Ti Kaiyulogan Dagiti Damdamag
“Kapeggadan a Banag”
Dagiti darum nga inyetnag dagiti pasiente a naakaala iti napeggad a sakit babaen iti panangiyalison iti dara pinataudda ti baro a tukad ti pannakaseknan kadagiti adu a banko ti dara. Idi ngalay ti 1989 nasurok ngem 300 a darum ti naireport a naiyetnag kontra kadagiti banko ti dara idiay Estados Unidos. Inako ni Gilbert Clark, a direktor ehekutibo ti American Association of Blood Banks, a “tarigagayan ti publiko ti naan-anay a natalged a dara,” ngem inaminna a daytoy ket saan a magarantisaran.
Umas-asping, ireport ti Parade Magazine a ni Dr. Charles Huggins admitirenna a ti dara “rebbeng a maibilang a di maliklikan a di natalged.” Dineskribirna ti dara kas “ti kapeggadan a banag nga us-usarentayo iti medisina.” Nanipud rugrugi ti 1989 ti bilang dagiti makaimpeksion a sakit a natakkuatan kadagiti banko ti dara ket ngimmato iti lima (HTLV-I, nainaig iti adult T-cell leukemia, syphilis, hepatitis B, AIDS, ken hepatitis C). Nupay kasta, sigun ken ni S. Gerald Sandler, autoridad iti American Red Cross, “kasla iti mabiit laeng a tiempo makasaraktayto manen iti karkarna a sakit a maiyakar babaen iti panangiyalison ti dara.” Agpapanpay ti kasta a makapapatay a potensial, agarup uppat a milion a taga Norte America ti manamnama nga umawat ti panangiyalison ti dara bayat ti 1990. Sigun iti kolumnista ti pagiwarnak a ni W. Gifford-Jones, ti problema a ta “malaksid kadagiti Saksi ni Jehova, kaaduan a pasiente saanda pulos a pagsasaritaan ti posibilidad ti panangiyalison ti dara.”
Kadagiti pinulpullon a tawen dagiti Saksi ni Jehova simamatalekda nga ‘immadayo manipud iti dara’ iti aniaman pormana kas ibilin ti Saot’ Dios idiay Aramid 15:28, 29; 21:25. Ti proteksion a naiyeg kadakuada manipud kadagiti mapagbutbutngan a sakit a maiyakar babaen iti panangiyalison ti dara ipakitana laeng ti kinaumiso ti panagtulnogda kadagiti linteg ni Jehova a Dios.
Agpukaw a Di Madmadlaw?
Ni Joachim Cardinal Meisner, maysa a kontrobersial a ladawan idi isut’ naipatugaw idi napan a Pebrero kas ti baro nga arsobispo iti Cologne, Alemania, nabiit pay a kinunana a ti kadaklan a pagbutbutnganna a ta ti iglesia nalabit nga iti maysa nga aldaw “agpukaw—ken nalabit di madmadlaw ti kagimongan.” Sigun iti Rheinische Post a pagiwarnak nga Aleman, ni Meisner kunana: “Maladingitan ti kararuak ta ti kagimongan matmatannan ti iglesia a kas di napateg.” Maysa a posible a rason, napaliiwna, a ta “saritaentayo unay maipapan iti daga ket bassit laeng ti maipapan iti langit, agsobsobra maipapan iti agdama ken nakabasbassit maipapan iti kina-agnanayon.”
Babaen iti pannakikaduada kadagiti politikal ken komersial nga elemento ti daga imbes nga agtalekda iti nailangitan a puersa a mangsolbar kadagiti problema ti lubong, pudno nga inlaksid dagiti relihion ti Kakristianuan ti panagkunada nga irepresentarda ti intereses ti Dios. Addaanto daytoy kadagiti serioso a bunga. Sigun iti Biblia, amin nga ulbod a relihion mapukawdanton iti mabiit—maysa a pasamak a saanto a di madmadlaw “dagiti ari ti daga” ken “dagiti agtagtagilako ditoy daga,” nga agsangitdanto kas resulta daytoy a pasamak. Gapuna, dagiti managayat iti kinalinteg masapul nga ipangagda dagitoy a sasao: “Rummuarkayo [iti ulbod a relihion] . . . tapno dikay mairaman kadagiti basolna, ken tapno saanyo nga awaten dagiti saplitna.”—Apocalipsis 18:4, 9, 11.
Ti Panagpatinggana Asidegen
“Panangpapatay ti estado” daytat’ panangdeskribir ti sumagmamano a pagiwarnak kadagiti panangpapatay nga insayangkat dagiti gobierno wenno organisasion a salsalaknibanda. Kinapudnona, idi 1988, ni Gerry O’Connel a pannakangiwat ti Amnesty International kunana: “adda ti panagraira ti panaglabsing iti kalintegan ti tao (human rights), a nagtultuloy idi 1989.” Innayonna pay: “Dagiti panagpapatay kas panaglabsing kadagiti sapasap a mabigbigbig a linteg naabotna ti kangatuan pay laeng.”
Sigun iti tinawen a report ti Amnesty, dagiti estatistika ket nakaam-amak: Bayat ti 1988 adda iti nagbaetan ti 50,000 ken 100,000 a tattao kadagiti 29 a nasion ti napapatay iti sidong ti di panangikankano ti Estado. Nairaman kadagitoy isu dagiti ubbing, lallakay/babbaket, ken babbai, a ti laeng basolda ket isut’ pannakaitimpuyogda iti politikal wenno etniko a minoridad wenno ti panagindeg kadagiti lugar a pagrikrikkiaran ti dua nga agkalaban a puersa. Dagiti responsable kadagita a panangpapatay iramanna dagiti death squads, rebolusionario, agilaklako iti maiparit a droga, ken dadduma a grupo a mangus-usar iti kinaranggas maipaay iti napolitikaan a ganuat. “Masansan a ti Estado a mismo aglemmeng iti likudan dagiti nagtagiarmas a grupo tapno a maikkat dagiti pisikal a kabusor ken naalas nga elemento,” kuna ti La Repubblica.
Ngarud, adda pakaigapuan a ti naipaltiing a Sao ni Jehova inyarigna ti natauan a gobierno iti “atap nga animal.” (Apocalipsis 13:2) Nupay kasta, dayta a napolitikaan ti pannakatignayna a kinarungsot saan a nga agtultuloy iti agnanayon. Kas kunaen ti Salmo 92:7: “Inton tumarubo dagiti nadangkes a kas iti ruot, ken no lumapsak dagiti amin nga agar-aramid ti kinadakes, isu daytan ti pannakadadaeldanto nga agnanayon.” Ti nailangitan a Pagarian ti Dios iti im-ima ni Jesu-Kristo, ti “Prinsipe ti Kappia,” aramidennanto daytoy.—Isaias 9:6; Daniel 2:44.