Walo a Doliar ti Maysa a Pint
ITI librona a The Tarnished Door, ni John Crewdson sukimatenna ti tema iti panagadu dagiti immakar, legal ken saan a legal, a sumsumrek iti Estados Unidos, nangnangruna manipud Mexico. Iti dayta isut’ mangipaay met iti lawag iti gubuayan iti dara a sumrek kadagiti banko ti dara iti E.U.
Dineskribirna no kasano a ti Patrolia ti Beddeng iti E.U. natuntonna ti dadduma kadagiti saan a legal nga immakar idiay El Paso, Texas, babaen iti darada: “Ti damo a pagsardengan ti ‘patrolia iti siudad’ isu ti sentro ti plasma ti dara iti asideg dagiti rangtay, maysa kadagiti siam a sentro idiay South El Paso a gumatgatang iti dara manipud kadagiti bumalballasiw iti beddeng ti Mexico iti $8 iti maysa a pint—ti katupag ti maysa a nasayaaten a sueldo iti maysa nga aldaw idiay Juárez [idiay Mexico]—ket kalpasanna ilakona dayta iti $20 kadagiti ospital ken kadagiti laboratorio a pagsirarakan. Dagiti sentro ipakaammoda kadagiti pagawatanda a ti kanayon a mangidonar mabalin a makasapul iti $81 iti maysa a bulan, ket kadagiti adu idiay Juárez dagiti banko iti dara ti kakaisuna a pagsapulanda.
“Ni Williams [maysa nga opisial iti Patrolia iti Beddeng] ti masansan a makasarsarak kadagiti agidonar idiay sentro nga aggapgapu idiay Juárez a mamindua iti maysa a lawas iti adun a tawtawen tapno ilakoda ti darada.” Ti kalidad ti dara a sumsumrek kadagiti banko ti dara ngarud ti pugpugtuan ti siasinoman.
Para kadagiti Kristiano, a mangraem iti kinasagrado ti dara manipud iti panangmatmat ti Dios, daytoy a panangilako iti dara ket saan a maawat. Dagiti papangulo iti immuna a kongregasion Kristiano nagsurat: “Ta maipagarup a naimbag iti nasantuan nga espiritu ken dakami ti di mangipabaklay kadakayo iti dakdakkel nga awit ngem kadagitoy a banag a masapul, isu nga adaywanyo . . . ti dara . . . No agaluadkayo kadagitoy a banag, rumang-aykayto. Sapay koma ta naimbagkayo amin!”—Aramid 15:28, 29.