Ti Maikadua a Cronicas
21 Idi agangay, naginana ni Jehosafat a kas kadagidi ammana ket naitabon a kas kadakuada iti Siudad ni David. Ni Jehoram nga anakna ti simmaruno nga ari.+ 2 Dagiti kakabsatna nga annak ni Jehosafat ket da Azarias, Jehiel, Zacarias, Azarias, Miguel, ken Sefatias; dagitoy amin ti annak ni Ari Jehosafat ti Israel. 3 Inikkan ida ni amada iti adu a sagut a pirak ken balitok ken napateg a bambanag agraman dagiti napaderan a siudad idiay Juda;+ ngem intedna ti pagarian ken Jehoram,+ ta isu ti inauna.
4 Idi kontroladon ni Jehoram ti pagarian ni amana, pinabilegna ti saadna, a pinapatayna iti espada ti amin a kakabsatna,+ agraman ti sumagmamano a prinsipe ti Israel. 5 Agtawen ni Jehoram iti 32 idi nagbalin nga ari, ket nagturay iti walo a tawen idiay Jerusalem.+ 6 Tinuladna ti inaramid dagiti ari ti Israel,+ kas iti inaramid dagiti kameng ti sangakabbalayan ni Ahab, ta nagbalin nga asawana ti anak ni Ahab.+ Inar-aramidna ti dakes iti imatang ni Jehova. 7 Ngem saan a kayat ni Jehova a dadaelen ti sangakabbalayan ni David maigapu iti tulagna ken David,+ ta inkarina a kanayon nga ikkanna iti lampara kasta met dagiti annakna.+
8 Idi kaaldawanna, bimmusor ti Edom iti Juda+ sa nangipatugawda iti bukodda nga ari.+ 9 Iti kasta, napan idiay Edom ni Jehoram ken dagiti komanderna agraman ti amin a karuahena. Rimmaut bayat ti rabii ket inabakna dagiti Edomita a nangpalikmut kenkuana ken dagiti komander ti karuahe. 10 Ngem intultuloy ti Edom ti bimmusor iti Juda agingga ita nga aldaw. Bimmusor met kenkuana ti Libna+ iti daydi a tiempo ta pinanawanna ni Jehova a Dios dagidi ammana.+ 11 Nangaramid pay kadagiti nangato a disso+ iti kabambantayan ti Juda, tapno saan nga agmatalek iti Dios* dagiti agnanaed iti Jerusalem, ket inyaw-awanna ti Juda.
12 Idi agangay, naawatna ti surat ni propeta Elias,+ a nagkuna: “Daytoy ti kinuna ni Jehova a Dios ni David nga apongmo, ‘Saanka a nagna kadagiti dalan ni Jehosafat+ nga amam wenno kadagiti dalan ni Ari Asa+ ti Juda. 13 Ngem nagnaka iti dalan dagiti ari ti Israel+ ken insungsongmo ti Juda ken dagiti agnanaed iti Jerusalem a saan nga agmatalek iti Dios*+ a kas iti saan a panagmatalek ti sangakabbalayan ni Ahab.+ Pinapataymo pay dagiti mismo a kakabsatmo,+ ti sangakabbalayan ni amam, a nasaysayaat ngem sika. 14 Gapuna, didigraen ni Jehova ti ilim, dagiti annakmo, assawam, ken ti amin a sanikuam. 15 Agsagabakanto iti adu a sakit, a pakairamanan ti sakit iti bagis, agingga a rummuar dagiti bagismo gapu iti inaldaw a panagsakitna.’”
16 Kalpasanna, tinignay ni Jehova+ dagiti Filisteo*+ ken Arabo+ iti asideg dagiti Etiope tapno bumusorda ken Jehoram. 17 Iti kasta, rinautda ti Juda, ket sinerrekda dayta ken innalada ti amin a sanikua iti balay* ti ari,+ agraman dagiti annakna ken assawana; ni laeng Jehoahaz*+ nga inaudi nga anakna ti nabati kenkuana. 18 Kalpasanna, pinagsagaba ni Jehova iti saan a mapaimbag a sakit ti bagis.+ 19 Di nagbayag, kalpasan ti dua a tawen, rimmuar dagiti bagisna gapu iti sakitna, ket natay bayat ti nakaro a panagsagabana. Saan a nangaramid dagiti umili iti panagpuor para kenkuana a kas iti naaramid a panagpuor para kadagidi ammana.+ 20 Agtawen iti 32 idi nagbalin nga ari, ket nagturay iti walo a tawen idiay Jerusalem. Awan ti naladingitan iti ipapatayna. Intabonda iti Siudad ni David,+ ngem saan nga iti nakaitaneman dagiti ari.+