Ti Kinamanangngaasi Bang-aranna ti Saplit ti Bagio a Gilbert
BAYAT ti nasapa pay nga or-oras iti agsapa iti Setiembre 14, 1988, ti bagio a Gilbert limmasat iti igid ti baybay ti Caribbean iti Mexico. Limmasat dayta kadagiti estado iti Quintana Roo ken Yucatán. Idi maika-15 ken maika-16, dagiti makin-amianan nga estado iti Tamaulipas ken Nuevo León ti nabugbog ti angin. Iti dalanna, ti Gilbert adut’ dinadadaelna. Dagiti napipigsa nga angin ken tudtudo ti nangpataud iti nakaro a layus. Iti abagatan a daya, 50,000 a pamilia ti nabati nga awanan ti pagtaengan. Iti amianan, 30,000 ti nakapukaw iti biagda. Adda 250 a tattao a natay bayat ti ilalabas ti bagio iti dalanna a 1,600 kilometros.
Dagdagus, nagtignay ti sanga nga opisina dagiti Saksi ni Jehova. Iti Sabado, Setiembre 17, dagiti immuna a trak a napnapno kadagiti taraon, kawes, ken material a pagatep ket addadan iti dalanda a mapan iti Yucatán Peninsula. Dua a pannakabagi manipud iti sanga ti nagbiahe sadiay a mangsukimat iti kasasaad ken mangbuangay iti lokal a komite tapno agiwaras kadagiti tulong. Dagdagus, ad-adu pay a trak ti naibaon nga addaan iti taraon ken dagiti material a pagatep. Dagiti autoridad ti gobierno nagtignayda met a mangipaay iti maapresiar unay a tulong.
Ti immuna a simmangpet iti lugar, nupay kasta, isu dagiti impatulod dagiti Saksi ni Jehova idiay Mexico City. Daytoy ti nangipaay kadagiti Saksi ti dakkel unay a pannakaliwliwa ken rag-o. Malaksid kadagiti material a pagatep nga impatulod dagiti Saksi, awan ti magun-odan sadiay a lokal, ket awanto ti magun-odan iti nasurok a makabulan. Makaparagsak a makita no kasano ti kapartak ti pannakaibangon dagiti balbalay dagiti kakabsat. Ti lugar a pagdaydayawan dagiti Saksi ni Jehova iti Colony Yucatán isu ti immuna a patakder a naisubli ti atepna. Idiay Mérida ti patakder a nausar a maipaay kadagiti asamblea sirkito ken kumbension distrito dagiti Saksi ket interamente a napasag, ket dagdagus a naiyurnos ti pannakaibangon ti baro a lugar ti pagasembleaan.
Dakkel ti nadadael kadagiti estado iti Nuevo León ken Tamaulipas. Dagiti lokal a Saksi nakaawatda a dagdagus iti tulong babaen kadagiti komite a naibangon idiay Monterrey. Dagiti kangrunaan a muebles, kas kadagiti kama, lamisaan, tugtugaw, dalikan, ken dagiti paglutuan, ket naipaayda. Idiay Monterrey a mismo, 32 a pamilia dagiti Saksi ni Jehova ti nakapukaw iti isuamin a sanikuada, agraman dagiti pagtaenganda. Gapu iti iyaadanin ti ngangngani zero a temperatura iti panawen ti kalam-ekna, masapul nga adda maaramid a dagdagus.
Dua a Saksi, maysa ti arkitekto, ti immay a nag-eroplano manipud Mexico City. Nakipagkitada kadagiti panglakayen ken dagiti agbambaniaga a pannakabagi. Di nagbayag, naiyuswaten ti panagibangon a mangipaay iti pagtaengan para kadagiti 32 a pampamilia. Daytoy iramanna ti pananggatang iti sanikua ken dagiti alikamen a sigud a mangsangalen kadagiti kasapulan a pagtaengan. Idi ti taraon, kawes, ken dagiti kama ket dagdagus a naipaay kadagiti Saksi, naawis a naimbag dagiti kaarruba iti ayat ken kinamanagparabur nga impakita dagiti dadduma a Saksi kadagiti agkasapulan a kakabsatda. Anian nga ad-adda pay no makitada dagiti 32 a pampamilia nga umakaren kadagiti baro a dua-kuartona a pagtaenganda!
Daytoy ket gagangay iti sangalubongan a panagkakabsat dagiti Saksi ni Jehova. Saan laeng a dagiti Saksi idiay Mexico ti timmulong kadagiti materiales, panagtrabaho, ken kuarta a mangtulong kadagiti kakabsatda no di ket dagiti pay Saksi iti dadduma a paspaset ti lubong. Apaman a ti padamag iti TV impakitana ti panangdadael ti bagio a Gilbert, nangrugin a dimteng dagiti tulong idiay sangalubongan a hedkuarter dagiti Saksi ni Jehova idiay Brooklyn, Nueva York. Adtoy ti bassit laeng a pangarigan:
“Pangngaasiyo ta usarenyo daytoy bassit a kontribusion a mamagbalin a komportable kadagiti kakabsattayo a nagsagaba ti bagio. Kayatko ti tumulong ti ad-adu pay ngem pinatarimaanko ti makina ti kotse ti asawak iti daytoy a lawas. Padasek ti mangipatulod iti ad-adu pay no mabayadakton dagiti amin a babayadak iti sumaganad a sueldok.”
“Itulongmi daytoy kadagiti kakabsattayo iti nabagio a lugar. Tarigagayanmi a maammuanda ti ayat ken pannakaseknanmi kadakuada. Kas kinuna ni Pedro: ‘Adda koma kadakayo met laeng ti nasged nga ayat.’”—1 Peter 4:8.
“Kas bassit a kontribusion iti panangikagumaan a mangipaay iti tulong, pangngaasiyo ta awatenyo daytoy a tseke a $1,000. Kayatko ti mangipaay iti ad-adu pay, ngem tarigagayak nga iraman ti adda nga inted ni Jehova kaniak.”
“Pangngaasiyo ta awatenyo daytoy money order a $20. Kasapulak dagiti amin a tsekek ket diak makatulong agingga a nabigbigko a dadduma kadagiti kakabsattayo napukawda ti isuaminda.”
“Naisapit ti tseke a maipaay iti $25. Tarigagayanmi ti mangitulong iti daytoy iti pundo a maipaay iti didigra. Ti sagut ket bassit, ngem naimpusuan unay ti panagayatmi kadagiti kakabsat a babbai ken lallaki iti daytoy a lugar.”
Mapanunotyo kadi ti panangpabulod ken ni Jehova, ti makinkukua iti intero nga uniberso? Nupay kasta, kasta ti ar-aramiden dagiti tumultulong, ta kuna ti Proverbio 19:17: “Ti addaan kaasi kadagiti napanglaw pabuludanna ni Jehova, ket ti naimbag nga aramidna bayadannanto nga isubli kenkuana.”