Ti Kinasingpet ti Nangiduma Met Kadakuada
NASENNAAYAN pay ti pusona idi makitana ti “parking ticket” nga adda iti babaen iti “windshield wiper” ti kotsena. Ti multa ket $25 (E.U.), ket maladingitan agsipud ta dayta di nainkalintegan. Awan met dagiti karatula a mangiparparit iti panagparada. Dakdakes pay a ta isut’ manipud iti adayo a lugar ket saanna a kabaelan ti agsubli manen iti dayta a siudad tapno iyapelar ti kasona. Gapuna rinetratona dayta a lugar a mangpaneknek nga awan dagiti pakdaar a nakapaskil iti uray sadino. Ket kas maysa kadagiti Saksi ni Jehova, dinawatna ti padana a Saksi nga agparang iti korte iti trapiko a maipaay kenkuana.
Adtoy ti report ti gayyemna no aniat’ napasamak idiay korte iti dayta nga agsapa:
“No maawaganka nga agparang iti sanguanan ti hues, masapul nga ibagam ti naganmo ken ti direksionmo. Kalpasanna pagsapataendaka a mangibaga iti pudno. Sakbay a pinagsapatadak, ti eskribiente ti korte a maysa a nataengan metten a lalaki, indawatna nga ulitek ti direksion ti kalye nga ayanko. Idi a kinunak, ‘124 Columbia Heights,’ nalawag a nabigbigna dayta a direksion nga isu iti yan ti sangalubongan a hedkuarters ti Watch Tower Society dagiti Saksi ni Jehova. Idi tumaliaw iti hues, kunana: ‘Awan pagsakitan ti ulom ditoy, Judge. Dagitoy a tattao nasayaatda. Saanda nga agulbod! Dida pulos agulbod! Dida mabalin ti agulbod! Di ipalubos dayta ti relihionda, ket salsalimetmetanda a siiistrikto dayta. Awan pay ammok nga asinoman kadagiti lallaki wenno uray dagiti babbai a kaduada a nagulbod. Nakasingsingpetda. Namin-adu a darasen a nakakitaak a nabalinanda koma a nalasatan ti ‘parking ticket’ babaen ti panangibaga iti bassit a kinaulbod, ngem saanda nga aramiden dayta.’
“Kalpasanna, timmaliaw kaniak, kunana, ‘Ammok a saanka nga agulbod agsipud ta ammom no siasino ti agpusipos idiay tanem no agulbodka?’ ‘Siasino daydiay?’ insaludsodko. ‘Ti Judge, ni Judge Rutherford [naminsan presidente iti Watch Tower Society],’ insungbatna. ‘Dati nga agip-ipanak ti sursurat kenkuana 47 años ti napalabasen. Ammok dagiti Saksi ni Jehova sakbay nga immaduda. Ti Judge pudno a naisalsalumina a lalaki!’
“Kalpasan amin daytoy, ti hues iti korte dina payen a nagaburiduan nga agsapataak. Indawatna nga idatagko ti kasok ket isu ti inaramidko. Ti sentensiana? ‘Awan basolna.’”
Dagiti Saksi ni Jehova ‘tartarigagayanda ti agbiag a sitatakneng kadagiti isuamin a bambanag.’ (Hebreo 13:18) Ket ti panangsalimetmetda iti kinasingpet wenno kinatakneng ket maysa kadagiti adu a wagas a nakaidumaanda iti lubong.