Nakastreken ti Pornograpia iti Kolehio
INTAMPOK ti “Matier & Ross Report” iti San Francisco Chronicle a Nobiembre 1, 1993, ti maysa a kontrobersial a klase nga ituktukon ti San Francisco State University. Idadauluan dayta ni Propesor John DeCecco iti asignatura maipapan iti seksualidad ti tao. Ti sumaganad ti komento da Matier ken Ross maipapan iti dayta:
“Anian a klase dayta. No kalikagumanyo ti maysa a naderrep a tallo a credit agpaay iti maysa a degree ti SFSU, kur-itanyo laeng dagiti erotiko (ken no dadduma umiso no iti politika) nga asignatura a nailista iti syllabus ti klase.”
Sa ilistan ti report ti masturbasion, transvestism, homoseksualidad ti lallaki, kinatomboy, pannakidenna iti animal, sadomasokismo, agraman dadduma pay. Dagiti lecture iti dadduma kadagitoy nga aramid iramanna dagiti videotape.
Dagitoy nga aramid ket mabalin a maidilig “kadagiti makarimon nga awid” a kagura ni Jehova, kas iti naibinsabinsa iti Mosaiko a linteg idiay Levitico kapitulo 18. Kalpasan ti panangkondenarna kadagiti incesto nga aramid, pannakikamalala, ken dadduma a panangpanuynoy iti sekso, kuna ti Le 18 bersikulo 22 ken 23: “Dikanto kaidda ti lalaki a kas ibilang a babai. Daytoy ti kinarimon. Ket dikanto kaidda ti uray ania nga animal a mulitam ti bagim kenkuana, kasta met ti siasinoman a babai dinto agyan iti sango ti maysa nga animal tapno makikaidda. Gampor daytoy.”
Ti panangaramid kadagitoy a banag a karimon ni Jehova ket agbunga iti panangkondenarna: “Dikay mulmulitan ti bagiyo iti uray ania kadagitoy nga aramid, ta amin kadagitoy namulitan dagiti nasnasion a yadayok iti sanguananyo. Ket ti daga namulitan, isu ti gapuna nga impasarungkarko ti kinadakesna idiay, ket ti daga isaruana dagiti agnaed kenkuana. Ta siasinoman a mangaramidto iti uray ania kadagitoy a kinarimon, dagiti met laeng mangaramid kadagitoy, maipusayto iti ilida.”—Levitico 18:24, 25, 29.
Maysa nga estudiante a mangal-ala iti kurso ti SFSU ti nangpadayaw ken DeCecco gapu iti “panangikkatna iti kadawyan a kapanunotan maipapan kadagiti imoral a tattao ken panangipakita a dagitoy a tattao ket kas iti dadduma met laeng.” Kas iti dadduma met laeng? Talaga ketdi a di nairaman ti kaaduan a tattao kadagiti seksual a kinalulok ti homoseksualidad, kinatomboy, ken sadomasokismo, wenno pannakidenna kadagiti animal. Aklonentayon a nakaro ti kinasaknap ti pannakarpuog ti moral iti kagimongan ita, ngem dagitoy nga aramid a naiparangarang iti daytoy a klase ti unibersidad ket nabatad a pornograpia iti sidong ti panagpammarang ti naganetget a panagadal ken panagsirarak.