Dagiti Agtutubo Itatta—Nalaka a Mabiktima iti Satanismo?
AGSAKSAKNAPEN ti panagdayaw ken Satanas kadagiti agtutubo,” impadamag ti maysa a pagiwarnak iti pagsasao a Pinlandes idi Pebrero 27, 1993. Sigun iti impormasion a nagun-odan dagiti polis iti Tampere, Finland, iturturong dagiti kriminal a nairaman iti panaglako ti droga dagiti ubbing, ken nangruna dagiti babbai, iti panagdayaw ken Satanas. Iti adu a kaso, dagitoy a biktima ken baro a miembro ket ubbing nga ag-10 agingga iti 15 ti tawenda. Impadamag ti pagiwarnak a “nakasarak ti panagdayaw ken Satanas iti nadam-eg a daga kadagiti agtutubo itatta.”
“Ti kabaruan nga idadateng ti panagdayaw ken Satanas ket saan laeng a pagannayasan ti pagilian (idiay Finland),” impakdaar ti pagiwarnak. “Kas pagarigan, nabiit pay a namakdaar ti magasin ti Sud Africa a ti Johannesburg Star a ti panagdayaw ken Satanas ab-abbukayenna ti babaknang a puraw nga agtutubo iti pagilian.” Pudno unay, maysa a sangalubongan a pagam-amkan ti panagdayaw ken Satanas kadagiti nagannak agraman iti annak.
Kangrunaanna, sisisikap nga ikari ti Satanismo a bassit laeng ti sapulenda kenka ngem adut’ magunggonam. “Dayawem ti diablo; aramidem ti dakes nga ar-aramidna, ket kas supapak, itednanto ti kayatmo. Ket dayta ti makagapu no apay a makaay-ayo unay kadagiti agtutubo ti Satanismo,” inlawlawag ti magasin a ’Teen.
“Patiek ti naan-anay a panangsagrap iti biag,” kinuna ti maysa a tin-edyer a nangaklon nga isut’ miembro ti maysa a sataniko a grupo. “Dua a puersa ti makitak iti nakaparsuaan: naimbag ken dakes. Dagiti banag a mangparagsak kenka isu ti amin a bambanag a kunaen ti tattao a dakes. Dagiti basol agturongda iti emosional, pisikal ken mental a pannakapnek,” kinunana.
Idi napagsaludsodan ti maysa a detektib ti Denver, Colorado, E.U.A., nga eksperto iti sataniko a kulto, no apay a patienna a kasla nakalaklaka a maguyugoy dagiti tin-edyer iti Satanismo, isut’ simmungbat: “Diakto pulos a malipatan ti imbaga ti maysa a Satanista a tin-edyer. Kinunana, ‘Aniat’ gapu nga agbibiagtayo? Agbiagtayo itatta ket aramidentayo ti kaykayattayo. Awan ti masanguanan[tayo].’”
Inlawlawag ni Dr. Khalil Ahmad, direktor iti panagserbi kadagiti agtutubo idiay Nova Scotia Hospital idiay Dartmouth, Canada, ti kapanunotanna maipapan iti pangawis ti Satanismo. “Sapsapulen dagiti tin-edyer ti pakaragsakan. Dagiti nakapuy ti pakinakemna, a masansan dagiti di makabael, ti maawis iti [satanismo]. Ipariknana kadakuada nga addaanda iti pannakabalin.”
Intudo ti sabali pay a mabigbigbig a polis maipapan iti Satanismo, maysa a detektib ti San Francisco, ti parikut: “Di mangikankano a lugar ti lubongtayo. Ad-adda a maseknantayo iti bagbagitayo ngem iti maysa ken maysa. Agnanaedtayo iti naranggas, negatibo a kagimongan. Makita dagiti agtutubo dayta a kas kadawyan a pamay-an ti panagbiag ket kas banagna maawisda iti Satanismo.”
Kasanot’ kinakaron ti pannakairaman dagiti agtutubo itatta iti Satanismo? “Patpatayenen dagiti agtutubo ti bagbagida ken dagiti gagayyemda. Naaddaantayon iti parikut,” impakdaar ni Larry Jones, presidente iti Cult Crime Impact Network ken maysa a tiniente iti puersa ti polis iti Boise, Idaho, E.U.A. Kinuna ti sabali pay a polis, manipud iti estado ti Illinois, a siaannad a mangpalpaliiw iti panagandar ken irarang-ay ti Satanismo iti akemna a mamalbalakad a polis iti high school a 90 porsiento kadagiti agtutubo a mangay-ay-ayam iti panagdayaw iti diablo ti makiraman agsipud ta uso dayta, ngem 10 porsiento “ti maigamer iti Satanismo ket kumaro a kumaro ti pannakaigamerda.”
Adda maysa nga artikulo ti pagiwarnak ti eskuelaan, iti Brooklyn, Nueva York, ti School News Nationwide, Enero-Pebrero-Marso 1994, iti pasetna a “Relihion,” a napauluan ti “No Apay nga Awisen ti Satanismo Dagiti Tin-edyer.” Impadamagna: “Kalpasan a nagapa ti dua a barito idiay kapeteria ti eskuelaan, limmagto ti nangabak ket nangiparang iti nakaskasdaaw a saludo ti ima, maysa a gemgem a naipangato ti tammudo ken kikitna. Di maawatan ti mannursuro iti arte no apay nga adu kadagiti ubbing ti ag-drowing iti ladawan dagiti kakasla demonio a lallaki nga addaan iti ulo a kalding. Ket agkarapukaw dagiti libro maipapan iti okulto manipud iti libraria ti eskuelaan.
“Kinapudnona, pagang-angawan dagiti ubbing ti pannakabalin, ti mahika, ti misterio ti Satanismo. Kaaduanna, daytat’ nakaay-ayat ken pakaragsakan. Iti dadduma, dakes dayta—nakapapatay iti 17-años a ni Lloyd Gamble—a natay iti sataniko a pannakaidaton.
“Kalpasan ti ipapatay ni Lloyd ken ti pannakaaresto ti 15-años nga adingna a lalaki gapu iti panangpapatay, naawatanen dagiti nataengan iti Monroe county dagiti misterioso idi a senias: dagiti senias ti ima a ‘pagilasinan ti diablo,’ dagiti ladawan nga ulo ti kalding ken dagiti libro a mangsugsugsog iti kapanunotan dagiti tin-edyer, dagiti ritual ken orasion.”
Kasla di agpatpatingga dagiti report kadagiti di pay nagtin-edyer ken dagiti tin-edyer a mangpapatay kadagiti nagannakda ken dadduma a miembro ti pamiliada gapu iti panagdayaw ken Satanas. Papatayen ti dadduma nga ubbing dagiti padada nga ubbing babaen iti kasta nga ar-aramid. Kas kadagiti sataniko a nataengan, rangrangkayen ken papatayen ti ubbing dagiti ayup. Naidaton dagiti taraken ti pamilia iti altar dagiti sataniko a ritual. Saan nga umdas ti pagsuratan a mangsaklaw iti uray paset laeng a panangipadamag iti panangrangrangkay nga inaramiden dagiti ubbing a mamati iti relihion a panagdayaw iti Diablo.
Dagitoy kadi a pagarigan dagiti ubbing ket panangay-ay-ayam laeng iti Satanismo? Sumagmamano kadi ken bassit laeng dagidiay naigamer unayen iti panagdayaw iti Diablo? Saan la ketdi ti sungbat dagidiay a nangimbestigar kadagitoy a makiramraman iti okulto. Kinuna ni David Toma, dati a detektib a kameng ti grupo a mangparmek iti bisio a nagbalin a managpalawag a mangtigtignay kadagiti agtutubo, nga iti tunggal eskuelaan a nagpalawaganna, isaludsodna ti isu met laeng a saludsod, “Mano kadakayo nga ubbing ti makaam-ammo iti maysa wenno nakadamagen iti maysa a nairaman kadagiti Sataniko nga ar-aramid?” Pattapattaenna nga “aganay a kakatlo kadagiti estudiante ti mangitayag kadagiti imada.”
Sigun ken Shane Westhoelter, presidente iti National Information Network, 30 agingga iti 40 porsiento kadagiti estudiante ti high school ti nairaman iti dadduma a kita ti okulto. Mainayon iti dayta, kuna ni Westhoelter nga agingga iti 70 porsiento kadagiti amin a krimen nga inaramid dagiti tin-edyer a kurang pay a 17 ti tawenda ti tinignay ti pannakairaman iti okulto.
[Blurb iti panid 5]
Nakasarak ti panagdayaw ken Satanas iti nadam-eg a daga kadagiti agtutubo itatta