Ti Maikadua a Cronicas
26 Kalpasanna, innala ti amin nga umili ti Juda ni Uzias,+ nga agtawen idi iti 16, ket pinagbalinda nga ari a kasukat ni amana nga Amazias.+ 2 Binangonna manen ti Elot+ ket insublina dayta iti Juda kalpasan a naginana ti ari* a kas kadagidi ammana.+ 3 Agtawen ni Uzias+ iti 16 idi nagbalin nga ari, ket nagturay idiay Jerusalem iti 52 a tawen. Ti nanangna ket ni Jecolias a taga-Jerusalem.+ 4 Inar-aramidna ti umiso iti imatang ni Jehova, kas iti inaramid ni Amazias nga amana.+ 5 Sinapsapulna ti Dios idi kaaldawan ni Zacarias, a nangisuro kenkuana nga agbuteng iti pudno a Dios. Bayat ti panangsapulna ken Jehova, binendisionan ti pudno a Dios.+
6 Napan nakigubat kadagiti Filisteo+ ket giniwanganna ti pader ti Gat,+ ti pader ti Jabne,+ ken ti pader ti Asdod.+ Kalpasanna, nangibangon kadagiti siudad iti teritoria ti Asdod ken iti teritoria dagiti Filisteo. 7 Intuloy ti pudno a Dios a tulongan a makigubat kadagiti Filisteo, kadagiti Arabiano+ nga agnanaed idi idiay Gurbaal, ken kadagiti Meunim. 8 Nangrugi a mangted dagiti Ammonita+ ken Uzias iti buis. Idi agangay, nagdinamag ni Uzias agingga idiay Egipto, ta nagbalin a nakabilbileg. 9 Nangbangon pay ni Uzias kadagiti nalagda a torre+ idiay Jerusalem iti abay ti Makinsuli a Ruangan,+ ti Ruangan ti Tanap,+ ken ti Suray. 10 Nangbangon met kadagiti torre+ idiay let-ang ken nangkali* iti adu a pagurnongan iti danum (ta nakaad-adu idi ti tarakenna); kasta met ti inaramidna idiay Sefela ken iti tanap.* Addaan idi kadagiti mannalon ken agay-aywan iti kaubasan kadagiti bantay ken idiay Carmelo, ta paggugustona ti agrikultura.
11 Addaan pay ni Uzias iti armada a nakasagana a makigubat. Naorganisarda iti nadumaduma a grupo no mapanda makigubat. Binilang ken inrehistro+ ida ni Jeiel a sekretario+ ken ni Maasias nga opisial, iti panangidaulo ni Hananias a maysa kadagiti prinsipe ti ari. 12 Agdagup iti 2,600 ti bilang ti ulo dagiti pamilia dagidi ammada a mangidadaulo kadagitoy a nabileg a mannakigubat. 13 Adda 307,500 a soldado iti babaenda a nakasagana a makigubat, ket nakabilbileg dayta nga armada a tumulong iti ari a makigubat kadagiti kabusor.+ 14 Inikkan ni Uzias ti amin a soldadona iti kalasag, gayang,+ helmet, kabal a nagsasaip,+ bai, ken bato ti pallatibong.+ 15 Nangaramid met idiay Jerusalem kadagiti makina a pakigubat a dinisenio dagiti inheniero. Naikabil dagita iti rabaw dagiti torre+ ken iti rabaw dagiti nagsulian ti pader kas pangibiat iti pana ken pangipuruak iti dadakkel a bato. Iti kasta, nagdindinamag ni Uzias iti adu a lugar, ta tinulongan ti Dios ken nagbalin a nabileg.
16 Ngem idi nabilegen, timmangsit ti pusona a dayta ti nakadadaelanna, ket saan a nagmatalek ken Jehova a Diosna ta simrek iti templo ni Jehova tapno agpuor iti insienso iti altar ti insienso.+ 17 Dagus a simrek met ni Azarias a padi agraman ti 80 a dadduma pay a natutured a papadi ni Jehova. 18 Tinubngarda ni Ari Uzias ket kinunada: “Saan nga umiso, Uzias, nga agpuorka iti insienso para ken Jehova!+ Dagiti laeng papadi ti rumbeng nga agpuor iti insienso, ta kaputotan ida ni Aaron+ ken napagbalinda a nasantuan. Rummuarka iti santuario, ta saanka a nagmatalek ket saannakanto nga ipadayag ni Jehova a Dios gapu iti daytoy.”
19 Ngem nakapungtot ni Uzias a nakaiggem idi iti paginsiensuan tapno agpuor iti insienso.+ Bayat ti panagpungtotna kadagiti papadi, nagkukutel+ ti mugingna iti sanguanan dagiti papadi iti balay ni Jehova iti abay ti altar ti insienso. 20 Idi kimmita kenkuana ni Azarias a panguluen a padi ken ti amin a papadi, nakitada nga agkukutelen ti mugingna! Gapuna, dagus nga inruarda ni Uzias, ken nagap-apura met a rimmuar, ta dinusa ni Jehova.
21 Nagtalinaed nga agkukutel ni Ari Uzias agingga iti aldaw ti ipapatayna. Nagnaed iti sabali a balay kas agkukutel,+ ta saanen a mapalubosan a mapan iti balay ni Jehova. Inaywanan ni Jotam nga anakna ti balay* ti ari, ket nagserbi kas ukom dagiti umili.+
22 Ti dadduma pay a pasamak iti pakasaritaan ni Uzias, manipud rugi agingga iti ngudona, ket insurat ni propeta Isaias+ nga anak ni Amoz. 23 Naginana ni Uzias ket intabonda a kas kadagidi ammana, ngem iti pagitaneman a kukua dagiti ari, ta kinunada: “Agkukutel.” Ni Jotam+ nga anakna ti simmaruno nga ari.