarigan mangbangonka iti baro a balay, masapul met nga iyaramidam iti barandilias ti atepmo,+ tapno saanka a mangikabil iti panagbasol iti dara iti balaymo ta amangan no matnag manipud iti dayta ti asinoman nga agtinnag.

9 “Dika mulaan ti kaubasam iti dua a kita ti bin-i,+ ta amangan no ti intero a bunga ti bin-i nga imulam ken ti napataud iti kaubasan mapukaw a maipan idiay santuario.

10 “Dika pagarado a sangsangkagiddan ti maysa a toro ken maysa nga asno.+

11 “Dika agkawes iti napaglaok a banag ti delana ken lienso nga aggiddan.+

12 “Rebbeng nga iyaramidam ta bagim kadagiti garaygay iti uppat a pingir ti pagan-anaymo a pangabbongmo iti bagim.+

13 “No kas pagarigan ti maysa a lalaki mangala iti asawa ket pudno a nakidenna kenkuana ket ginurana,+ 14 ket pinabasolna iti agdindinamag ti kinadakesna nga ar-aramid ket nangpataud iti dakes a nagan+ kenkuana ket kinunana, ‘Daytoy ti babai nga innalak, ket immasidegak kenkuana, ket saanak a nakasarak kenkuana iti pammaneknek ti kinabirhen’;+ 15 ti ama ti babai ken ti inana masapul met nga alaenda ket iyegda ti pammaneknek ti kinabirhen ti babai kadagiti lallakay ti siudad iti ruangan dayta;+ 16 ket kunaento ti ama ti babai kadagiti lallakay, ‘Intedko ti anakko iti daytoy a lalaki kas asawa, ket ginurana.+ 17 Ket adtoy pabpabasolenna iti agdindinamag ti kinadakesna nga ar-aramid,+ a kunkunana: “Nasarakak a ti anakmo awanan pammaneknek ti kinabirhen.”+ Ita daytoy ti pammaneknek ti kinabirhen ti anakko.’ Ket masapul nga iyaplagda ti kagay iti sango dagiti lallakay ti siudad. 18 Ket dagiti lallakay+ iti dayta a siudad masapul nga alaenda ti lalaki ket disiplinaenda.+ 19 Ket masapul a pagmultaenda iti sangagasut a siklo a pirak ket itedda ida iti ama ti babai, agsipud ta nangpataud iti dakes a nagan iti maysa a birhen ti Israel;+ ket agtultuloyto nga asawana. Saanto a mapalubosan a mangidiborsio kenkuana iti amin nga al-aldawna.

20 “Nupay kasta, no daytoy a banag napaneknekan nga isu ti kinapudno, awan nasarakan a pammaneknek ti kinabirhen iti babai,+ 21 masapul met nga iruarda ti babai nga ipan iti pagserkan ti balay ni amana, ket masapul nga isu uboren dagiti lallaki ti siudadna iti batbato, ket masapul a matay, agsipud ta nakaaramid iti nakababain a kinamaag+ iti Israel babaen ti panagbalangkantis iti balay ni amana.+ Gapuna masapul nga ikkatem ti dakes iti tengngam.+

22 “No kas pagarigan ti maysa a lalaki masarakan a makikakaidda iti babai a kukua ti maysa a makinkukua,+ isuda a dua masapul ngarud a matayda nga agpadpada, ti lalaki a makikakaidda iti babai ken ti babai.+ Gapuna masapul nga ikkatem ti dakes iti Israel.+

23 “No kas pagarigan adda birhen a babai a naitulag iti maysa a lalaki,+ ket pudno a masarakan ti maysa a lalaki iti siudad ket makikaidda kenkuana,+ 24 masapul met nga iruaryo ida a dua iti ruangan dayta a siudad ket uborenyo ida iti batbato, ket masapul a matayda, ti babai iti rason a saan a nagriaw iti siudad, ken ti lalaki iti rason a minulitanna ti asawa ti padana a tao.+ Gapuna masapul nga ikkatem ti dakes iti tengngam.+

25 “Nupay kasta, no iti tay-ak ti nakasarakan ti lalaki iti babai a naitulag, ket ginammatan ti lalaki ket nakikaidda kenkuana, ti lalaki a nakikaidda kenkuana masapul met a matay nga is-isuna, 26 ket awanto ti aramidem iti babai. Awan basol ti babai a maikari iti ipapatay, agsipud ta kas iti itatakder ti maysa a lalaki maibusor iti padana a tao ket pudno a papatayenna,+ ti maysa a kararua a mismo, kasta daytoy a kaso. 27 Ta iti tay-ak ti nakasarakanna kenkuana. Nagriaw ti babai a naitulag, ngem awan idi ti asinoman a mangispal kenkuana.

28 “No kas pagarigan ti maysa a lalaki masarakanna ti maysa a babai, maysa a birhen a saan pay a naitulag, ket pudno a kemmegenna ken makikaidda kenkuana,+ ket nasukalan ida,+ 29 ti lalaki a makikaidda kenkuana masapul met a mangted iti ama ti babai iti limapulo a siklo a pirak,+ ket agbalinto nga asawana gapu iti kinapudno nga isu minulitanna. Saanto a mapalubosan a mangidiborsio kenkuana iti amin nga al-aldawna.+

30 “Awan koma ti lalaki a mangala iti asawa ni amana, tapno saanna a lukasan ti pandiling ni amana.+