1 Tesalonica
3 Gapuna, idi saanmin a maibturan, nakitami a nasayaat no agbatikami a dakdakami idiay Atenas;+ 2 ket imbaonmi ni Timoteo,+ a kabsatmi ken ministro ti Dios iti naimbag a damag+ maipapan iti Kristo, tapno patibkerennakayo ken liwliwaennakayo maigapu iti pammatiyo, 3 tapno awan koma ti maisiasi babaen kadagitoy a rigat.+ Ta dakayo ammoyo a nadutokantayo iti daytoy met laeng a banag.+ 4 Iti kinapudnona, met, idi addakami kadakayo, impakpakaunami kadakayo+ a naikeddengkami nga agsagaba iti rigat,+ kas iti napasamak met ken kas iti pagaammoyo.+ 5 Dayta ti makagapu a, pudno unay, idi saankon a maibturan, nagbaonak tapno maammuak ti kinamatalekyo,+ ta amangan no iti aniaman a pamay-an nasulisognakayo ti Mannulisog,+ ket nagbanag nga ubbaw ti panagbannogmi.+
6 Ngem kasangsangpet laeng ita kadakami ni Timoteo manipud kadakayo+ ket impaayna kadakami ti naimbag a damag maipapan iti kinamatalek ken ayatyo,+ ken agtultuloy ti naimbag a pananglaglagipyo kadakami a kankanayon, nga iti isu met laeng a pamay-an mailiwkayo a makakita kadakami, kinapudnona, a kas met ti pannakailiwmi kadakayo.+ 7 Dayta ti makagapu, kakabsat, a naliwliwakami+ kadakayo iti isuamin a panagkasapulan ken rigatmi babaen ti kinamatalek nga ipakpakitayo,+ 8 agsipud ta ita agbiagkami no agtakderkayo a sititibker iti Apo.+ 9 Ta ania a panagyaman ti mabalinmi nga ipaay iti Dios maipapan kadakayo kas subad ti isuamin a rag-o a pagragrag-oanmi+ gapu kadakayo iti sanguanan ti Diostayo, 10 bayat nga iti rabii ken aldaw umar-ararawkami+ nga ad-adda pay a nalablabes tapno makitami ti ruprupayo ken tapno mapunnuanmi ti bambanag a pagkurangan ti pammatiyo?+
11 Ita sirarang-ay koma nga iturong ti mismo a Dios ken Amatayo ken ni Apotayo a Jesus+ ti dalanmi nga agturong kadakayo. 12 Mainayon pay, parang-ayennakayo koma ti Apo,+ wen, pawadwadennakayo, iti ayat+ iti maysa ken maysa ken iti isuamin, a kas met iti ar-aramidenmi kadakayo; 13 iti panggep a patibkerenna koma dagiti pusoyo, awan pakababalawanna+ iti kinasanto iti sanguanan ti Dios ken Amatayo inton kaadda+ ni Apotayo a Jesus agraman dagiti amin a sasantona.+