Panangsalimetmet iti Edukasion iti Lugarna

TI MAYSA a nasigo nga artist ammona nga iladawan ti kinauneg ti maysa a banag. Dagiti detalye ti makinsango nabatbatadda ngem dagidiay makintengnga ken makinlikud. Umasping met dayta kadagiti ipangpangrunatayo iti biag. Dadduma ti rumbeng a maikkan iti ad-adda a panangipateg ngem dagiti dadduma.

Kinuna ni Jesu-Kristo: “Naragsak dagidiay sipapanunot iti naespirituan a kasapulanda, yantangay kukuada ti pagarian ti langlangit.” (Mateo 5:3) Gapuna, maibilang koma dagiti naespirituan a pagalagadan a kapapatgan. Maisupadi iti dayta, basbassit koma ti panangipateg kadagiti namaterialan a sanikua.

Kasanot’ kapateg ti edukasion no idilig kadagiti dadduma a banag iti biag? Pudno a saan a bassit laeng a banag dayta iti maysa a Kristiano. Gagangay a kasapulan ti sekular nga edukasion tapno maitungpal ti Nainkasuratan nga obligasion nga inted ni apostol Pablo: “No ti asinoman dina taraonan dagidiay bukodna, ken nangnangruna kadagidiay kameng ti sangakabbalayanna, pinaglikudanna ti pammati ket isu dakdakes ngem ti tao nga awanan pammati.” (1 Timoteo 5:8) Kasta met, ti komision nga inted ni Jesus kadagiti pasurotna, a mangaramid kadagiti adalan, “nga isursuroyo kadakuada a tungpalenda dagiti isuamin a bambanag nga imbilin[na],” sapulenna a ti maysa ‘manggun-od iti pannakaammo’ ket kalpasanna siiepektibo a suruanna dagiti sabsabali.​—Mateo 28:19, 20; Juan 17:3; Aramid 17:11; 1 Timoteo 4:13.

Kaskasdi, ti edukasion masapul a masalimetmetan iti lugarna. Saan koma a maituloy dayta tapno aglatak laeng gapu iti kinalaing idiay eskuelaan wenno tapno makagun-od kadagiti makaawis a degree. Agbanag iti pannakapaay no maipangpangruna ti edukasion. Ipapantayon, a nalabit mangipaay dayta kadagiti temporario a namaterialan a gunggona. Ngem kas kinuna ni masirib nga Ari Solomon: “Aramidem ti maysa a banag iti amin a kinasirib, ammo, ken laingmo ngem kalpasanna, ibatimto a tawiden ti tao a di nagbannog.”​—Eclesiastes 2:21, Today’s English Version.

Interesado dagiti Saksi ni Jehova iti edukasion, saan laeng a tapno agbalinda nga edukado, no di ket tapno maparang-ayda ti kinaepektiboda iti panagserbi iti Dios ken tapno masuportaranda ti bagida. Yantangay saan a pagbirukan ti ministerioda, adut’ agpannuray iti sekular a trabaho tapno makasapulda iti pagbiagda. Daytoy ket makaipaay a nangnangruna iti karit kadagiti amin-tiempo a ministro dagiti Saksi ni Jehova, a maawagan payunir. Masapul a taginayonenda ti nainget nga eskediol iti ministerio bayat nga agsapulda iti umdas a kasapulan agpaay iti bagbagida ken kadagiti pamiliada no naasawaandan.a​—Proverbio 10:4.

Kalpasan ti panangtingiting kadagiti nadumaduma a banag a nairaman, dadduma kadagiti Saksi ni Jehova pinilida ti mangala iti kanayonan nga edukasion. Siempre, masapul nga agannadda tapno masalimetmetan ti edukasion iti lugarna. Aniat’ nakatulong kadakuada a mangaramid itoy? “Sumagmamano a bambanag ti nangtulong kaniak,” kuna ti maysa nga agtutubo a taga Brazil a managan John. “Uray pay no agadalak iti rabii, diak linanganan dagiti Nakristianuan a gimong. Inlawlawagko met kadagiti kaeskuelaak nanipud pay laeng iti pangrugian ti klase a maysaak kadagiti Saksi ni Jehova.”

Ginundawayan ni Eric, a taga Brazil met laeng, ti pannakisarita kadagiti dadduma maipapan iti pammatina bayat ti panangitultuloyna iti edukasionna. “Imbilangko a naisangsangayan a teritoriak ti eskuelaan,” kunana. “Nabaelak ti nangikondukta kadagiti panagadal ti Biblia iti sumagmamano kadagiti mannursuro ken estudiante, a lima kadakuada ti nabautisaranen, dua kadakuada ti agserserbin kas panglakayen.”

Nagsubli a nageskuela iti paset-tiempo ni Richard tapno makagun-od iti degree iti drafting. “Ti panagadalko tinulongannak a makasarak iti trabaho tapno masuportarak ti bagik ken ti asawak,” kunana, “ngem daytat’ nangilukat met iti gundaway. Bayat ti panagbiahek a mapan kadagiti proyekto ti napartak a panagbangon kadagiti Kingdom Hall ken nakisarita kadagidiay a mangimatmaton, naammuak nga adda pakasapulan kadagiti draftsmen.b Maus-usar itan ti edukasionko iti nabunga a pamay-an kadagitoy a proyekto. Mainayon pay, inanamaenmi nga agassawa ti agserbinto kamaudiananna idiay sangalubongan a hedkuarter wenno iti maysa nga internasional a proyekto ti panagbangon dagiti Saksi ni Jehova.”

Maigiddan iti dayta, adu kadagiti Saksi ni Jehova ti nangsaranget iti karit a mangipaay ti kasapulanda ken ti pamiliada nga awan ti kanayonan a panagadal. “Suportarak ti bagik babaen ti panagtrabahok a katulongan iti balay iti dua nga aldaw iti linawas,” ilawlawag ni Mary. “Nakaskasdaaw ta, ad-adut’ mabirokak a kuarta iti kada oras ngem ti dadduma a tattao a pagtartrabahuak. Ngem matmatmatak ti trabahok kas maysa a pagsapulan. Tultulongannak daytoy a mangitultuloy iti trabahok a panagpayunir, ket diak a pagbabawyan ti pangngeddengko.”

Kasta met laeng ti marikna ni Steve. “Idi rinugiak ti nagpayunir,” kunana, “kinuna ti dadduma kaniak: ‘Anianto ti aramidem no mangasawaka ken maaddaanka iti pamilia? Addanto kadi umdas a masapulam a pagbiagmo?’ Kas nagbanaganna, nagtrabahoak iti adu a nadumaduma a kita ti trabaho ta nakagun-odak ti kapadasan iti adu a nagduduma a trabaho. Ita ta addan suportarak nga asawa, makitak nga ad-adu ti masapulak ngem ti dadduma a nagturpos iti kolehio nga agtartrabaho iti ahensia a pagtartrabahuak.”

Dagiti di manamati nga amma nalabit a kayatda a mangala dagiti ubbing pay nga annakda iti kanayonan nga edukasion, ket adda Nainkasuratan nga autoridadda a mangaramid itoy. Nupay kasta, kadagita a kaso, ken maitunos iti Mateo 6:33, mabalin a mangala dagiti agtutubo kadagiti kurso a makatulong kadakuada nga agbalin nga ad-adda nga epektibo iti panagserbi ken ni Jehova wenno mangipalubos pay kadakuada a makastrek iti amin-tiempo a ministerio kabayatan nga ages-eskuelada.

Ti Katan-okan nga Edukasion

Amin dagiti Saksi ni Jehova, aniaman ti naragpatda nga edukasion, adda nagpapadaanda. Bigbigenda a ti kapapatgan nga edukasion a magun-odan itatta ket agtaud iti Sao ti Dios, ti Biblia. Kuna ti Juan 17:3: “Daytoy kaipapananna ti agnanayon a biag, ti pananggun-odda iti pannakaammo maipapan kenka, ti maymaysa a pudno a Dios, ken iti daydiay imbaonmo, ni Jesu-Kristo.” Aniaman ti magun-odan ti maysa a Kristiano a sekular nga edukasion, masapul a maipangpangruna ti pananggun-od iti pannakaammo ken ni Jehova ken ti Anakna, ni Jesus.

Daytoy a padron ti sinurot dagiti immuna a Kristiano. Ni Manaen ket “nasursuruan a kadua ni Herodes nga agturay iti distrito,” ngem adda idi ken aktibo a kadua dagiti mammadto ken mannursuro iti kongregasion ti Antioquia. (Aramid 13:1) Kasta met, immawat ni Pablo iti maipadis itatta a maysa nga edukasion iti unibersidad. Kaskasdi, kalpasan a nagbalin a Kristiano, sinalimetmetanna ti pannakasanayna iti lugarna. Imbes nga inusarna dayta a mangpasiddaaw kadagiti dadduma, inusarna ti pannakaammona iti sosiolohia, linteg, ken historia tapno mangasaba kadagiti amin a kita ti tattao.​—Aramid 16:37-40; 22:3; 25:11, 12; 1 Corinto 9:19-23; Filipos 1:7.

Saan a nalatak dagiti umuna-siglo a Kristiano a nangnangruna gapu iti naragpatda nga edukasion. Adut’ “awan adalna ken gagangay [a tattao],” a di nasanay kadagiti rabiniko a pagadalan. Ngem di kaipapanan daytoy a saanda nga edukado. Maisupadi ketdi, nakabalan dagitoy a lallaki ken babbai a mangikalintegan iti pammatida​—maysa nga abilidad a mangpaneknek iti natibker nakaibasaranna a sursuro.​—Aramid 4:13.

Amin a Kristiano, ngarud, ket sipapasnek nga interesado iti edukasion. Maigiddan iti dayta, ikagkagumaanda a “siguraduen dagiti napatpateg a bambanag,” a salimetmetan ti edukasion​—ken aniaman a sabali nga aramid​—iti umiso a lugarda.​—Filipos 1:9, 10.

[Dagiti Footnote]

[Kahon iti panid 7]

Maikanatad a Rekomendasion

Makatawen sakbay ti panagturposna iti high school, nagpanunot a naimbag ni Matthew no kasano a masuportaranna ti bagina bayat ti panangitultuloyna iti karera[na] kas amin-tiempo a ministro dagiti Saksi ni Jehova. Kalpasan ti panangtingitingna iti banag a buyogen ti kararag, marikna ni Matthew ken dagiti nagannakna a ti kanayonan nga edukasion ket napateg iti pananggun-odna iti kalatna. Gapuna, nagaplikar agpaay iti maysa nga scholarship. Innayon pay ti mamalbalakad ni Matthew ti maysa rekomendasion a surat, a kunkunana:

“Iti napalabas a dua ket kagudua a tawen, pagragsakak ti panagbalinko a mamalbalakad ken gayyem ni Matt. Ni Matt ket maysa a tao a natibker ti pundasionna . . . Isut’ addaan iti napasnek ken nabileg a pammati, a naisinggalut iti pannakilangen ken tigtignayna.

“Bayat dagiti napalabas a tawen, agsansanayen ni Matthew nga agpaay iti ministerio. Saan nga agsueldo ti maysa a ministro iti relihionna. Talaga a daytat’ trabaho a mabuyogan iti ayat. Maysa nga agtutubo a saan nga agimbubukodan, nanakem ken nakonsiderasion ni Matt. Makatulong daytoy nga scholarship nga ap-aplikaranna a mangsuportar iti daytoy a tao a napasnek iti serbisio ti Dios tapno maitultuloyna ti panagsanayna ken ti boluntario a trabahona.

“No maipapan iti boluntario a trabaho ken ti panagserbi iti komunidad, nangaramiden ni Matt iti adu nga oras a panangasaba iti ruruangan iti ngudot’-lawas ken kalpasan iti panageskuela ken bayat ti kalgaw. Isut’ agtartrabaho iti las-ud ti komunidad ken kadagiti adu a nagduduma a tattao. Impakitan ni Matt ti abilidadna a mangidaulo ken ti kinasigona babaen ti panangikonduktana kadagiti panagadal ti Biblia agpadpada kadagiti agtutubo ken nataengan. . . . Maparegtana dagiti tattao ken matulonganna ida a manggun-od iti pudpudno a kabaelanda. Iti klase, nagkomento dagiti mannursuro a kanayon a nasayaat ti impluensiana. Idauluanna ti panagsasarita ti klase ket maysa a makabael a manangikalintegan. . . .

“Maysa kadagiti kasayaatan nga agtutubo ni Matt a pakaragsakak a balakadan. Isut’ pagay-ayat ken raraemen dagiti kapatadan ken mannursurona. Nakatantan-ok ti kinatarnawna.”

[Dagiti ladawan iti panid 9]

Interesado dagiti Saksi ni Jehova iti edukasion, nangnangruna tapno agbalin[da] nga ad-adda pay nga epektibo nga ad-adipen ti Dios