Makikapkappiakayo Kadi iti Kaarrubayo?
AYATENYO ti kaarrubayo. Kasta ti maibaga kadatayo. Saan a kanayon a nalaka. Ti laeng basta panamagtalinaed iti kappia ket narigat. Ti musika a rock manipud iti apartment ti kaarrubayo gunggonenna dagiti didingyo. Dagiti annakda mangpataudda iti kasta unay nga ariwawa iti pasilio. Iti ruar iti kalsada, mabugbogkayo. Iti langsngan, dagiti tsuper bigla nga agsardengda iti sanguananyo—agbusinaka ket mapaltoganka! Panaglablabes? Kadagiti dadduma a luglugar, ngem saan a panaglablabes kadagiti dadakkel a siudad. Dagiti kabangibang ti siudad ken dagiti aw-away addaanda iti bukodda a parparikut a mamagbalin a narigat ti panangipakita iti ayat iti kaarruba.
Kaaduan kadagiti pakarigatan agtaud iti daytoy moderno a nangato ti teknolohiana a sistema dagiti bambanag. Rinibribo ti mapan kadagiti siudad a kakasla kadagiti panggagamaen nga adda iti maysa a bote. Dagiti managbiahe marurodda bayat ti panagbiaheda bayat ti oras ti panagap-apura. Dagiti agnanaed kadagiti probinsia agdardarasda a rummuar nga agririaw bayat a dagiti manok ti kaarrubada dadaelenda ti minuyonganda. Dagiti mannalon mapukawda ti amin a sanikuada bayat a dagiti dangaw a nairuamen kadagiti pestisidio dadaelenda dagiti mulmulada. Ket iti sadinoman dagiti industria ti mangipugso kadagiti makarugit a bambanag. Ti angin agbalinen a kolor kape, agtinnag ti acid rain, matay dagiti ikan kadagiti danaw, uray ti danum iti uneg ti daga masabidongan babaen kadagiti pagbasuraan ti makasabidong a kemikal. Madadael ti salun-at, mapukaw dagiti biag.
Kadagitoy ken kadagiti adu a dadduma pay a pamay-an, kumaro ti panagaburido iti biag dagiti minilion bayat a ti rikna magargari, a sisasaganan a makapungtot, ket masansan a maaramid ti kasta. Adu ti aglisi babaen ti pananglemmesda iti bagbagida kadagiti linalasag nga ar-aramid. Ti naagum a materialismo, dagiti sosial nga ar-aramid, dagiti pannakaulaw babaen iti droga, ti nalulok nga estilo ti panagbiag—aniaman a paglisian nga agturong iti me-ismo wenno panangipangpangruna iti bagi. Ti ayat iti bagi ti mangleppes iti ayat iti kaarruba bayat a ti lasag ti mapennek ket mabisinan ti espiritu.
Ket kadagiti saan unay a nabaknang a nasnasion, agpada a mabisinan ti lasag ken ti espiritu. Dagiti rebolusion dadaelenda dagiti umili, ti angol ti mangala kadagiti biagda, ti bisin agsaknap iti daga, mapukaw ti namnama, agari ti pannakaupay.
Saan, iti daytoy moderno a sistema dagiti bambanag saan a kanayon a nalaka ti agayat iti kaarrubam. Ngem pudno nga adda panagayat iti kaarruba, ket pudno nga adu ti mangtagiragsak iti pannkikappia iti kaarrubada.