Ti Maikadua a Cronicas
19 Kalpasanna, nakasubli a sitatalged* ni Ari Jehosafat ti Juda+ iti balayna* idiay Jerusalem. 2 Simmabat ni Jehu+ nga anak ni Hanani+ a managsirmata ket kinunana ken Ari Jehosafat: “Rumbeng aya a tulongam ti managdakdakes+ ken ayatem dagiti manggurgura ken Jehova?+ Gapu iti dayta, nakapungtot kenka ni Jehova. 3 Nupay kasta, adda naimbag a nasarakan kenka,+ ta inikkatmo dagiti sagrado a poste* iti daga ken insaganam ti pusom* a mangsapul iti pudno a Dios.”+
4 Nagtultuloy a nagnaed ni Jehosafat idiay Jerusalem, ket napan manen kadagiti umili manipud Beer-sheba agingga iti kabambantayan ti Efraim,+ tapno tulonganna ida nga agsubli ken Jehova a Dios dagidi ammada.+ 5 Nangdutok pay kadagiti ukom iti intero a daga iti amin a napaderan a siudad ti Juda.+ 6 Kinunana kadagiti ukom: “Agannadkayo iti aramidenyo, ta mangukomkayo saan a para iti tao no di ket para ken Jehova, nga adda kadakayo no mangukomkayo.+ 7 Agbutengkayo koma ken Jehova.+ Agannadkayo no ania ti aramidenyo, ta kanayon nga adda hustisia ken Jehova a Diostayo,+ saan a mangidumduma,+ ken saan nga umawat iti pasuksok.”+
8 Nangdutok met ni Jehosafat idiay Jerusalem iti sumagmamano a Levita ken papadi ken iti ulo dagiti pamilia ti Israel nga agserbi kas ukom para ken Jehova ken mangtaming kadagiti kaso dagiti agnanaed iti Jerusalem.+ 9 Binilinna ida: “Kastoy ti rumbeng nga aramidenyo kas panagbuteng ken Jehova, buyogen ti kinamatalek ken naan-anay* a puso: 10 No adda kaso nga iyuli dagiti kakabsatyo nga agnanaed kadagiti siudadda maipapan iti pammapatay+ wenno adda saludsodda maipapan iti maysa a linteg, bilin, regulasion, wenno pangngeddeng, rumbeng a pakdaaranyo ida tapno saanda a makabasol ken Jehova; ta no saan, makapungtot kadakayo ti Dios ken kadagiti kakabsatyo. Daytoy ti aramidenyo tapno saankayo a makabasol. 11 Ni Amarias a panguluen a padi ti mangidaulo kadakayo iti aniaman a banag mainaig ken Jehova.+ Ni Zebadias nga anak ni Ismael ti lider iti sangakabbalayan ti Juda iti aniaman a banag mainaig iti ari. Dagiti Levita ti agserbi kas opisialyo. Papigsaenyo ti pakinakemyo ken agtignaykayo, ket adda koma ni Jehova kadagidiay agaramid iti naimbag.”*+