Deuteronomio

27 Kalpasanna, imbilin ni Moises agraman dagiti panglakayen iti Israel kadagiti tattao: “Tungpalenyo ti tunggal bilin nga itedko kadakayo ita nga aldaw. 2 Inton ballasiwenyo ti Jordan a mapan iti daga nga ited kadakayo ni Jehova a Diosyo, mangalakayo iti dadakkel a bato ket pagtutuonen ken palitadaanyo.*+ 3 Isuratyo kadagita ti amin a sasao daytoy a Linteg inton nakaballasiwkayon, tapno makastrekkayo iti daga nga ited kadakayo ni Jehova a Diosyo, ti daga a pagay-ayusan ti gatas ken diro, kas inkari kadakayo ni Jehova a Dios dagidi ammayo.+ 4 Inton maballasiwyon ti Jordan, masapul nga ibangonyo dagitoy a bato idiay Bantay Ebal+ sa palitadaanyo,* kas iti ibilinko kadakayo ita nga aldaw. 5 Mangbangonkayo met sadiay iti altar para ken Jehova a Diosyo, maysa nga altar a bato. Dikay agusar iti aniaman a remienta a landok.+ 6 Agusarkayo kadagiti bato a saan a natikapan iti panangbangonyo iti altar ni Jehova a Diosyo ket ipaayyo sadiay ken Jehova a Diosyo dagiti daton a mapuoran. 7 Idatagyo dagiti daton a pakikappia+ ken kanenyo sadiay,+ ket agragsakkayo iti sanguanan ni Jehova a Diosyo.+ 8 Silalawag nga isuratyo kadagita a bato ti amin a sasao daytoy a Linteg.”+

9 Kalpasanna, imbaga ni Moises ken dagiti papadi a Levita iti intero nga Israel: “Agulimekkayo ket dumngegkayo, O Israel. Nagbalinkayo ita nga aldaw nga ili ni Jehova a Diosyo.+ 10 Masapul a denggenyo ti timek ni Jehova a Diosyo ket tungpalenyo dagiti bilin+ ken regulasionna, nga itedko kadakayo ita nga aldaw.”

11 Iti dayta nga aldaw, imbilin ni Moises kadagiti tattao: 12 “Dagitoy ti tribu nga agtakderto idiay Bantay Gerizim+ a mangibaga iti bendision kadagiti tattao inton naballasiwyon ti Jordan: Simeon, Levi, Juda, Isacar, Jose, ken Benjamin. 13 Dagitoy met ti agtakderto idiay Bantay Ebal+ a mangibaga iti lunod: Ruben, Gad, Aser, Zabulon, Dan, ken Neftali. 14 Kastoyto ti sipipigsa nga isungbat dagiti Levita iti amin a tattao iti Israel:+

15 “‘Mailunod ti tao a mangaramid iti kinitikitan nga imahen+ wenno metal nga estatua,*+ a karimon ni Jehova,+ nga inaramid ti eksperto a trabahador,* ken inlemmengna dayta.’ (Isungbatto ti amin a tattao, ‘Amen!’*)

16 “‘Mailunod daydiay mangsukir iti ama wenno inana.’+ (Isungbatto ti amin a tattao, ‘Amen!’)

17 “‘Mailunod daydiay mangyalis iti muhon+ ti kaarrubana.’ (Isungbatto ti amin a tattao, ‘Amen!’)

18 “‘Mailunod daydiay mangyaw-awan iti bulsek iti pagnaanna.’+ (Isungbatto ti amin a tattao, ‘Amen!’)

19 “‘Mailunod daydiay mangkillo iti pannakaukom+ ti ganggannaet a residente, awanan ama nga ubing,* wenno balo a babai.’+ (Isungbatto ti amin a tattao, ‘Amen!’)

20 “‘Mailunod daydiay mangdenna iti asawa ni amana, ta imbabainna ni amana.’*+ (Isungbatto ti amin a tattao, ‘Amen!’)

21 “‘Mailunod daydiay mangdenna iti aniaman nga animal.’+ (Isungbatto ti amin a tattao, ‘Amen!’)

22 “‘Mailunod daydiay mangdenna iti kabsatna a babai, anak man ni ama wenno inana.’+ (Isungbatto ti amin a tattao, ‘Amen!’)

23 “‘Mailunod daydiay mangdenna iti katuganganna a babai.’+ (Isungbatto ti amin a tattao, ‘Amen!’)

24 “‘Mailunod daydiay mangtambang iti kaarrubana tapno patayenna.’+ (Isungbatto ti amin a tattao, ‘Amen!’)

25 “‘Mailunod daydiay umawat iti pasuksok tapno patayenna ti inosente a tao.’*+ (Isungbatto ti amin a tattao, ‘Amen!’)

26 “‘Mailunod daydiay saan a mangsurot iti sasao daytoy a Linteg ken saan nga agtulnog kadagita.’+ (Isungbatto ti amin a tattao, ‘Amen!’)