Nakaskasdaaw a Saka
“TI TEKKA kumebkeb kadagiti saksakana ket adda kadagiti palasio dagiti ar-ari.” Kasta ti kunaen ti Proverbio 30:28. Dagiti saksakana ket kakasla im-ima, ngem makaaramidda kadagiti nakaskasdaaw a paglaingan a di mabalinan dagiti im-ima. Daytoy ket sabali manen a kaso iti panamarsua ni Jehova nga immun-una ngem ti imbento ti tao iti rinibribo a tawtawen—iti daytoy a kaso dagiti pangikapet a Velcro fabric a nasaknap a maus-usar itatta.
Dagiti bisita iti Mediteraneo masdaawda a makakita ti bassit a gagangay a tekka, ti Tarentola mauritanica, nga agkarayam kadagiti diding ken iti bubida, ken agkarayam pay kadagiti sarming a tawa. Naminsan naipagarup a ni Mr. Tekka aramidenna dayta babaen kadagiti suction cups nga adda iti sakana wenno uray pay pigket. Ngem saan a kasta ti kalaadna!
Ti libro a The Grand Design kunaenna iti panid 184: “Tunggal ramay ti tekka addaan ti ap-ap nga addaan iti guter-guteran a siksik. Iti mikroskopio makita a tunggal siksik addaan kadagiti ginasgasut a babassit, kakasla buok a tud-aw a maawagan setae. A kasla saan nga umdas daytoy, ti ad-adda pay a panangpadakkel ipakitana a tunggal sinaggaysa a setae ti addaan ti murdong a di nakapapati a nagbabassitan a ‘buok’ nga agingga iti 2000, nga addaan iti murdong a kasla platito. Daytoy ti mangipaay iti nakaskasdaaw a pakadagupan iti agarup 100 a milion a pagkapet.”
Minilmilion a mikroskopiko a kawit ti maikapet iti kababassitan a pagdumaan ti rabaw ti maysa a banag—uray pay dagiti adda iti sarming. Ti mekanismo ti pannakaibbet ken ti pannakaikapet manen dagiti kawit ket di nakapapati. Ti tekka pilkuenna dagiti murdong ti ramayna nga agpangato, isu a mangikkat iti pannakaikapetna manipud iti di panagpatas ti rabaw. No nakapilko pay laeng ti ramayna, iyaddangna ti sakana iti sabali ket ikebbengna ti ramay ti sakana. Kumpet manen dagiti kawit iti di agpatas a rabaw—kas ti panangikebbeng ti pusa iti kukona no umul-uli ti kayo.
Gapuna, ti bassit a tekka aramidenna ti paglainganna babaen iti nakaskasdaaw a sakana.
[Ladawan iti panid 31]
Ti palimed iti “Velcro” a saka ti tekka
[Credit Line]
Breck P Kent