Ti Umuna a Cronicas
21 Kalpasanna, nagtignay ni Satanas* maibusor iti Israel ket inallukoyna ni David a mangbilang iti Israel.+ 2 Isu nga imbaga ni David ken ni Joab+ ken kadagiti panguluen dagiti umili: “Bilangenyo ti Israel manipud Beer-sheba agingga idiay Dan,+ ket ibagayo kaniak tapno maammuak ti bilangda.” 3 Ngem kinuna ni Joab: “Sapay koma ta mamin-100 a paaduen ni Jehova dagiti tattaona! Apo ari, saan kadi nga adipenmo amin ida? Apay a kayatmo nga aramiden daytoy? Apay a mangaramidka iti pakabasolan ti Israel?”
4 Ngem ti ari ti nasurot imbes a ni Joab. Isu a pimmanaw ni Joab ket dinaliasatna ti intero nga Israel, sa nagsubli idiay Jerusalem.+ 5 Inted ni Joab ken ni David ti bilang dagiti nairehistro nga umili. Agdagup ti intero nga Israel iti 1,100,000 a lallaki a nakaespada, ken ti Juda, 470,000 a lallaki a nakaespada.+ 6 Ngem saan a nairehistro ti Levi ken Benjamin,+ ta kagura ni Joab ti bilin ti ari.+
7 Saan a naragsakan iti daytoy ti pudno a Dios, isu nga inkeddengna a dusaen ti Israel. 8 Gapuna, imbaga ni David iti pudno a Dios: “Nadagsen a basol+ daytoy inaramidko. Pangngaasim ta pakawanem ti basol daytoy adipenmo,+ ta minamaag unay ti inaramidko.”+ 9 Nakisarita ni Jehova ken ni Gad,+ a mangibaga iti sirmata ken David, ket kinunana: 10 “Inka ibaga ken David, ‘Daytoy ti kinuna ni Jehova: “Ikkanka iti tallo a pagpilian. Piliem no ania ti aramidek kenka.”’” 11 Iti kasta, napan ni Gad ken ni David ket kinunana: “Daytoy ti imbaga ni Jehova, ‘Agpilika, 12 tallo a tawen a nakaro a bisin,+ wenno tallo a bulan nga itarayam dagiti kalabanmo bayat a nakaespadada a mangkamkamat kenka,+ wenno tallo nga aldaw a pannusa babaen ti espada ni Jehova, nga adda makapapatay a sakit iti daga+ ket ti anghel ni Jehova ti mangyeg iti dayta+ iti intero a teritoria ti Israel.’ Panunotem no ania ti ibagak iti Daydiay nangibaon kaniak.” 13 Insungbat ni David ken ni Gad: “Mariribukanak unay. Pangngaasim ta bay-annak a matnag iti ima ni Jehova, gapu iti nakadakdakkel nga asina;+ ngem dinak baybay-an a matnag iti ima ti tao.”+
14 Nangyeg ngarud ni Jehova iti makapapatay a sakit+ iti Israel, ket 70,000 a tattao ti natay.+ 15 Nangibaon ti pudno a Dios iti maysa nga anghel idiay Jerusalem a mangdadael iti dayta. Ngem idi nakita ni Jehova nga inrugin ti anghel ti mangdadael, naladingitan+ ket kinunana iti anghel: “Huston!+ Isardengmon.” Agtaktakder idi ti anghel ni Jehova iti asideg ti pagirikan ni Ornan+ a Jebuseo.+
16 Idi tumangad ni David, nakitana ti anghel ni Jehova a nakatakder iti nagbaetan ti daga ken langit a nakaturong ti espadana+ idiay Jerusalem. Dagus a nagruknoy ni David ken dagiti panglakayen,+ a nakabadoda iti nakersang a lupot.+ 17 Kinuna ni David iti pudno a Dios: “Saan aya a siak ti nagkuna a mabilang dagiti umili? Siak ti nakabasol,+ ken siak ti nakaaramid iti dakes. Ngem ania aya ti basol dagitoy a tattao?* O Jehova, pangngaasim ta siak ken ti pamilia ni amak ti dusaem; ngem saanmo a didigraen ti ilim.”+
18 Iti kasta, kinuna ti anghel ni Jehova ken ni Gad+ nga ibagana ken David a mangibangon iti maysa nga altar para ken Jehova iti pagirikan ni Ornan a Jebuseo.+ 19 Inaramid ni David ti imbaga ni Gad kas iti imbilin ni Jehova. 20 Kabayatanna, timmaliaw ni Ornan ket nakitana ti anghel, ket naglemmeng ti uppat nga annakna a kaduana. Madama idi nga agir-irik ni Ornan iti trigo. 21 Idi nakadanon sadiay ni David, nakita ni Ornan ket dagus a rimmuar iti pagirikan sa nagruknoy ken David. 22 Kinuna ni David ken ni Ornan: “Ilakom* kaniak ti disso nga ayan ti pagirikan, tapno mangibangonak iti altar para ken Jehova. Ilakom kaniak iti eksakto a presio, tapno agsardeng ti pannakadidigra dagiti umili.”+ 23 Ngem insungbat ni Ornan ken ni David: “Alaem lattan, apo ari, ket aramidem ti ammom a nasayaat. Mangtedak kadagiti baka a maidatag kas daton a mapuoran, pagirik a pasagad+ kas sungrod, ken trigo kas daton a bukbukel. Itedko amin dagitoy.”
24 Ngem kinuna ni Ari David ken ni Ornan: “Saan, masapul a gatangek iti eksakto a presiona, ta saanko nga alaen ti sanikuam ket itedko ken Jehova wenno mangipaayak kadagiti daton a mapuoran nga awan a pulos ti bayadak.”+ 25 Iti kasta, nangted ni David ken ni Ornan iti 600 a siklo* a balitok kas bayad dayta a disso. 26 Nangbangon sadiay ni David iti altar+ a para ken Jehova ket nangipaay kadagiti daton a mapuoran ken daton a pakikappia. Immawag ken Jehova, ket sinungbatanna babaen ti apuy+ manipud langit iti rabaw ti altar ti daton a mapuoran. 27 Kalpasanna, imbilin ni Jehova nga isubli ti anghel+ ti espadana iti kalubanna. 28 Idi nakita ni David a sinungbatan ni Jehova idiay pagirikan ni Ornan a Jebuseo, intuloyna ti nagdaton sadiay. 29 Nupay kasta, adda idi iti nangato a disso idiay Gibeon ti tabernakulo ni Jehova nga inaramid ni Moises idiay let-ang ken ti altar ti daton a mapuoran.+ 30 Ngem saan a nakapan sadiay ni David tapno makisarita iti Dios, ta mabuteng gapu iti espada ti anghel ni Jehova.