“Awan Pay a Pulos ti Ammok a Maysa a Nagulbod”
NI Mike nakaawat iti abiso a mangiparang iti bagina iti lokal a korte iti Brooklyn a maipaay iti panaglabsing iti panagparada. Ti laeng banag ket, nupay ti abiso addaan iti numero ti lisensiana, ammon ni Mike nga isut’ agtartrabaho idiay hedkuarters iti Watchtower iti oras a naibaga a panaglabsingna. Kasta met, dina pay ammo ti ayan ti kalye a naibaga a nakaiparadaan ti kotsena. Capuna inkeddengna ti agapelar gapu iti multa.
Idi imparangna ti bagina a nadalimanek ti panagkawkawesna idiay korte, intedna ti abiso iti klerk ti korte, maysa a nataenganen a lalaki a purawen ti buokna. Idin naawaganen ni Mike iti sanguanan ti hues ket naibaga nga agtugaw. Iti dayta a punto nagsao ti klerk ket inimtuodna ti hues: “Your honor, babaen laeng iti panangmatmatmo kenkuana, ammom kadi no ania ti relihion daytoy a tao?” Simmungbat ti hues, “Diak ammo . . . Isut’ maysa a Katoliko.” Nalabit isut’ naallilaw iti apelido ni Mike a Portuguese. Simmungbat ti klerk: “Saan. Babaen laeng ti panangmatmat kenkuana, maibagam nga isut’ maysa kadagiti Saksi ni Jehova. Kinapudnona, idi a simreken iti ruangan, ammokon nga isu ket Saksi, ket ti direksionna ti nangpatalged iti dayta!”
Ti nainggayyeman a hues ngarud rinugiannan ti nagsaludsod ken Mike maipapan kadagiti kinapudno iti abiso. Ti deskripsion katupagna ti kotse ni Mike malaksid iti maysa a detalye—ti modelo ti kotse. Iti dayta a punto kinuna ti klerk iti hues: “Imtuodem no ania a kita ti kotsena.” Gaput’ iggemna ti resibona iti rehistro, sidadayaw a sinungbatan ni Mike ti saludsod. Idi naabsuelton ti tiket gapu iti kinakurang ti pammaneknek, ti klerk iti korte impilitna manen ti nagsao.
Kinunana: “Your honor, kayatko nga ibaga iti imatangmo ken iti isuamin nga adda ditoy—Am-ammokon dagiti Saksi ni Jehova iti 30 a tawtawen, ket awan pay a pulos ti ammok a maysa a nagulbod. Idi imbagana a dayta ket saanna a tiket, namatiak kenkuana, ket daytoy ti mangpaneknek a dayta ket saanna a kotse. Pudno a raemek dagitoy a tattao. Naimbagda a tattao, ket kayatko dagiti tattao a mangibagbaga iti pudno.”
Kalpasanna intuloyna: “Adda laeng maysa a banag a diak anamongan—saan a gapu ta umisoak.” Ket idi timmaliaw ken ni Mike, kinunana: “Mabalin nga umisoka ket biddutak. Dayta isut’ pammatim iti panangiyalison iti dara.”
Simmungbat ni Mike: “No kayatmo, iyeganka kadagiti impormasion maipapan iti takdermi maipapan iti panangiyalison iti dara.” Nagkedked ti klerk iti naasi a pamay-an. Ngem maysa a babai kadagiti nagdengngeg ti nagsao: “Saan a nasayaat ti agpaiyalison iti dara. Makaalaka iti AIDS manipud kadakuada kadagitoy nga al-aldaw.” Tunggal maysa iti korte ti nagtung-ed wenno nangiyebkas iti iyaanamong—ket rimmuar ni Mike a siraragsak ken nabang-aran.