Daytoy Kadi a Lubong Makalasatto?

Dayta a makakarit a saludsod ti paulo ti maysa a tract nga iwarwaras dagiti Saksi ni Jehova. Itay napan a tawen, immawat ti maysa nga agindeg idiay Washington, D.C., iti daytoy a tract ket kinunana nga isut’ naallukoy. Insuratna:

“Nabatad iti maysa nga agnanaed iti kabesera ti pagiliantayo a ti lubong talaga nga agpatingganton. Ti makin-amianan nga Irlandia, ti dati a Yugoslavia, dagiti dati a republika ti Union Soviet, paneknekanda amin ti kinalidem ken riribuk a mangsapsaplit ita iti lubong. Dagiti napusek a pagbaludan, dagiti baro a panagraira ti sarut ken black plague, pasingkedanda amin ti impaganetgetyo iti tract-yo.”

Kiniddaw ti lalaki: “Pangngaasiyo ta ipaayandak iti kanayonan nga impormasion maipapan iti naisangsangayan a kapanunotanyo, ken maysa a libre a panagadal iti Biblia iti pagtaengan nga ituktukonyo.”

Iturturong dagiti Saksi ni Jehova dagiti tattao iti ibagbaga ti Biblia a masakbayan ti sangatauan. No kayatyo ti maysa a kopia iti nadakamat iti ngato a tract wenno tarigagayanyo ti maysa a libre a panagadal ti Biblia iti pagtaenganyo, pangngaasiyo ta agsuratkayo iti Watch Tower, P.O. Box 2044, 1099 Manila wenno iti maitutop a direksion a nailista iti panid 5.