Dua nga Aspeto ti Didigra
Babaen ti koresponsal ti Agriingkayo! idiay Mexico
DA Godofredo ken Gisela, maysa a pagassawaan a Saksi ni Jehova, ken ti babassit nga annakda ket adda iti uneg ti balayda a naaramid iti aspalto ken pressboard idi dinadael ti Bagyo a ni Pauline ti kosta ti Oaxaca, Mexico. Saggaysa a linikkiat ti angin dagiti pressboard. Kamaudiananna, idi balabala laengen ti nabati, naan-anay nga awanen ti balay ti pamilia.
Nupay ubbaubba ni Gisela ti walo-bulan a maladagada ken kumkumpet kenkuana ken ni Godofredo ti tallo pay nga annakda, inkagumaanda a sarakusoken ti napigsa nga angin iti nasurok a dua nga oras. Pasaray matumba ken matulatidda gapu iti kinapigsa ti bagyo. Nupay kasta, nakalasatda amin.
Idiay Acapulco, idi nakita ti maysa kadagiti Saksi ni Jehova nga agnagan Nelly nga adda danum a sumsumrek iti balayda, riniingna ti pamiliana. Nagbiit a ngimmato ti danum, ket ti kinapeggesna ti nanglipus ken Nelly, ngem isut’ inrukuas ti balasangna. Kimpetda iti rehas ti tawa ket awanen ti maaramidanda no di ti agbuya bayat nga immadalem ti danum agingga iti tengngedda. Kalpasanna, nangngegda ti timek ti maysa a lalaki nga umaw-awag kadakuada. Dayta ti kaarrubada; tinulonganna ida a makaruar ken inkamangna ida iti balayna. Manipud sadiay, maal-aliaw a nagbuyada bayat a naan-anay a dinungpar ti maysa a kotse ti balay nga ayanda sumagmamano a minuto sakbayna.
Idi malem ti Mierkoles, Oktubre 8, 1997, binagyo ni Pauline ti kosta iti estado ti Oaxaca babaen iti angin a 200 a kilometro iti kada oras. Kalpasanna, idi Huebes, Oktubre 9, bigbigat a dinadael ti bagyo ti estado ti Guererro, nangnangruna iti siudad ti Acapulco, a nakaigapuan ti aluyo nga aginggat’ 10 a metro ti kangatoda ken ti layus a nangyanud kadagiti balay, kotse, animal, ken tattao. Idi awanen ti bagyo, addada kurukor a nasurok a 10 a metro ti kaunegda iti dati nga ayan dagiti kalsada. Sigun iti periodiko a The News, impadamag ti Red Cross iti Mexico a mapattapatta a di kumurang nga 400 ti natay ken 20,000 agingga iti 25,000 ti naawanan iti balbalay iti dua nga estado. Ngem iti laksid daytoy a didigra, adda dagiti makapikapik a pannakaiparangarang ti Nakristianuan nga ayat.
Agtignay ti Ili ni Jehova
Apaman a nagwaras ti damag maipapan iti Bagyo a ni Pauline, nangrugin nga immawat ti sanga nga opisina dagiti Saksi ni Jehova idiay Mexico iti awag manipud kadagiti Saksi iti intero a pagilian a kayatda a maammuan no kasanoda a makatulong. Naitukon pay ti tulong manipud ballasiw taaw. Nabuangay a dagus ti maysa a komite ti saranay, ket naiwaras ti adu a tonelada a taraon, kawes, ken dadduma a masapsapul.
Kasta met a nagatang dagiti pagbangon a materiales, ken narugian a dagus ti pannakatarimaan ti 360 a balbalay ken sumagmamano a Kingdom Hall a naperdi wenno nadadael. Rinibu a Kristiano a kakabsat ti makumikom idi nga agdonar, mangklaseklase, mangyempake, mangibiahe, ken mangitulod kadagiti pangsaranay a masapsapul wenno mangtarimaan kadagiti dadael.
Nasdaaw unay ti sumagmamano a makinkukua kadagiti paggatangan iti inaramid dagiti Saksi ta uray la siaasi a nangidonarda iti taraon, materiales a pagbangon, ken dadduma pay a banag. Dadduma kadakuada ti naglako kadagiti masapsapul iti nalaka a presio. Natignay unay dagiti naapektaran a Saksi iti ayat a naipakita kadakuada, nangnangruna idi nabasada dagiti makaparegta a surat a nailukon kadagiti probision.
Daksanggasat ta natay gapu iti bagyo ni José Faustino—18 anyos a Saksi—ken tallo pay a tattao a makiad-adal iti Biblia kadagiti Saksi. Inapresiar dagiti kabagianda, nangnangruna dagiti nagannak ni José, dagiti kararag ken pammaregta ti kongregasion kadakuada.
Dagiti Sumagmamano a Nasayaat a Resulta
Kalpasan ti Bagyo a ni Pauline, adu a tattao ti nagkiddaw a mayadalanda iti Biblia, agraman di manamati a kakabagian dagiti Saksi, ket adu a kaarruba ti ad-addan a situtulok a dumngeg iti mangyeg-namnama a mensahe dagiti Saksi. Kasta met a nakipaset dagiti Saksi iti panangibunong iti saranay a taraon kadagiti adu. Iti maysa a kasasaad, idi dinamag ti maysa a Saksi ti maysa a lalaki no apay a pinilina dagiti Saksi ni Jehova a mangibunong iti taraon nga indonar ti kompaniana, kinuna ti lalaki: “Agsipud ta ammok nga organisado ken mapagpiarankayo. Maysa pay, talaga nga ammoyo no siasino ti kangrunaan a makasapul iti daytoy a tulong, ta ammoyo dagiti tattao iti teritoriayo.”
Bayat nga umad-adani ti panungpalan ken umad-adu dagiti didigra iti sangalubongan, kanayon a makaparegta a makita ti pannakayaplikar dagiti prinsipio ti Biblia, iti laksid ti rigat.
[Ladawan iti panid 26]
Tumultulong dagiti ubbing iti panagibangon manen
[Ladawan iti panid 27]
Dagiti Saksi nga agibangbangon iti baro a Kingdom Hall idiay Oaxaca kalpasan ti Bagyo a Pauline