SURAT KADAGITI HEBREO

1 Idi un-unana, iti adu a gundaway ken adu a pamay-an, nakisarita ti Dios kadagidi ammatayo babaen kadagiti propeta.+ 2 Iti pagpatinggaan dagitoy nga aldaw, nakisarita kadatayo babaen ti maysa nga Anak,+ a dinutokanna nga agtawid iti amin a banag,+ ken babaen kenkuana, inaramidna dagiti sistema ti bambanag.*+ 3 Isu ti mangyanninaw iti dayag ti Dios+ ken ti eksakto a ladawan ti personalidadna,*+ ket tagtaginayonenna ti amin a banag babaen ti nabileg a saona. Ket kalpasan a dinalusannatayo kadagiti basoltayo,+ nagtugaw iti makannawan ti Kangatuan idiay langit.+ 4 Isu a nagbalin a nangatngato ngem kadagiti anghel,+ ta tinawidna ti maysa a nagan a natantan-ok ngem kadakuada.+

5 Kas pagarigan, asino kadagiti anghel ti nangibagaan ti Dios: “Sika ti anakko, nagbalinak nga amam ita nga aldaw”?+ Sana innayon: “Agbalinakto nga amana, ket agbalinto nga anakko”?+ 6 Ngem inton iyegna manen ti Inaunana+ ditoy daga, kunana: “Agruknoy* koma kenkuana ti amin nga anghel ti Dios.”

7 Imbagana pay maipapan kadagiti anghel: “Dagiti anghelmo ket pagbalinem nga espiritu. Dagiti ministrom*+ ket pagbalinem a gil-ayab ti apuy.”+ 8 Ngem kinunana maipapan iti Anak: “Ti Dios ti tronom+ iti agnanayon nga awan inggana. Ti setro ti Pagariam ket isu ti setro ti kinalinteg.* 9 Inayatmo ti kinalinteg, ket ginuram ti kinakillo. Isu a ti Dios a Diosmo binukbokanna ti ulom+ iti lana a namagbalin kenka a naragragsak ngem kadagiti kakaduam.”+ 10 Ken: “Idi un-unana, insaadmo dagiti pundasion ti daga, ken dagiti imam ti nangaramid iti langit. 11 Mapukawdanto, ngem agnanayonto nga addaka; madadaeldanto amin a kas iti bado. 12 Kupinemto ida a kas iti atiddog a lupot, ket masukatandanto a kas iti bado. Ngem saanka nga agbalbaliw ken dinto pulos agpatingga dagiti tawenmo.”+

13 Ngem asino kadagiti anghel ti nangibagaanna: “Agtugawka iti makannawanko agingga nga ikabilko dagiti kabusormo a pagbatayan dagiti sakam”?+ 14 Saan aya nga espirituda amin para iti nasantuan a panagserbi,*+ a naibaon tapno agserbida kadagidiay agtawid iti pannakaisalakan?

2 Isu a rumbeng nga ad-adda pay nga ipangagtayo dagiti bambanag a nangngegtayo+ tapno ditay pulos mayayus.+ 2 Ta no talaga a sigurado ti sao a naibaga babaen kadagiti anghel,+ ken adda pannusa ti tunggal basol ken kinasukir maitunos iti hustisia,+ 3 kasanotayto a makalisi no ditay ipateg ti kasta a naindaklan unay a pannakaisalakan?+ Ta ti Apotayo ti immuna a nangibaga iti dayta,+ ken pinatalgedan kadatayo dagiti nakangngeg kenkuana, 4 bayat a nakikadua ti Dios iti panangsaksida babaen kadagiti nakaskasdaaw a bambanag* ken nadumaduma a milagro+ ken ti panangibunongna iti nasantuan nga espiritu maitunos iti pagayatanna.+

5 Kas iti ikaskasabami, saan a dagiti anghel ti pagturayen ti Dios iti mapagnaedan a daga iti masanguanan.+ 6 Ngem iti maysa a lugar, adda idi saksi a nangibaga: “Ania koma ti tao tapno silalagipka kenkuana, wenno ti anak ti tao tapno aywanam isuna?+ 7 Pinagbalinmo a nababbaba bassit ngem kadagiti anghel; kinoronaam iti dayag ken dayaw, ket dinutokam nga agaywan kadagiti inaramidmo. 8 Impasakupmo kenkuana ti amin a banag.”+ Idi impasakup ti Dios ti amin a banag, awan ti dina impasakup kenkuana.+ Ngem ita, saantay pay a makita a naipasakup kenkuana ti amin a banag.+ 9 Nupay kasta, makitkitatayo ni Jesus, a napagbalin a nababbaba bassit ngem kadagiti anghel.+ Isu ket nakoronaanen iti dayag ken dayaw ta nagsagaba agingga ken patay,+ tapno babaen ti nagpaiduma a kinaimbag ti Dios, mapadasanna ti matay para iti amin a tattao.+

10 Amin a banag ket naadda tapno maipadayag ti Dios ken naaddada babaen kenkuana. Isu a tapno maipadayag ti adu nga annak,+ impalubosna nga agsagaba+ ti Kangrunaan nga Ahente tapno agbalin a naan-anay para iti pannakaisalakanda.+ 11 Ta maymaysa ti ama+ daydiay mangsansantipikar ken dagidiay masansantipikar,+ isu a saan a mabain a mangawag kadakuada iti kakabsat,+ 12 kas iti imbagana: “Ipakaammokto ti naganmo kadagiti kakabsatko; iti tengnga ti kongregasion idaydayawkanto babaen ti kanta.”+ 13 Imbagana pay: “Agtalekakto kenkuana.”+ Sana innayon: “Adtoy! Siak ken dagiti annak nga inted kaniak ni Jehova.”*+

14 Gapu ta “dagiti annak” ket tattao nga addaan iti dara ken lasag, isu ket nagbalin met a tao nga addaan iti dara ken lasag,+ tapno babaen ti ipapatayna, pukawenna ti Diablo+ nga addaan pannakabalin a mangyeg iti ipapatay,+ 15 ken tapno wayawayaanna ti amin a naadipen iti panagbutengda ken patay iti unos ti panagbiagda.+ 16 Ta saan a dagiti anghel ti talaga a tultulonganna no di ket ti kaputotan* ni Abraham.+ 17 Gapuna, masapul nga agbalin a kas kadagiti “kakabsatna” iti amin a banag,+ tapno agbalin a naasi ken matalek a nangato a padi iti panagserbi iti Dios. Iti kasta, maipaayna ti pakikappia a daton*+ para kadagiti basol dagiti tattao.+ 18 Kabaelanna a tulongan dagidiay masubsubok+ ta napadasanna met ti nagsagaba idi nasubok.+

3 Gapuna, nasantuan a kakabsat a naayaban* a mapan idiay langit,+ panunotenyo ti ulidan ni Jesus, a bigbigentayo* kas apostol ken nangato a padi.+ 2 Matalek iti Dios a nangdutok kenkuana+ a kas ken Moises a matalek met idi a nagserbi iti intero a balay ti Dios.+ 3 Ta isu* ket maikari iti ad-adu a dayag+ ngem ni Moises ta dakdakkel a dayaw ti maited iti nangibangon iti balay ngem iti balay a mismo. 4 Siempre, adda nangibangon iti tunggal balay, ngem ti nangibangon iti amin a banag ket ti Dios. 5 Matalek ni Moises kas agserserbi iti intero a balay ti Dios a mangiladawan* kadagiti bambanag a maipakaammo iti masanguanan, 6 ngem matalek ni Kristo kas anak+ a mangay-aywan iti balay ni amana. Datayo ti balay ti Dios,+ no la ket ta itultuloytayo ti agsao a situtured* ken pagtalinaedentayo ti namnama nga ipagpampannakkeltayo agingga iti panungpalan.

7 Dayta ti rason nga imbaga ti nasantuan nga espiritu,+ “Ita, no imdenganyo ti timekna, 8 diyo patangkenen ti pusoyo a kas idi pinagpungtotdak dagidi ammayo, idi aldaw a sinubokdak idiay let-ang.+ 9 Sinubok ken kinaritdak idiay dagidi ammayo uray no nakitada dagiti inaramidko iti 40 a tawen.+ 10 Isu a nakapungtotak iti daydi a henerasion ket kinunak: ‘Kanayon a nasukir ti pusoda kaniak, ken saanda a sinurot ti daldalanko.’ 11 Gapu iti ungetko, insapatak: ‘Saandanto a makikadua kaniak iti panaginanak.’”+

12 Agannadkayo, kakabsat, amangan no adda kadakayo ti umadayo iti sibibiag a Dios ket dumakes ti pusoyo ken mapukaw ti pammatiyo.+ 13 Ngem itultuloyyo ti agpipinnaregta iti kada aldaw, bayat nga adda tiempo a makuna “Ita nga aldaw,”+ tapno awan kadakayo ti allilawen ti pannakabalin ti basol ket ipatangkenyo ti kayatyo. 14 Ta kinapudnona, makiramantayo kadagiti pakipasetan ti Kristo no la ket ta agtultuloy ti panagtalektayo a kas iti impakitatayo idi damo.+ 15 Kas naibagan, “Ita, no imdenganyo ti timekna, diyo patangkenen ti pusoyo a kas idi pinagpungtotdak dagidi ammayo.”+

16 Ta siasino dagiti nakangngeg iti Dios ngem pinagpungtotda latta? Saan aya a ti amin nga inruar ni Moises idiay Egipto?+ 17 Siasino pay ti nagpungtotan ti Dios iti 40 a tawen?+ Saan aya a dagidiay nagbasol ket natayda idiay let-ang?+ 18 Ngem siasino ti nangisapataanna a saanda a makikadua kenkuana iti panaginanana? Saan aya a dagidiay nagsukir? 19 Maawatantayo ngarud a saanda a nakikadua kenkuana iti panaginanana gapu ta awan ti pammatida.+

4 Agtultuloy pay laeng ti kari ti Dios a mabalintayo ti makikadua kenkuana iti panaginanana. Agannadtayo* ngarud koma amangan no adda asinoman kadatayo a saan a maikari iti dayta.+ 2 Ta naipakaammo met kadatayo ti naimbag a damag+ a kas kadakuada. Ngem saanda a nagunggonaan iti sao a nangngegda, ta saanda a naaddaan iti pammati a kas kadagidiay dimngeg. 3 Ta datayo nga addaan iti pammati ket makikaduanto kenkuana iti panaginanana, kas iti imbagana: “Gapu iti ungetko, insapatak, ‘Saandanto a makikadua kaniak iti panaginanak,’”+ uray no nalpasen dagiti aramidna manipud panangrugi ti sangatauan.+ 4 Ta imbagana iti maysa a paset ti kasuratan maipapan iti maikapito nga aldaw: “Ket naginana ti Dios iti maikapito nga aldaw iti amin nga inaramidna,”+ 5 ken imbagana manen ditoy: “Saandanto a makikadua kaniak iti panaginanak.”+

6 Dagidiay damo a nakaipakaammuan ti naimbag a damag ket saanda a nakikadua kenkuana iti panaginanana gapu iti kinasukirda.+ Ngem mabalin pay laeng a makikadua ti dadduma kenkuana. 7 Gapuna, kalpasan ti nabayagen a panangibagana iti salmo ni David, inkeddengna manen ti maysa nga aldaw babaen ti panangibagana iti, “Ita”; kas iti nadakamaten, “Ita, no imdenganyo ti timekna, diyo patangkenen ti pusoyo.”+ 8 Ta no inturong ida ni Josue+ iti lugar a paginanaan, saan koman a nagsao ti Dios kalpasanna maipapan iti sabali nga aldaw. 9 No kasta, adda pay maysa a sabbath a panaginana para kadagiti tattao ti Dios.+ 10 Ta ti tao a nakikaduan iti panaginana ti Dios ket naginana metten kadagiti bukodna nga aramid, a kas iti Dios a naginana kadagiti bukodna nga aramid.+

11 Aramidentayo koma ngarud ti amin a kabaelantayo a makikadua iti dayta a panaginana, tapno awan ti asinoman a mangtulad iti kasta a kinasukir.+ 12 Ta ti sao ti Dios ket nabiag ken nabileg+ ken natadtadem ngem iti aniaman nga espada a dua ti tademna+ ken sumalput pay ketdi iti pagsinaan ti kararua* ken ti espiritu,* ken kadagiti susuop ken patatayo, ken maipakitana dagiti pampanunoten ken tarigagay ti pusotayo. 13 Ket awan ti parsua a mailemmeng iti imatang ti Dios,+ ngem amin a banag ket nalawag ken agdadata kadagiti mata daydiay mangukomto kadatayo sigun kadagiti aramidtayo.+

14 Addan idiay langit ni Jesus nga Anak ti Dios+ a naindaklan a nangato a paditayo. Itultuloytayo ngarud ti panangideklaratayo kenkuana iti publiko.+ 15 Ta maawatan ti nangato a paditayo dagiti pagkapuyantayo.+ Nasuboken iti amin a banag a kas kadatayo amin, ngem kaskasdi a saan a nagbasol.+ 16 Umasidegtayo ngarud iti trono ti nagpaiduma a kinaimbag ken siwayawaya nga agsaotayo iti panagkararagtayo+ tapno maawattayo ti asi ken magun-odantayo ti nagpaiduma a kinaimbag a makatulong kadatayo iti umiso a tiempo.

5 Ta tunggal nangato a padi a maala kadagiti tattao ket nadutokan nga agserbi iti Dios maigapu iti tattao,+ tapno mangted kadagiti sagut ken daton gapu kadagiti basol.+ 2 Kabaelanna ti makipagrikna kadagiti ignorante ken agbasbasol* ta adda met* pagkapuyanna. 3 Gapu iti dayta, masapul nga agdaton met para kadagiti basolna a kas iti aramidenna para kadagiti basol dagiti tattao.+

4 Awan ti tao a mangdutok iti bagina iti daytoy a dayaw, no di ket ti Dios laeng ti mangdutok kenkuana a kas iti inaramidna ken Aaron.+ 5 Saan met nga impadayag ti Kristo ti bagina+ babaen ti panagbalinna a nangato a padi, no di ket impadayag Daydiay nangibaga kenkuana: “Sika ti anakko, nagbalinak nga amam ita nga aldaw.”+ 6 Kas iti imbagana pay iti maysa a paset ti kasuratan: “Maysaka a padi iti agnanayon a kas ken Melkisedek.”+

7 Bayat ti panagbiag ni Kristo ditoy daga,* namin-adu a nagpakaasi ken nagkiddaw pay ketdi a napakuyogan iti napigsa a sangsangit ken lulua+ iti Daydiay makaisalakan kenkuana ken patay, ket naipangag gapu iti panagbutengna iti Dios. 8 Nupay isu ket Anak, nasursurona ti agtulnog gapu kadagiti sinagabana.+ 9 Kalpasan a napagbalin a perpekto,*+ isu ti nagbalin a pakaisalakanan iti agnanayon ti amin nga agtulnog kenkuana,+ 10 ta dinutokan ti Dios kas nangato a padi a kas ken Melkisedek.+

11 Nagadu ti maibagami maipapan kenkuana ngem narigat nga ilawlawag ta nagbalin a nakapuy ti pannakaawatyo.* 12 Ta nupay rumbeng a mannursurokayo koma itan,* kasapulanyo manen ti mangisuro kadakayo kadagiti pagdamdamuan a bambanag+ manipud kadagiti sagrado a mensahe ti Dios, ket kasapulanyo manen ti gatas imbes a natangken a makan. 13 Ta asinoman nga agtultuloy nga uminum iti gatas ket saanna nga ammo ti sao ti kinalinteg, ta ubing pay laeng.+ 14 Ngem ti natangken a makan ket para kadagiti nataengan a tattao, a gapu iti kanayon a panangusarda iti abilidadda nga agpanunot, nasursurodan nga ilasin ti umiso ken di umiso.

6 Gapuna, ita ta naammuantayon ti pagdamdamuan a doktrina+ maipapan iti Kristo, itultuloytayo ti rumang-ay iti kinanataengan.+ Ditay agsublin kadagiti pagdamdamuan a bambanag a kas iti panagbabawi kadagiti awan serserbina nga aramid ken pammati iti Dios, 2 ti sursuro maipapan kadagiti panangbautisar ken ti panangiparabaw kadagiti ima,+ ti panagungar dagiti natay+ ken agnanayon a pannakaukom. 3 Aramidentayto daytoy, no talaga nga ipalubos ti Dios.

4 Ta no maipapan kadagidiay nalawlawagan idin+ ken nakaawat iti awan bayadna a sagut manipud iti langit ken immawat iti nasantuan nga espiritu, 5 ken nangakseptar iti nasayaat a sao ti Dios ken kadagiti bendision* iti masanguanan a sistema ti bambanag,* 6 ngem timmallikudda,+ imposiblen a matulongan manen ida nga agbabawi pay, ta inlansada manen ti Anak ti Dios ken imbabainda iti publiko.+ 7 Ti masansan a tudo ket bendision ti Dios para iti daga tapno masibugan dayta ken agtubo dagiti mula para kadagidiay mangkultibar iti dayta. 8 Ngem no mangpataud kadagiti siit ken ruot, awan serserbina ken dandanin mailunod ket mapuoran inton agangay.

9 Ngem no maipapan kadakayo, patpatgek a kakabsat, kombinsidokami a nasaysayaat ti kasasaadyo ngem kadagiti timmallikud, ken adda dagiti ar-aramidenyo tapno isalakannakayo ti Dios. 10 Ta saan a nakillo ti Dios tapno lipatenna ti aramidyo ken ti ayat nga impakitayo iti naganna,+ babaen ti panagserbiyo ken agtultuloy a panagserbiyo kadagiti nasantuan. 11 Ngem kayatmi nga ipakita ti tunggal maysa kadakayo ti isu met laeng a kinagaget agingga iti panungpalan+ tapno naan-anay a makapagtalekkayo iti pannakatungpal ti namnamayo.+ 12 Saankayo nga agsadsadut+ no di ket tuladenyo dagidiay umawat kadagiti kari babaen ti pammati ken kinaanusda.

13 Idi nagkari ti Dios ken Abraham, pinatalgedanna dayta iti bagina ta awanen ti natantan-ok ngem isuna,+ 14 ket imbagana: “Sigurado a bendisionankanto ken paaduenkanto.”+ 15 Isu a kalpasan a nagan-anus ni Abraham, naawatna daytoy a kari. 16 Ta agsapata dagiti tattao iti natantan-ok ngem kadakuada. Ti sapatada ti mangpasardeng iti amin a riri, ta dayta a mismo ti legal a garantia a pudno ti ibagbagada.+ 17 Iti kastoy met la a pamay-an, idi inkeddeng ti Dios nga ipakita a nalawlawag kadagiti agtawid iti kari+ a saan nga agbalbaliw ti panggepna,* ginarantiaanna* dayta babaen ti sapata. 18 Saan nga agbalbaliw dagitoy dua a banag nga inaramid ti Dios ken imposible nga agulbod ti Dios.+ Dagitoy ti talaga a mangparegta kadatayo a nagkamang iti Dios tapno mapetpetantayo ti namnama nga adda iti sanguanantayo. 19 Adda kadatayo daytoy a namnama+ kas angkla ti kararuatayo,* sigurado ken natibker, ken daytoy ti mangiserrek kadatayo iti uneg ti kortina,+ 20 a simrekan nga immun-una ti nangisagana iti dalantayo, ni Jesus,+ a nagbalin a nangato a padi iti agnanayon a kas ken Melkisedek.+

7 Idi nagsubli ni Abraham a nangpapatay kadagiti ari, sinabat ni Melkisedek, nga ari ti Salem ken padi ti Kangatuan a Dios, ket binendisionanna ni Abraham.+ 2 Inted* kenkuana ni Abraham ti apagkapullo ti amin a napasublina. Umuna, naipatarus ti naganna kas “Ari ti Kinalinteg,” ken kalpasanna, ari ti Salem, kayatna a sawen, “Ari ti Talna.” 3 Gapu ta awan ti ama, ina, ken kapuonanna, ken awan met ti nangrugian ken nagpatinggaan ti biagna, no di ket naaramid a kas iti Anak ti Dios, isu ket agtultuloy a padi iti agnanayon.+

4 Talaga a naindaklan daytoy a tao, ta inikkan pay ni Abraham, ti ulo ti pamilia,* iti apagkapullo kadagiti kasayaatan a samsam.+ 5 Agpayso a sigun iti Linteg, naibilin kadagiti annak ni Levi+ nga agserbi kas padi a kolektaenda dagiti apagkapullo kadagiti tattao,+ kayatna a sawen, kadagiti kakabsatda, uray no kaputotan ida* ni Abraham. 6 Ngem daytoy a tao a saanna a natunton kadakuada ti kapuonanna ket nakaala kadagiti apagkapullo manipud ken Abraham ket binendisionanna daytoy a tao a nagkarian ti Dios.+ 7 Saan a mailibak a ti basbassit ket binendisionan daydiay dakdakkel. 8 Dagiti annak ni Levi ti immawat iti apagkapullo ket isuda dagiti tattao a matmatay. Ngem paneknekan ti Kasuratan nga agtultuloy a sibibiag ti sabali a tao nga immawat iti apagkapullo.+ 9 Ken mabalin nga ibaga nga uray ni Levi nga immawat kadagiti apagkapullo ket nangited met kadagiti apagkapullo babaen ken Abraham, 10 ta isu ket saan pay a nayanak a kas kaputotan* ni Abraham idi nagkita da Abraham ken Melkisedek.+

11 No ngarud magun-odan ti kinaperpekto babaen ti kinapadi iti kapuonan ni Levi,+ (ta karaman dayta iti Linteg a naited kadagiti tattao), apay a kasapulan pay laeng ti sabali a padi a kas ken Melkisedek+ ken saan a kas ken Aaron? 12 Gapu ta mabalbaliwan ti kinapadi, kasapulan met a mabalbaliwan ti Linteg.+ 13 Ta ti tao a matuktukoy maipapan kadagitoy a banag ket manipud iti sabali a tribu, nga awan ti nagakem kas padi iti altar.+ 14 Ta nalawag a nagtaud iti tribu ni Juda ti Apotayo,+ ngem awan ti imbaga ni Moises maipapan iti papadi nga aggapu iti dayta a tribu.

15 Nalawlawag pay daytoy ita ta addan ti padi+ a kas ken Melkisedek,+ 16 a ti panagbalinna a padi ket saan a babaen ti kualipikasion ti linteg a naibatay iti kapuonan ti tao no di ket babaen ti pannakabalin a mangted kenkuana iti biag a di madadael.+ 17 Kas pammaneknek, naibaga kenkuana: “Maysaka a padi iti agnanayon a kas ken Melkisedek.”+

18 Gapuna, nagpatingga ti dati a bilin gapu ta nakapuy ken saan nga epektibo.+ 19 Ta awan ti nagbalin a perpekto gapu iti Linteg,+ ngem adda nagbalin a perpekto gapu iti nayam-ammo a nasaysayaat a namnama,+ ket babaen dayta, makaasidegtayo iti Dios.+ 20 Maysa pay, gapu ta nagkari ti Dios idi dutokanna ni Jesus kas padi, 21 (ta adda dagiti lallaki a nagbalin a padi nga awan ti naisapata a kari kadakuada, ngem nagbalin ni Jesus a padi babaen ti kari nga insapata Daydiay nangibaga kenkuana: “Insapata ni Jehova* ket dina balbaliwan ti panunotna,* ‘Maysaka a padi iti agnanayon’”),+ 22 nagbalin ni Jesus kas garantia* ti nasaysayaat a tulag.+ 23 Kanayonanna, masukansukat dagiti agbalin a padi+ gapu ta matayda ket dida makapagtalinaed iti saadda, 24 ngem gapu ta sibibiag iti agnanayon,+ awan dagiti mangsukat iti kinapadina. 25 Isu a kabaelanna met a naan-anay nga isalakan dagidiay umasideg iti Dios babaen kenkuana, gapu ta agnanayon a sibibiag nga agpakaasi para kadakuada.+

26 Ta kasapulan nga addaantayo iti kasta a nangato a padi a napudno, awan basolna, nadalus,+ saan a kas kadagiti managbasol, ken naitan-ok a nangatngato ngem iti langit.+ 27 Saan a kas kadagidi nangato a padi, dina kasapulan ti inaldaw nga agdaton,+ umuna, para kadagiti basolna ken kalpasanna, para iti basol dagiti umili,+ ta naminsan laeng nga inaramidna dayta idi indatonna ti bagina.+ 28 Ta mangdutok ti Linteg iti lallaki nga addaan kadagiti pagkapuyan nga agbalin a nangato a padi,+ ngem ti sao a naisapata+ kalpasan ti Linteg ket mangdutok iti Anak a napagbalin a perpekto+ iti agnanayon.

8 Daytoy ti kangrunaan a punto iti ibagbagami: Addaantayo iti nangato a padi+ a nagtugaw iti makannawan ti trono ti Kangatuan idiay langit,+ 2 maysa a ministro* iti nasantuan a disso+ ken iti pudno a tolda nga imbangon ni Jehova,* saan a ti tao. 3 Ta nadutokan ti tunggal nangato a padi a mangidaton kadagiti sagut ken daton; isu a masapul met nga adda banag nga idaton ni Jesus.+ 4 No adda koma ditoy daga, saan a masapul nga agbalin a padi,+ ta addan dagiti papadi a mangipapaay kadagiti sagut sigun iti Linteg. 5 Dagitoy a tattao ket mangipapaay iti sagrado a panagserbi iti wagas a mangiladawan ken kas anniniwan+ ti nailangitan a bambanag;+ no kasano a ni Moises, idi dandaninan ibangon ti tolda, ket binilin ti Dios: Ta kunana: “Siguraduem a maaramid ti amin a banag a kapada ti disenio nga impakitak kenka iti bantay.”+ 6 Ngem nakaawat ni Jesus iti nasaysayaat a trabaho a panagserbi* ta isu met laeng ti mangibabaet+ iti nasaysayaat a tulag,+ a legal a napatalgedan babaen kadagiti nasaysayaat a kari.+

7 No awan ti pagkurangan ti umuna a tulag, saan koman a kasapulan ti maikadua.+ 8 Ta nakitana nga adda pagkurangan dagiti tattao idi imbagana: “‘Kitaenyo! Um-umayen dagiti aldaw,’ kuna ni Jehova,* ‘inton mangaramidak iti baro a tulag iti sangakabbalayan ti Israel ken iti sangakabbalayan ti Juda. 9 Saan a kas iti daydi tulag nga inaramidko kadagidi ammada idi kinibinko ida nga inruar idiay Egipto,+ gapu ta saanda nga intultuloy a sinurot ti tulagko, isu nga insardengko nga inaywanan ida,’ kuna ni Jehova.*

10 “‘Ta daytoy ti tulag nga aramidekto iti sangakabbalayan ti Israel kalpasan dagidiay nga aldaw,’ kuna ni Jehova.* ‘Ikabilkonto dagiti lintegko iti panunotda, ken isuratkonto dagita iti pusoda.+ Agbalinakto a Diosda, ket agbalindanto a tattaok.+

11 “‘Ket saandanton nga isuro iti tunggal kailian ken kabsatda, “Am-ammuenyo ni Jehova!”* ta am-ammodakton amin, nanumo man wenno natan-ok. 12 Ta pakawanekto dagiti dakes nga aramidda, ken diakton lagipen dagiti basolda.’”+

13 Idi nasaona ti “baro a tulag,” pinagpasona ti immuna a tulag.+ Isu a ti nagpaso ken dumadaan ket asidegen a mapukaw.+

9 Ti immuna a tulag ket addaan idi kadagiti paglintegan para iti sagrado a panagserbi ket ditoy daga ti nasantuan a dissona.+ 2 Naaramid ti umuna a paset ti tolda, a maawagan iti Nasantuan a Disso,+ nga ayan ti kandelero+ ken ti lamisaan ken dagiti daton a tinapay.*+ 3 Ngem iti likud ti maikadua a kortina+ ket isu ti paset ti tolda a maawagan iti Kasasantuan.+ 4 Adda ditoy ti balitok a paginsiensuan+ ken ti lakasa ti tulag+ a nakalupkopan iti balitok.+ Naikabil iti uneg ti lakasa ti pagkargaan a balitok a nakaidulinan ti manna,+ ti nagsabong a sarukod ni Aaron,+ ken dagiti tapi+ ti tulag; 5 ken iti rabawna, adda dagiti nadayag a kerubin a manglinong iti pakikappia a kalub.*+ Ngem saan nga ita ti tiempo a detalyado a maibaga kadakayo dagitoy a banag.

6 Kalpasan a naaramid dagitoy a banag, inaldaw a sumrek dagiti padi iti umuna a paset ti tolda tapno aramidenda dagiti sagrado a panagserbi;+ 7 ngem maminsan iti makatawen a sumrek ti nangato a padi nga is-isuna iti maikadua a paset ti tolda,+ ken masapul a mangitugot iti dara+ nga idatonna para iti pannakapakawan dagiti basolna+ ken dagiti saan nga inggagara a basol dagiti tattao.+ 8 Isu nga inlawlawag ti nasantuan nga espiritu a ti dalan nga agturong iti nasantuan a disso ket saan pay a naipakita bayat nga adda pay laeng ti umuna a tolda.+ 9 Daytoy a tolda ket panangiladawan iti agdama a tiempo.+ Maibatay iti daytoy nga urnos, maidaton dagiti sagut ken daton.+ Ngem saan a kabaelan dagita a pagbalinen a perpekto ti konsiensia ti tao a mangar-aramid iti sagrado a panagserbi.+ 10 Maipapan laeng dagita kadagiti makan ken mainum ken nadumaduma a seremonia ti panagdalus.*+ Dagita ti paglintegan mainaig iti bagi+ ken naipatungpal agingga iti umiso a tiempo a pannakailinteg dagiti bambanag.

11 Ngem idi immay ni Kristo kas nangato a padi tapno mangyeg kadagiti nasayaat a bambanag a mapaspasamaken, simrek iti napatpateg ken mas perpekto a tolda a saan nga inaramid dagiti ima, kayatna a sawen, saan a ditoy daga. 12 Simrek iti nasantuan a disso ngem saan a dara dagiti kalding ken urbon a kalakian a baka ti intugotna no di ket ti mismo a darana.+ Namimpinsan nga inaramidna dayta, ket naipaayna ti agnanayon a pannakaisalakantayo.*+ 13 Ta no dagiti naiwarsi a dara dagiti kalding ken kalakian a baka+ ken dagiti dapo ti maysa a kabaian a baka* ket madalusanda ti lasag dagiti narugitan,+ 14 saan aya a lallalo pay ti dara ti Kristo,+ a babaen ti agnanayon nga espiritu, indatonna iti Dios ti bagina nga awan pagkuranganna, a mangdalus iti konsiensiatayo kadagiti awan serserbina* nga aramid+ tapno makaipaaytayo iti sagrado a panagserbi iti sibibiag a Dios?+

15 Dayta ti rason nga isu ti mangibabaet iti maysa a baro a tulag.+ Nagbalin a kasta tapno dagidiay naayaban maawatda ti kari nga agnanayon a tawid.+ Nagbalin a posible amin dagitoy gapu iti ipapatayna, a babaen iti dayta, nasubbotda+ manipud kadagiti basolda iti immun-una a tulag. 16 Ta no adda pannakitulag iti Dios, masapul a matay ti tao a mangibabaet iti dayta. 17 Agbalin a legal ti tulag no matay ti mangibabaet ta awan ti bileg dayta bayat a sibibiag ti tao a mangibabaet. 18 Isu a ti immuna a tulag ket saan met a nairugi a naipatungpal no awan ti naibukbok a dara. 19 Ta idi naibagan ni Moises kadagiti tattao ti amin a bilin manipud iti Linteg, nangala iti dara dagiti urbon a kalakian a baka ken dara dagiti kalding sana linaokan iti danum. Nangusar iti nalabaga a lupot a delana a naigalut iti hisopo a pinangwarsina iti libro* ken iti amin a tattao, 20 ket imbagana: “Daytoy ti dara ti tulag nga imbilin ti Dios nga itultuloyyo nga aramiden.”+ 21 Ti tolda ken ti amin nga alikamen a maus-usar iti nasantuan a panagserbi* ket winarsianna met iti dara.+ 22 Wen, sigun iti Linteg, dandani amin a banag ket dalusan ti dara,+ ken no awan ti maibukbok a dara, saan a mapakawan ti basol.+

23 Gapuna, dagiti mangiladawan+ kadagiti bambanag idiay langit ket masapul a madalusan babaen ti dara dagiti daton nga animal.+ Ngem dagiti nailangitan a bambanag ket agkasapulan kadagiti daton a nasaysayaat nga amang ngem kadagiti animal. 24 Ta saan a simrek ni Kristo iti nasantuan a disso nga inaramid dagiti ima,+ a kapada ti agpaypayso,+ no di ket simrek idiay langit,+ tapno agparangen iti sanguanan* ti Dios para kadatayo.+ 25 Saanna nga inaramid daytoy tapno masansan nga idatonna ti bagina, a kas iti tinawen+ nga iseserrek ti nangato a padi iti nasantuan a disso a mangitugot iti saanna a dara. 26 Ta no kasta, masapul a masansan nga agrigat manipud panangrugi ti sangatauan. Ngem naminsan laengen a nagparang iti panungpalan dagiti sistema ti bambanag* tapno ikkatenna ti basol babaen ti panangidatonna iti bagina.+ 27 No kasano a maminsan laeng a matay ti tunggal tao sa maukom, 28 naminsan laeng met a naidaton ti Kristo tapno awitenna dagiti basol ti adu a tattao;+ ket iti maikadua a panagparangna, saan nga umay tapno ikkatenna ti basol, ket makitanto dagidiay sipapasnek a mangin-inanama kenkuana para iti pannakaisalakanda.+

10 Gapu ta ti Linteg ket anniniwan+ dagiti nasayaat a bambanag nga umay,+ ngem saan a dagiti mismo nga agpaypayso a bambanag, dayta* ken dagiti agtultuloy nga isu met la nga isu a maidaton iti tinawen pulos a saanda a mapagbalin a perpekto dagidiay agdaydayaw iti Dios.+ 2 Ta no dagiti daton ket mapagbalinda ida a perpekto, kasapulan pay aya nga agdaton dagidiay mangipapaay iti sagrado a panagserbi yantangay nadalusandan ken didan marikna nga agbasbasolda? 3 Imbes ketdi, tinawen nga ipalagip dagitoy a daton a managbasol dagiti tattao,+ 4 ta ti dara dagiti kalakian a baka ken kalding ket saanda a maikkat dagiti basol.

5 Isu nga idi immay ditoy lubong, imbagana: “‘Saanmo a kinayat ti sagut ken daton, ngem nangisaganaka iti maysa a bagi para kaniak. 6 Saanka a naragsakan kadagiti sibubukel a daton a mapuoran ken daton gapu iti basol.’+ 7 Ket kinunak: ‘Adtoy! Immayak (ti naisurat iti lukot* ket maipapan kaniak) tapno aramidek ti pagayatam, O Dios.’”+ 8 Imbagana nga umuna: “Saanmo a kinayat wenno saanka a naragsakan kadagiti sagut ken daton ken sibubukel a daton a mapuoran ken daton gapu iti basol”​—dagiti maidaton sigun iti Linteg​— 9 sana imbaga: “Adtoy! Immayak tapno aramidek ti pagayatam.”+ Inikkatna ti umuna tapno iyegna ti maikadua. 10 Babaen daytoy a “pagayatan,”+ nagbalintayon a nasantuan babaen ti namimpinsan a pannakaidaton ti bagi ni Jesu-Kristo.+

11 Kasta met, inaldaw a mangipaay dagiti padi iti nasantuan a panagserbi*+ ken masansan nga agdatonda iti isu met la a daton,+ a saan nga interamente a makaikkat kadagiti basol.+ 12 Ngem nangipaay daytoy a tao iti daton nga agnanayon a mangikkat kadagiti basol ken nagtugaw iti makannawan ti Dios.+ 13 Manipud idin, agur-uray agingga a maikabil dagiti kabusorna a pagbatayan dagiti sakana.+ 14 Ta babaen ti indatonna, dagidiay mapagbalin a nasantuan ket agbalin a perpekto+ iti agnanayon. 15 Kanayonanna, ti nasantuan nga espiritu ti mangipasigurado met kadatayo, ta imbaga dayta: 16 “‘Daytoy ti tulag nga aramidekto kadakuada kalpasan dagidiay nga aldaw,’ kuna ni Jehova.* ‘Ikabilkonto dagiti lintegko iti pusoda, ken isuratkonto dagita iti panunotda.’”+ 17 Sa imbaga dayta: “Ken diakton lagipen dagiti basolda ken dagiti dakes nga aramidda.”+ 18 No ngarud mapakawan dagitoy, saanen a kasapulan ti daton para iti basol.

19 Gapuna, kakabsat, yantangay naturedtayo* a sumrek iti nasantuan a disso+ babaen ti dara ni Jesus, 20 a linuktanna para kadatayo kas baro a dalan nga agturong iti biag, nga inaramidna daytoy babaen ti ilalasat iti kortina,+ kayatna a sawen, ti lasagna, 21 ken yantangay addaantayo iti naindaklan a padi iti balay ti Dios,+ 22 naimpusuan ngarud nga umasidegtayo nga addaan iti nabileg a pammati, gapu ta nawarsian ken nadalusan dagiti pusotayo manipud iti dakes a konsiensia+ ken nadigus ti bagitayo iti nadalus a danum.+ 23 Itultuloytayo nga ipakaammo iti publiko ti namnamatayo a ditay agduadua,+ ta matalek ti nagkari. 24 Ket agpipinnanunottayo* tapno matignaytayo* a mangipakita iti ayat ken nasayaat nga ar-aramid,+ 25 a ditay baybay-an ti panaggigimongtayo,+ kas iti nakayugalian ti dadduma, no di ket agpipinnaregtatayo,+ ken ad-adda pay nga aramidentayo amin dagita bayat a makitkitayo nga umas-asidegen ti aldaw.+

26 Ta no kanayon nga igagaratayo ti agbasol kalpasan nga inawattayon ti umiso a pannakaammo iti kinapudno,+ awanen ti aniaman pay a daton a makaikkat kadagiti basoltayo,+ 27 ngem sigurado nga adda nakabutbuteng a dusa ken pungtot a sumged a kas iti apuy a mangibus kadagiti bumusbusor.+ 28 Asinoman a di nangikankano iti Linteg ni Moises ket mapapatay a di makaasian gapu iti panagtestigo ti dua wenno tallo.+ 29 Panagkunayo, saan ngata a nakarkaro pay ti dusa a maipataw iti tao a nangipayatpayat iti Anak ti Dios ken nangibilang a bassit ti pateg ti dara ti tulag+ a namagbalin kenkuana a nasantuan, ken nanginsulto iti espiritu a pakakitaan iti nagpaiduma a kinaimbag ti Dios?+ 30 Ta ammotayo nga imbaga ti Dios: “Kukuak ti pammales; siakto ti agibales.” Ken manen: “Ukomento ni Jehova* ti ilina.”+ 31 Nakabutbuteng ti madusa kadagiti ima ti sibibiag a Dios.

32 Ngem itultuloyyo a lagipen dagidi aldaw a kalpasan a nalawlawagankayo,+ intultuloyyo nga inibturan ti adu a pakarigatan bayat a nagsagsagabakayo. 33 Adda idi tiempo a naipabuyakayo iti publiko* a maum-umsi ken maparparigat, ken adda met dagiti tiempo a kinaduayo* dagidiay naipasango iti kasta. 34 Ta nakipagriknakayo kadagiti naibalud ken siraragsak nga inakseptaryo ti pannakaagaw dagiti sanikuayo,+ ta ammoyo nga adda nasaysayaat ken agnanayon a tawidyo.+

35 Gapuna, itultuloyyo ti agsao a situtured,* ta addanto dakkel a gunggonayo.+ 36 Ta masapul nga agibturkayo,+ tapno kalpasan a naaramidyon ti pagayatan ti Dios, mabalinyon nga awaten ti kaitungpalan ti kari. 37 Ta “apagbiit laengen”+ ket “sigurado a sumangpet daydiay um-umay ken saan a mataktak.”+ 38 “Ngem agbiagto ti nalinteg nga adipenko gapu iti pammatina,”+ ken “no agsanud, saanak a maragsakan kenkuana.”+ 39 Saan ngarud a datayo ti klase dagiti tattao nga agsanud ket madadael,+ no di ket ti klase dagiti tattao nga addaan pammati tapno mataginayon ti biagtayo.*

11 Ti pammati ket panagtalek a sigurado a mapasamak ti namnamaen.+ Dayta ket nalawag a pammaneknek* a dagiti saan a makita ket talaga nga adda. 2 Gapu ta kasta ti pammati dagiti nagkauna a tattao,* impakita ti Dios a naragsakan kadakuada.

3 Gapu iti pammati, maawatantayo a dagiti sistema ti bambanag* ket nayurnos babaen ti sao ti Dios, tapno ti makita ket maadda manipud kadagiti banag a di makita.

4 Gapu iti pammati, nagdaton ni Abel iti Dios iti daton a napatpateg ngem iti daton ni Cain,+ ket babaen dayta a pammati, napaneknekan a nalinteg, ta ti sagutna ket inawat ti Dios*+ ken uray natay, agsasao pay laeng+ babaen ti pammatina.

5 Gapu iti pammati, nayalis ni Enoc+ tapno saan nga agsagaba iti ipapatayna, ket saanen a nasarakan ta inyalis ti Dios;+ ta sakbay a nayalis, napaneknekan a naan-anay a naparagsakna ti Dios. 6 Kanayonanna, imposible a naan-anay a maparagsak ti Dios no awan ti pammati. Ta ti asinoman nga umasideg iti Dios ket masapul a patienna nga adda Dios ken isu ti manggunggona kadagidiay napasnek a mangsapsapul kenkuana.+

7 Gapu iti pammati, impakita ni Noe+ ti panagbutengna iti Dios ken nangibangon iti daong+ a pakaisalakanan ti pamiliana kalpasan a naawatna ti pakdaar ti Dios maipapan kadagiti banag a saan pay a nakita.+ Babaen dayta a pammati, impakitana a maikari a madusa ti lubong,+ ket naideklara a nalinteg kas resulta ti pammatina.

8 Gapu iti pammati, nagtulnog ni Abraham+ idi naibaon a mapan iti lugar a tawidennanto; napan uray dina ammo ti papananna.+ 9 Gapu iti pammati, nagyan kas ganggannaet iti naikari a daga.+ Nagyan kadagiti tolda+ a kaduana da Isaac ken Jacob​—ti kakaduana nga agtawid iti isu met laeng a kari.+ 10 Ta ur-urayenna idi ti siudad nga addaan kadagiti agpaypayso a pundasion, a ti nangdisenio* ken nangibangon ket ti Dios.+

11 Gapu met iti pammati, ni Sara ket nagsikog* uray baketen,+ ta imbilangna a matalek* Daydiay nagkari. 12 Isu a manipud iti maysa a tao nga arigna natayen,+ nayanak dagiti annak+ a kas kaadu dagiti bituen iti langit ken di mabilang a kas kadagiti darat iti igid ti baybay.+

13 Aminda ket natay nga addaan pammati, nupay saanda a nagun-odan ti kaitungpalan dagiti kari.+ Ngem nakitada dagita iti adayo+ ken inawatda ken impakaammoda iti publiko nga estrangheroda ken temporarioda a residente iti daga. 14 Ta dagidiay mangibaga iti kasta a bambanag ipakpakitada a napasnekda a mangsapsapul iti bukodda a pagyanan. 15 Ngem no kanayon a pinampanunotda ti naggapuanda a lugar,+ adda koma gundawayda nga agsubli. 16 Ngem ita, il-iliwenda ti nasaysayaat a lugar, kayatna a sawen, ti maysa a lugar a mainaig iti langit. Isu a saan ida nga ibain ti Dios, nga inawaganda a Diosda,+ ta nangisagana iti siudad para kadakuada.+

17 Gapu iti pammati, idi nasubok ni Abraham,+ kasla naidatonnan ni Isaac. Nakaragragsak daytoy a tao nga immawat kadagiti kari ken nakasagana a mangidaton iti bugbugtong nga anakna+ 18 uray no naibaga kenkuana: “Agtaudto ken Isaac ti maawagan a kaputotam.”*+ 19 Ngem ammona a kabaelan ti Dios a pagungaren ni Isaac, ket naisubli kenkuana ti anakna ket nagserbi dayta kas ilustrasion.+

20 Gapu met iti pammati, binendisionan ni Isaac da Jacob+ ken Esau+ maipapan iti bambanag a mapasamak.

21 Gapu iti pammati, idi dandanin matay ni Jacob,+ binendisionanna dagiti annak ni Jose,+ ken nagdaydayaw iti Dios bayat a nakaiggem iti sarukodna.+

22 Gapu iti pammati, idi dandanin matay ni Jose, naibagana ti maipapan iti ipapanaw dagiti Israelita, ken nangted kadagiti instruksion* maipapan kadagiti tulangna.*+

23 Gapu iti pammati, ni Moises ket inlemmeng dagiti nagannakna iti tallo a bulan kalpasan a nayanak+ ta nakitada a naguapo+ ken saanda a nagbuteng iti bilin ti ari.+ 24 Gapu iti pammati, idi dimmakkelen ni Moises,+ saanna a kinayat ti maawagan iti anak ti balasang ni Faraon.+ 25 Pinilina ti mamaltrato a kadua ti ili ti Dios imbes a temporario nga agragsak iti basol. 26 Imbilangna ngamin ti pannakaumsi ti Kristo kas kinabaknang a dakdakkel ngem iti kinabaknang ti Egipto, ta sipapasnek idi a mangnamnama iti pannakaited ti gunggona. 27 Gapu iti pammati,+ pinanawanna ti Egipto, a saan a nagbuteng iti unget ti ari,+ ta nagtultuloy a natibker a kasla kitkitaenna daydiay Maysa a di makita.+ 28 Gapu iti pammati, sinelebraranna ti Paskua ken ti pannakaiwarsi ti dara, tapno dagiti inauna nga annakda ket saan a papatayen* ti mangdadael.+

29 Gapu iti pammati, binallasiwda ti Nalabaga a Baybay a kasla namaga a daga,+ ngem idi ballasiwen dagiti Egipcio, linemmes ida ti baybay.+

30 Gapu iti pammati, narba ti pader ti Jerico kalpasan ti pito nga aldaw a panagmartsa dagiti tattao iti aglawlawna.+ 31 Gapu iti pammati, ti balangkantis a ni Rahab ket saan a nairaman idi nadadael dagiti nasukir, ta nasayaat ti panangpasangbayna kadagiti espia.+

32 Ken ania pay ti ibagak? Ta kurang ti oras no ituloyko pay nga iyestoria ti maipapan kada Gideon,+ Barak,+ Samson,+ Jefte,+ David,+ agraman ni Samuel+ ken ti dadduma a propeta. 33 Gapu iti pammati, inabakda dagiti pagarian,+ impakatda ti kinalinteg, inawatda dagiti kari,+ inapputda ti ngiwat dagiti leon,+ 34 iniddepda ti gumilgil-ayab nga apuy,+ nalisianda ti tadem ti espada,+ pimmigsada nupay nakapuyda,+ timmuredda a makigubat,+ inabakda dagiti rimmaut nga armada.+ 35 Sinabat dagiti babbai dagiti napagungar a minatayda.+ Ngem naparparigat ti dadduma a lallaki ta dida kinayat ti mawayawayaan babaen ti aniaman a pangsubbot, tapno magun-odanda ti nasaysayaat a panagungar. 36 Wen, nasubok ti pammati ti dadduma babaen ti pannakauy-uyaw ken pannakasapsaplit, ken nakarkaro pay, babaen ti pannakakawar+ ken pannakaibalud.+ 37 Nauborda,+ nasubokda, naragadida,* napapatayda iti espada,+ ken nagbadoda kadagiti lalat ti karnero ken kalding.+ Kurang idi dagiti kasapulanda, naparparigatda,+ namalmaltratoda;+ 38 ken saan a maikari ti lubong kadagiti kas kadakuada. Naggigianda kadagiti desierto, bambantay, kueba,+ ken abut iti daga.

39 Ngem aminda dida naawat ti kaitungpalan ti kari, nupay nasayaat ti damag maipapan kadakuada gapu iti pammatida, 40 ta adda nasaksakbay a nakita ti Dios a nasaysayaat para kadatayo,+ tapno saanda a mapagbalin a perpekto nga umun-una ngem datayo.

12 No kasta, gapu ta addaantayo iti dakkel a grupo dagiti saksi a kas iti napuskol nga ulep iti aglikmuttayo, ikkatentayo met ti tunggal dadagsen ken ti basol a nalaka a mangisagud kadatayo.+ Agibturtayo a mangtaray iti lumba a naikabil iti sanguanantayo,+ 2 bayat nga isentrotayo ti panagkitatayo ken Jesus, ti Kangrunaan nga Ahente ken Manangan-anay iti pammatitayo.+ Gapu iti rag-o a naikabil iti sangona, saan a nagbain a nangibtur iti kayo a pagtutuokan,* ket nagtugaw iti makannawan ti trono ti Dios.+ 3 Panunotenyo ngarud a naimbag daydiay nagibtur iti nasakit a sasao dagiti managbasol+ a pagdaksanda met laeng ti ar-aramidenda, tapno dikay koma mabannog ken sumuko.*+

4 Iti pananglabanyo iti dayta a basol, dikay pay pulos nakilaban agingga iti punto a naibukbok ti darayo. 5 Ket namimpinsan a nalipatanyo ti pammagbagana kadakayo kas annakna: “Anakko, saanmo a tagibassiten ti disiplina ni Jehova,* wenno saanka a sumuko no ilintegnaka. 6 Ta disiplinaen ni Jehova* dagidiay ay-ayatenna. Kinapudnona, usarenna ti baut a pangdisiplina* iti tunggal maysa nga awatenna kas anak.”+

7 Masapul nga agibturkayo kas paset ti pannakadisiplinayo.* Kas iti annak ti panangtrato ti Dios kadakayo.+ Ta asino nga ama ti saan a mangdisiplina iti anakna?+ 8 Ngem no saannakayo a disiplinaen a kas iti panangdisiplinana iti amin, saannakayo ngarud a pudpudno nga annak no di ket bastardokayo. 9 Kanayonanna, dinisiplinadatayo idi dagiti ammatayo ditoy daga,* ket rinaemtayo ida. Saan kadi a lallalo pay nga agpasakuptayo iti Ama ti naespirituan a biagtayo tapno agbiagtayo?+ 10 Ta dinisiplinadatayo dagiti nagannaktayo iti ababa a tiempo sigun iti imbilangda a nasayaat. Ngem ar-aramidenna dayta a pagsayaatantayo tapno agbalintayo a nasantuan a kas kenkuana.+ 11 Talaga nga awan ti disiplina a kasla makaparagsak iti agdama, no di ket nasakit.* Ngem kalpasanna, mangpataud iti talna a bunga ti kinalinteg kadagidiay nasanayen iti dayta.

12 Gapuna, papigsaenyo dagiti agkakapuy nga ima ken aglulupoy a tumeng,+ 13 ket itultuloyyo ti mangaramid kadagiti nalinteg a pagnaanyo,+ tapno saan koma a kumaro ti napilay a saka, no di ket umimbag. 14 Ikagumaanyo ti makikappia iti amin a tattao,+ ken pagbalinenyo a nasantuan ti panagbiagyo*+ ta no saan a kasta ti maysa a tao, dinanto makita ti Apo. 15 Agannadkayo tapno awan ti asinoman a di makagun-od iti nagpaiduma a kinaimbag ti Dios, tapno awan ti agtubo a makasabidong a ramut a mangpataud iti riribuk ket adu ti dadaelenna.+ 16 Agannadkayo met tapno awan koma kadakayo ti mangar-aramid iti seksual nga immoralidad* wenno asinoman a saan a mangap-apresiar iti sagrado a bambanag, a kas ken Esau a nangipadawat kadagiti kalinteganna kas inauna a kasukat ti maysa a pannangan.+ 17 Ta ammoyo a saanen a maikari idi kayatnan a tawiden ti bendision. Uray nagsangsangit+ tapno mabaliwanna ti panunot ni amana, napaay ti panangikagumaanna.*

18 Ta saanyo nga inasitgan ti banag a masagid+ ken mapupuoran,+ ken ti nangisit nga ulep ken ti kasta unay a sipnget ken bagyo,+ 19 ken ti napigsa nga uni ti trumpeta+ ken ti timek ti nagsao,+ nga idi mangngeg dagiti tattao, impakaasida nga awan koman ti ibagana pay kadakuada.+ 20 Ta mabutengda iti naibilin: “Uray no animal laeng ti mangbaddek iti bantay, masapul a maubor.”+ 21 Kasta met a nakabutbuteng unay ti nakitada isu nga imbaga ni Moises: “Mabutbutengak ken agpigpigergerak.”+ 22 Ngem inasitganyo ti Bantay Sion+ ken siudad ti sibibiag a Dios, ti nailangitan a Jerusalem,+ ken ti pinullo a ribu nga anghel 23 a naguummong,+ ken iti kongregasion dagiti inauna a naisuraten ti naganda idiay langit, ken iti Dios nga Ukom ti amin,+ ken iti naespirituan a biag+ dagiti nalinteg a napagbalin a perpekto,+ 24 ken ni Jesus a mangibabaet+ iti baro a tulag, ken ti naiwarsi a dara,+ a nasaysayaat ngem iti dara ni Abel.+

25 Agannadkayo amangan no diyo denggen* daydiay agsasao. Ta no saan a nakalisi dagidiay saan a dimngeg iti daydiay nangipakaammo iti pakdaar ti Dios ditoy daga, lallalo pay a ditay makalisi no tallikudantayo daydiay agsasao manipud langit!+ 26 Iti dayta a tiempo, nagunggon ti daga gapu iti timekna.+ Nupay kasta, inkarina: “Ngem maminsan pay a gunggonekto saan laeng a ti daga no di ket uray ti langit.”+ 27 Ipakita ti sasao a “maminsan pay” ti pannakaikkat ti bambanag a magunggon, ti bambanag a naaramiden, tapno agtalinaed ti bambanag a saan a magunggon. 28 Gapu ta awatentayo ti maysa a Pagarian a saan a magunggon, itultuloytayo koma nga awaten ti nagpaiduma a kinaimbag, a babaen iti dayta, makaipaaytayo iti makaay-ayo a sagrado a panagserbi iti Dios buyogen ti panagbuteng ken panagamak kenkuana. 29 Ta ti Diostayo ket kasla iti mangibus nga apuy.+

13 Itultuloyyo ti agiinnayat kas agkakabsat.+ 2 Diyo liplipatan ti kinamanagpadagus,*+ ta gapu iti dayta, saan a nadnadlaw ti dadduma nga anghel dagiti sinangailida.+ 3 Laglagipenyo dagiti nakabalud,*+ a kasla naibaludkayo a kaduada,+ ken uray dagidiay mamalmaltrato ta pasetnakayo met ti maymaysa a bagi.* 4 Ibilang koma ti amin a tattao a nadayaw ti panagasawa, ken saan koma a matulawan*+ ti pagiddaan ti agassawa, ta ukomento ti Dios dagiti agar-aramid iti seksual nga immoralidad* ken makikamkamalala.+ 5 Iti panagbiagyo, saanyo nga ayaten ti kuarta,+ no di ket kontentokayo koman kadagiti agdama a bambanag.+ Ta imbagana: “Saankanto a pulos panawan ken saankanto a pulos baybay-an.”+ 6 Iti kasta, naturedtayo a mangibaga: “Ni Jehova* ti tumultulong kaniak; saanakto nga agbuteng. Ania ti maaramidan kaniak ti tao?”+

7 Laglagipenyo dagidiay mangidadaulo kadakayo+ a mangibagbaga kadakayo iti sao ti Dios, ken bayat a pampanunotenyo ti resulta ti kababalinda, tuladenyo ti pammatida.+

8 Saan nga agbalbaliw ni Jesu-Kristo idi man kalman, ita, ken iti agnanayon.

9 Dikay agpaallilaw iti nadumaduma ken karkarna a sursuro. Ta nasaysayaat a ti nagpaiduma a kinaimbag ti mangpakired iti puso imbes a dagiti taraon,* a saan a makaipaay iti pagimbagan kadagidiay makumikom kadagita.+

10 Adda altartayo a saan a maipalubos a panganan dagiti mangipapaay iti sagrado a panagserbi iti tolda.+ 11 Ta mapuoran iti ruar ti kampo ti bagi dagiti animal a ti darada ket maipan iti nasantuan a disso nga idaton ti nangato a padi kas daton gapu iti basol.+ 12 Gapuna, nagsagaba met ni Jesus iti ruar ti ruangan ti siudad+ tapno mapagbalinna a nasantuan dagiti tattao babaen ti darana.+ 13 Mapantayo ngarud kenkuana iti ruar ti kampo. Ibturantayo ti pannakauyaw nga inibturanna,+ 14 ta awan ti permanente a siudadtayo ditoy, ngem padpadaanantayo daydiay umay.+ 15 Babaen ken Jesus, kanayon nga ipaaytayo iti Dios ti daton ti panangidaydayaw,+ kayatna a sawen, usarentayo ti ngiwattayo*+ a mangipakaammo iti naganna iti publiko.+ 16 Maysa pay, diyo liplipatan ti agaramid iti nasayaat ken ti mangibingay kadagiti bambanag nga adda kadakayo,+ ta maragsakan unay ti Dios kadagita a daton.+

17 Agtulnog ken agpasakupkayo+ kadagiti mangidadaulo kadakayo,+ ta kanayon nga ay-aywanandakayo ket manungsungbatdanto gapu iti dayta.+ No kasta ti aramidenyo, naragsakda ken dida agladingit a mangaramid iti trabahoda, tapno saan nga agresulta dayta iti pagdaksanyo.

18 Itultuloydakami nga ikararagan, ta agtalekkami a nadalus* ti konsiensiami, ken kayatmi ti agbiag a mapagtalkan iti amin a banag.+ 19 Ngem nangnangruna a paregtaenkayo nga agkararag tapno makaumayak koma manen kadakayo iti kabiitan a tiempo.

20 Pinagungar ti Dios ni Apotayo a Jesus, ti naindaklan a pastor+ dagiti karnero. Indatonna iti Dios ti dara a nangpatalged iti agnanayon a tulag. Ita, sapay koma ta ti Dios ti talna 21 ti tumulong kadakayo iti amin a nasayaat a banag a kasapulan tapno maaramidyo ti pagayatanna. Babaen ken Jesu-Kristo, tignayennatayo a mangaramid iti makaparagsak unay kenkuana. Maited koma iti Dios ti dayag iti agnanayon nga awan inggana. Amen.

22 Kakabsat, ipakaasik kadakayo nga anusanyo nga ipangag daytoy a pammaregta iti daytoy ababa a suratko kadakayo. 23 Kayatko a maammuanyo a nakaruaren iti pagbaludan ni kabsattayo a Timoteo. No umay iti mabiit, kumuyogakto kenkuana ket agkikitatayto.

24 Idanonyo ti pakomustak iti amin a mangidadaulo kadakayo ken iti amin a nasantuan. Ipaw-it met dagiti taga-Italia+ ti pakomustada kadakayo.

25 Maadda koma kadakayo amin ti nagpaiduma a kinaimbag.