Ti Maikadua a Cronicas
14 Naginana ni Abias a kas kadagidi ammana, ket intabonda iti Siudad ni David.+ Ni Asa nga anakna ti simmaruno nga ari. Idi kaaldawanna, adda talna iti daga iti 10 a tawen.
2 Inaramid ni Asa ti naimbag ken umiso iti imatang ni Jehova a Diosna. 3 Inikkatna dagiti altar dagiti sabali a dios+ ken dagiti nangato a disso, rinebbana dagiti sagrado nga adigi,+ ken pinukanna dagiti sagrado a poste.*+ 4 Imbagana met iti Juda a sapulenda ni Jehova a Dios dagidi ammada ken tungpalenda ti Linteg ken dagiti bilin. 5 Gapuna, inikkatna dagiti nangato a disso ken dagiti altar ti insienso+ iti amin a siudad ti Juda, ket natalna ti pagarian bayat ti panagturayna. 6 Nangbangon kadagiti napaderan a siudad iti Juda,+ ta natalna idi ti daga ken awan ti nakigubat kenkuana kadagidi a tawen, gapu ta impaayan ni Jehova iti talna.+ 7 Kinunana iti Juda: “Bangonentayo dagitoy a siudad ket ikkantayo kadagiti pader ken torre,+ ruangan* ken trangka. Kukuatayo pay laeng ti daga, ta sinapultayo ni Jehova a Diostayo. Sinapultayo, ket impaayannatayo iti naan-anay a talna.” Iti kasta, naballigi ti panagibangonda.+
8 Addaan ni Asa iti armada a buklen ti 300,000 a lallaki manipud Juda, a nakaiggem iti dakkel a kalasag ken gayang. Adda met 280,000 a nabileg a mannakigubat manipud Benjamin a nakaiggem iti sarapa* ken bai.*+
9 Idi agangay, rimmaut kadakuada ni Zera nga Etiope a kaduana ti armadana a buklen ti 1,000,000 a lallaki ken 300 a karuahe.+ Idi nakadanon idiay Maresa,+ 10 simmabet kenkuana ni Asa ket nagpuestoda a makigubat iti Tanap ti Zefata idiay Maresa. 11 Gapuna, immawag ni Asa ken ni Jehova a Diosna+ ket kinunana: “O Jehova, awan nagdumaanna kenka nakapuy man wenno napigsa* dagiti tulongam.+ Tulongannakami, O Jehova a Diosmi, ta agtalekkami* kenka,+ ken makilabankami iti daytoy nga armada babaen ti naganmo.+ O Jehova, sika ti Diosmi. Saanmo koma nga ipalubos nga abakennaka dagiti tattao.”+
12 Iti kasta, inabak ni Jehova dagiti Etiope iti sanguanan ni Asa ken iti Juda, ket nagtataray dagiti Etiope.+ 13 Kinamat ida ni Asa ken dagiti tattaona agingga idiay Gerar,+ ket in-inut a napapatay dagiti Etiope agingga nga awan ti nabati kadakuada, ta inabak ida ni Jehova ken ti armadana. Nakaad-adu a banag ti innala dagiti lallaki ti Juda. 14 Ginubatda met ti amin a siudad iti aglawlaw ti Gerar, ta napalalo ti buteng dagitoy a siudad ken Jehova. Innalada dagiti sanikua ti amin a siudad, ta nagadu ti maalada kadagita. 15 Sinerrekda pay dagiti tolda dagiti agtartaraken iti animal, ket nakaad-adu ti naalada a karnero ken kamelio, sa nagsublida idiay Jerusalem.