Maysa nga Apocalipsis ken Juan
6 Nakitak idi linuktan ti Kordero+ ti maysa kadagiti pito a selio,+ ket nangngegko nga imbaga ti maysa kadagiti uppat a sibibiag a parsua+ a kasla gurruod ti timekna: “Umayka!” 2 Kimmitaak ket adtoy! adda puraw a kabalio,+ ken nakaiggem iti pana daydiay nakasakay iti dayta; ken naikkan iti korona,+ ket rimmuar a mangparmek tapno makompleto ti panagballigina.+
3 Idi linuktanna ti maikadua a selio, nangngegko nga imbaga ti maikadua a sibibiag a parsua:+ “Umayka!” 4 Adda sabali pay a rimmuar a kabalio a kasla apuy ti kolorna, ket naikkan iti autoridad daydiay nakasakay iti dayta a mangikkat iti talna iti daga tapno agpipinnatay dagiti tattao, ken adda dakkel nga espada a naited kenkuana.+
5 Idi linuktanna ti maikatlo a selio,+ nangngegko nga imbaga ti maikatlo a sibibiag a parsua:+ “Umayka!” Kimmitaak ket adtoy! adda nangisit a kabalio, ken nakaiggem iti pagtimbangan daydiay nakasakay. 6 Nangngegko nga imbaga ti kasla timek a naggapu iti tengnga ti uppat a sibibiag a parsua: “Maysa a kilo* a trigo para iti maysa a denario,* ken tallo a kilo a sebada para iti maysa a denario;+ ken dimo ibusen ti lana ti olibo ken ti arak.”+
7 Idi linuktanna ti maikapat a selio, nangngegko nga imbaga ti maikapat a sibibiag a parsua:+ “Umayka!” 8 Kimmitaak ket adtoy! adda napusiaw a kabalio; ket Patay ti nagan ti nakasakay. Ken sumursurot ni Tanem* iti asidegna. Naikkanda iti autoridad iti apagkapat ti daga, tapno mangpapatayda babaen ti atiddog nga espada, bisin,+ makapapatay a didigra, ken narungsot nga an-animal iti daga.+
9 Idi linuktanna ti maikalima a selio, nakitak iti sirok ti altar+ dagiti kararua*+ dagidiay napapatay gapu iti sao ti Dios ken gapu iti trabahoda a panangsaksi.+ 10 Impukkawda iti napigsa a timek: “Kangatuan* nga Apo a nasantuan ken napudno,+ agingga iti kaano a laplapdam ti panangukommo ken ti panangibalesmo iti darami kadagiti agnanaed iti daga?”+ 11 Ken naikkan ti tunggal maysa kadakuada iti puraw a bado,+ ken naibaga kadakuada nga aginanada pay la biit, agingga a makompleto ti bilang dagiti padada nga adipen ken dagiti kakabsatda a dandanin mapapatay a kas met la kadakuada idi.+
12 Nakitak idi linuktanna ti maikanem a selio, ket nagginggined iti nakapigpigsa; ngimmisit ti init a kas iti nakersang a lupot a naaramid iti buok,* ken limmabbaga ti bulan a kas iti dara,+ 13 ket natnag ditoy daga dagiti bituen ti langit, a kas iti kayo a higos a ginunggon ti napigsa nga angin isu a naregreg dagiti naata a bungana. 14 Napukaw ti langit a kas iti pagbasaan a nalukot,+ ket naikkat ti tunggal bantay ken isla iti ayanda.+ 15 Dagiti ari ti daga, dagiti nangato nga opisial, dagiti komander ti militar, dagiti nabaknang, dagiti nabileg, tunggal adipen, ken tunggal siwayawaya a tao ket naglemmeng kadagiti kueba ken iti nagbabaetan dagiti dadakkel a bato ti bambantay.+ 16 Ket ibagbagada kadagiti bantay ken dadakkel a bato: “Tupakandakami+ ket ilemmengdakami iti rupa Daydiay situtugaw iti trono+ ken manipud iti pungtot ti Kordero,+ 17 ta dimtengen ti dakkel nga aldaw ti pungtotda,+ ket asino ti makalasat?”+