Maysa nga Apocalipsis ken Juan
13 Nagtakder dayta* iti kadaratan ti baybay.
Nakakitaak iti narungsot nga animal*+ a rumrumkuas iti baybay,+ a 10 ti sarana ken 7 ti ulona, ken adda korona iti tunggal sarana, ngem adda kadagiti ulona dagiti manglais a nagan. 2 Ti narungsot nga animal a nakitak ket kasla leopardo, ngem kasla saka ti oso dagiti sakana, ken kas iti ngiwat ti leon ti ngiwatna. Inted ti dragon+ iti animal ti pannakabalinna ken ti trono ken ti dakkel nga autoridadna.+
3 Nakitak a kasla nakaro ti pannakasugat ti maysa kadagiti ulona, ngem immimbag ti sugatna nga ipatayna koma.+ Nasdaaw ti amin a tattao iti daga ket simmurotda iti narungsot nga animal. 4 Nagdaydayawda iti dragon ta inikkanna iti autoridad ti narungsot nga animal. Nagdaydayawda met iti narungsot nga animal nga ibagbagada: “Asino ti kas iti narungsot nga animal, ken asino ti makabael a makigubat iti dayta?” 5 Naikkan dayta iti autoridad nga agpangas ken agsao iti dakes a bambanag maibusor iti Dios, ken naikkan iti autoridad a mangaramid kadagita iti 42 a bulan.+ 6 Nagsao iti bambanag a maibusor+ iti Dios tapno laisenna ti nagan ken pagnanaedan ti Dios, ken uray dagidiay agnanaed idiay langit.+ 7 Napalubosan a manggubat ken mangparmek kadagiti nasantuan,+ ken naikkan iti autoridad a mangituray iti tunggal tribu ken ili ken lengguahe ken nasion. 8 Agdaydayawto iti dayta ti amin nga agnanaed iti daga. Manipud idi panangrugi ti sangatauan, awan uray maysa kadagiti naganda ti naisurat iti lukot ti biag,+ a kukua ti Kordero a napapatay.+
9 No ti asinoman adda lapayagna, dumngeg koma.+ 10 No adda asinoman a masapul a maibalud, maibalud. No adda asinoman a mangpapatay iti espada,* masapul a mapapatay iti espada.+ Isu a kasapulan nga agibtur+ dagiti nasantuan+ ken maaddaanda iti pammati.+
11 Kalpasanna, nakakitaak iti sabali pay a narungsot nga animal a rumrummuar iti daga. Dua ti sarana a kas iti kordero, ngem agsasao a kasla dragon.+ 12 Us-usarenna ti amin nga autoridad ti umuna a narungsot nga animal+ iti imatang dayta nga animal. Pilpilitenna ti daga ken dagiti agnanaed iti dayta nga agdaydayaw iti umuna a narungsot nga animal, a naimbagen ti sugat nga ipatayna koma.+ 13 Agar-aramid kadagiti nagpaiduma a pagilasinan iti imatang dagiti tattao, nga uray la adda apuy manipud langit a pinagtinnagna iti daga.
14 Al-allilawenna dagiti agnanaed iti daga, babaen kadagiti pagilasinan a naipalubos nga aramidenna iti imatang ti narungsot nga animal, bayat nga ibagbagana kadagiti agnanaed iti daga a mangaramidda iti estatua+ ti narungsot nga animal a nasugat iti espada ngem naimbagan.+ 15 Naipalubos nga ikkanna iti anges* ti estatua ti narungsot nga animal, tapno ti estatua ti narungsot nga animal ket makapagsao ken maibilinna a mapapatay ti amin a saan nga agdaydayaw iti estatua ti narungsot nga animal.
16 Pilitenna ti amin a tattao—dagiti nanumo ken natan-ok, nabaknang ken napanglaw, nawaya ken adipen—tapno mamarkaan ti kannawan nga imada wenno ti mugingda,+ 17 ken tapno awan ti mabalin a gumatang wenno aglako malaksid ti tao a namarkaan iti nagan+ ti narungsot nga animal wenno iti numero ti naganna.+ 18 Ammuen koma daydiay addaan pannakatarus ti numero ti narungsot nga animal, ta numero dayta ti tao; 666 ti numerona. Daydiay laeng masirib ti makaawat iti daytoy.+