Manipud Managbasatayo

Apay nga Agtulnogkayo kadagiti Dadakkelyo?

Pagyamanan iti kasta unay iti artikuloyo nga “Agimtuod dagiti Agtutubo . . . Apay nga Agtulnogak ken ni Nanang ken Tatang?” (Enero 8, 1988) Itatta, kas kinuna ti Biblia, adda ti kasta unay a kinasukir dagiti agtutubo kadagiti nagannakda. (2 Timoteo 3:2) Iti artikuloyo, impaganetgetyo ti pannakasapul ti panagtulnog dagiti agtutubo kadagiti dadakkelda, ket nangipaaykayo iti nagsayaatan nga ulidan, ti ulidan ni Juan ken dagiti dua nga ubbing a babbai. Tarigagayak koma a tunggal agtutubo mabasada ken adalenda dayta nga artikulo ken surotenda ti kurso ti Biblia.

S. O., Nigeria

Petsa ti Guerra Sibil

Nabiit pay a nabasak ti artikulo a “Dakami dagiti Lilliput iti Tengnga dagiti Unano.” (Pebrero 8, 1988) Saan aya a pudno a ti Guerra Sibil nga Español ket napaglalabanan manipud 1861 agingga iti 1865? No pudno daytoy, kasla adda ti saan a pannakaitunos iti edad dagiti dua nga agkabsat a babbai. Kuna ti babai nga isut’ ubing pay laeng sumagmamano a tawen kalpasan ti Guerra Sibil nga Español, isu a mangikabil kadakuada nga addadan kadagiti edad a 100. Kaskasdi iti pagnguduan ti artikulo, kunaenda nga isuda ket 50 años wenno natataengan pay. Mailawlawagyo kadi daytoy?

L. M. K., Estados Unidos

Ti panangilawlawag ket ti Guerra Sibil nga Americano ket napasamak manipud 1861 agingga iti 1865. Ti Guerra Sibil nga Español ket manipud 1936 agingga iti 1939. No tuktukoyen ti Guerra Sibil nga Español iti artikulo, mabalin a nakatulong koma no inramanmi dagiti petsa.​—ED.

Namnama kadagiti Awan Pagtaenganna

Nupay no makomendaran unay a mangawiskayo iti atension kadagiti publikasionyo maipapan kadagiti parparikut “Dagiti Awan Pagtaenganna” (Marso 8, 1988), saan kadi a nasaysayaat ti panangsurot iti ulidan dagiti dadduma a relihiuso nga organisasion ket mangipaayda iti tulong? Sigurado a dagiti gamengyo ket mabalin a mabennat a mangipaay iti uray bassit laeng a pinansial a kontribusion. Ngem imbes nga agtignaykayo maipapan ití dayta, kankanayon nga itudoyo ti maysa a baro a sistema iti sidong ti panangituray ti Dios kas ti solusion daytoy ken dagiti dadduma nga ay-ay.

B. B., Pederal a Republika iti Alemania

Adu nga organisasion a relihiuso, managparabur, ken dagiti organisasion iti gobierno ti mangikagkagumaan a tumulong a mangsabet iti namaterialan a kasapulan dagiti awan ti pagtaenganna, ket daytoy makomendaran. Mammano ti tumultulong iti nasken a naespirituan a kasapulan iti sangatauan. Ikabilmi ti umuna a panangipaganetget iti pannakaikasaba ti naimbag a damag ti Pagarian ti Dios, kas imbilin ni Jesus idiay Mateo 24:14. Nasarakanmi a no dagiti tattao masursuroda ti agtalek iti iyegto ti Pagarian ti Dios, daytoy ti mangipaay kadakuada iti panggep iti biag ket matignayda a mangpadas a mangaywan kadagiti bagbagida ket kissayanda ti di umiso a panagusar kadagiti droga ken alkohol, isu a mangsayang iti salun-atda ken kadagiti gamengda wenno kinabaknangda. Saanna laeng a pasayaaten ti panagbiagda itan no di ket mangun-odanda iti namnama iti biag nga agnanayon iti maysa a paraiso a daga. Impaganetget ni Jesus ti kinapateg daytoy idi inadawna manipud iti Sao ti Dios: “Saan laeng a ti tinapay ti pagbiagto ti tao, no di ket ti isuamin a sao a rummuar iti ngiwat ni Jehova.” (Mateo 4:4) Kasta met, dagiti Saksi ni Jehova nalatakda a mangipapaay iti nasken a namaterialan a tulong kadagiti agkasapulan no panawen iti pannakasapulda ken panawen ti rigat, ket iti kasta mangipakita iti ulidan iti pudno a panagayat iti pada a tao kas imbalabala ti Marcos 12:29-31 ken Santiago 2:15-17. Ket ti tulong nga ipaaymi ti mapan a dagus ken direkta kadagiti agkasapulan, a saan a makiskissayan wenno maitantan babaen iti makapadagsen ken nangina nga administrasion.​—ED.