Dagiti Mensahero ti Talna Idiay Makindaya a Europa

NAKANGNGEG dagiti tuleng! Nawayawayaan dagiti balud! Dandani awanen ti aramiden dagiti polis! Ania ti sarsaritaenmi? Tuktukoyenmi ti napasamak iti nabiit pay a kombension internasional dagiti Saksi ni Jehova a naangay idiay Makindaya a Europa bayat ti Hulio ken Agosto idi napan a tawen.

Ti tema ti programa ket “Dagiti Mensahero ti Nadiosan a Talna,” ket adu a tattao ti nakakita a nupay adda riribuk a tinignay ti klero idiay Romania,a talaga nga adda talna dagiti Saksi ni Jehova a nagtaud iti pannakaammoda iti Dios ken ni Kristo Jesus.​—Isaias 26:2, 3; Filipos 4:7.

Naangay dagiti kombension idiay Prague, Czech Republic; Budapest, Hungary; Warsaw ken Lodz, Poland; Tallinn, Estonia; ken Brasov ken Cluj-Napoca, Romania.

Dagiti delegado a naggapu kadagiti adu a ganggannaet a daga timmabunoda kadagitoy a kombension ket nangipaayda iti pudno nga internasional a kasasaad dagiti okasion. Idiay Prague adda dakkel a grupo a naggapu idiay Alemania, Estados Unidos, Japan, ken Poland. Kinuna ti maysa a report a naggapu iti sanga nga opisina ti Watch Tower Society idiay Czech Republic: “Naparegtakami unay kadagiti adu a manangsalimetmet iti kinatarnawda a managdaydayaw ni Jehova a Dios a naggapu iti sabsabali a daga. Kas pagarigan, kaaduan kadagiti delegado a Hapones ti payunir, ket ti nadalus a panagkawkawesda ken kinadalimanekda ti nakadkadlaw a mangarkos iti lugarda iti istadium. Nadlawmi met ti kinabara dagiti delegado a taga Poland, ti kinamanagyaman dagiti kakabsat nga Slovak, ti kinamanagparabur dagiti Aleman, ken ti kinamanagayat dagiti Americano. Nagserbida amin a pakaadalanmi.”

Kasano nga inapektaran ti kombension dagiti kabbaro a nakikadua? Timmabuno ti maysa a 85-ti-edadna nga eskolar, autor, ken lingguista, agpapan pay agsagsagaba iti diabetes ken sakit ti saka. Nakipagad-adalen iti Biblia babaen iti tulong ti libro a Pannakaammo iti agarup innem a bulan. Bayat ti programa, ipampamaysana, saan a ti kasasaad ti lengguahe ken ti gramatika ti palawag, no di ket ti maysa a banag. “Daytat’ nakaskasdaaw!” kinunana. “Ti ayat ken konsiderasion iti ummongyo ad-adda a mangkombinsir ngem dagiti sasao.”​—Juan 13:34, 35; 1 Corinto 13:1-8.

Dagiti ganggannaet a bisita idiay Prague tinagiragsakda ti tiempo nga ibibisitada kadagiti historikal a lugar ken nangipaay iti di pormal a panangasaba iti amin a gundaway. Iti maysa a kastilio iti abagatan ti Prague, maysa nga Americana a Saksi, nga asawa ti abogado, ti agur-uray iti tuktok ti torre ti kastilio tapno mangted kadagiti tract iti pagsasao a Czech kadagidiay amin nga umuli iti agdan. Dadduma ti nangyawat kadagiti tract idi nasabetda ti maysa a grupo dagiti ages-eskuela a babbalasitang a bumisbisita iti daan a sementerio dagiti Judio. Ket, siempre, nakaawat dagiti amin a propesional a giya a nagipasiar ken dagiti tsuper ti bus iti literatura.​—1 Pedro 3:15.

Nagsurat ti maysa a giya a nangyebkas iti panangapresiar kadagiti Saksi ken iti kababalinda: “Iti intero a panagbiagko diak pay pulos nakasabet idi kadagiti nakaad-adu a mannakigayyem ken managayat unay a tattao. Nupay Katolikoak, nakayawanak babaen iti naespirituan a kababalinyo. Dakay amin inikkandak iti namnama nga adda pay laeng masanguanan ti sangatauan. Palubosandak nga agyaman iti kinamanangngaasiyo. Bendisionannakay koma ti Dios!”

Nupay nagtudo ti napigsa idiay Prague iti Biernes, nagtugaw iti ruar iti istadium dagiti pamilia, a dumdumngeg iti naespirituan a taraon nga impalawag dagiti lokal ken ganggannaet a pumapalawag. Nakaad-adu dagiti maladaga nga adda sadiay ket tapno maliklikan dagiti aksidente iti nagbaetan dagiti tugaw, naibangon ti naisangsangayan a paradaan ti stroller, wenno pagawitan iti maladaga iti ruar ti istadium.

Ti kombension idiay Prague tinabunuan ti nasurok a 22,000, ket 432 a kabbaro a dedikado a Saksi ti nabautisaran, agraman ti dua a tao a naka-wheelchair ken dagiti lima a sabsabali a baldado.

“Makangngeg” Dagiti Tuleng Idiay Budapest

Masarakan iti denna ti Karayan Danube ti napintas a siudad ti Budapest, a nagbalin a siudad a nakaangayan ti maysa a kombension internasional idi Hulio. Adda kangatuan a bilang ti timmabuno a 23,893, agraman ti 3,341 a delegado a naggapu iti 11 a pagilian malaksid iti Hungary.

Iti maysa a tolda nga asideg ti entablado, ti intero a programa ket naipatarus nga agpaay kadagiti tuleng, nga adda agarup 100 a timmabuno. Kadagiti sasao a pangabrasa kadagiti amin a delegado nga agsasao iti sabali a pagsasao malaksid iti Hungariano, naabrasa a nangnangruna dagiti tuleng, babaen kadagiti sasao a: “Ti pagsasao nga agsenias ti maysa kadagiti pagsasao a ditay kayat a lipatan a dakamaten a pakaipatarusan ti intero a programa. Agyamantayo ta kaduatayo dagiti tuleng.”

Panangiraman iti Kinapudno Kadagiti Sabsabali

Kadagitoy a kombension nairuar ti baro a literatura ti Biblia, agraman ti libro a Ti Sekreto ti Kinaragsak iti Pamilia. Kalpasan ti panangawatda itoy a publikasion, maysa a Pranses a delegasion ti limmugan iti bus tapno agsublida iti otel. Iti dalanda nakitada ti maysa a nobia ken nobio agraman dagiti bisitada a dimmar-ay iti kasar. Kiniddaw dagiti kakabsat a lallaki iti tsuper a pasardengenna ti bus. Bimmaba ti maysa kadagiti Saksi ket inyawatna ti maysa a kopia ti baro a libro a Hungariano iti agassawa. Inawatda dayta a buyogen ti panagyaman ket dagus a rinugianda a sinukimat ti libro. Nalabit dayta ti maysa kadagiti kaunaan a kopia a naipaima kalpasan ti pannakairuarna!

Manipud Kinakatoliko Nagbalin a Komunista, Kalpasanna Nagbalin a Saksi

Dagiti 510 a nabautisaran iti daytoy a kombension inrepresentarna ti nasurok a 2 porsiento kadagiti timmabuno. Tallo kadagitoy a baro a Saksi ti adda pay laeng iti pagbaludan, nga ikarkaroda dagiti krimen a naaramidanda sakbay a naammuanda ti kinapudno ti Biblia. Kanayon a bisitaen ida dagiti kakabsat ken iyadalanda iti Biblia dagiti sabsabali pay. Iti maysa a pagbaludan idiay Budapest, agarup 50 a panagadal ti Biblia ti maikonkondukta kadagiti balud.

Maysa a lalaki a napadakkel iti eskuelaan ti Katoliko a Benedictine, napukawna ti pammatina iti Iglesia Katolika ket, iti edad a 20, nagmiembro iti Partido Komunista. Kalpasanna, nakikadua iti armada ket naital-o iti saad a teniente. Kas miembro ti Workers’ Militia, nangisuro iti Marxism-Leninism iti unibersidad. Naallukoy iti replan dagiti Komunista a “panagwayawaya, panagkakabsat, panagpapada.” Nupay kasta, ti di umiso a panangusar dagidiay agtuturay iti replan a “gobierno dagiti tattao” ti namagpanunot manen kenkuana maipapan iti Komunismo. Nariknana nga adda banag a kurang. Kamaudiananna, nagretiro. Idi nagtuktok dagiti Saksi iti ruanganna, sidadaan nga immimdeng. Ibagana: “Idi damo a simmarungkarak idiay Kingdom Hall, nakombinsirakon kamaudiananna a daytoy ti pudno a panagkakabsat. Napalikmutanak iti ayat dagiti pudno a pasurot ni Kristo. Ti panagbalbaliwko a naggapu iti Komunista a nagbalin a Saksi innalana ti uppat a tawen. Ngem pinilik ti kinapudno.” Isut’ nabautisaran idiay a kombension.

Para kadagiti polis, ti panagtrabaho idiay kombension ket gagangay a naiduma ti kasasaad. Kinuna ti maysa a polis a naituding nga agbantay iti sango ti istadium a nakarigrigat ti agtrabaho idiay pagkombensionan dagiti Saksi. Apay? Agsipud ta nakasaysayaat ti panagandar dagiti isuamin a banag ket ti polis marigatan nga agtalinaed a siririing!

Nagsayaatan a Report ti Warnakan Idiay Poland

Dua a kombension internasional ti naangay idiay Poland, nga adda nasurok a 20,000 a timmabuno idiay Warsaw, ti kabesera a siudad, ken dandani 12,000 idiay Lodz, ti maikadua a kadakkelan a siudad ti Poland.

Ti kangrunaan a periodiko iti Warsaw, ti Życie Warszawy, addaan iti sumaganad a padamag: “‘Adda naimbag a damag a maiwaragawag! Dayta ti damag maipapan iti talna, pudno a talna. Ti ayattayo ken Jehova ken iti kaarrubatayo tignayennatayo nga agtultuloy a mangasaba nga awan sarday agingga a kunaen ti Dios a nalpasen ti trabaho,’ kinuna ni Carey Barber, maysa a miembro ti Bagi a Manarawidwid dagiti Saksi ni Jehova.”

Kinuna ti maysa a mannurat para iti periodiko nga Sztandar Młodych: “Iti dua nga aldaw 12,000 wenno ad-adu pay a Saksi ni Jehova ti nagtataripnong iti maysa a narelihiosuan nga asamblea idiay Legia Stadium, idiay Warsaw. Adda mapagulidanan nga urnos, ket uray no sinukimatko a naimbag, nadlawko nga awan ti kotse dagiti polis wenno dagiti mangiwanwanwan a grupo ti militar.

“Ti Poland, kunada, ket dandani interamente a Katoliko a pagilian. Ngem no agtataripnong dagiti agtutubotayo a Katoliko iti dayta met la nga istadium, kanayon nga adda nagadu a polis, a sidadaan nga agtignay.

“Talaga a makapadanag a dagiti nagikkat iti Katolisismo, simmurot iti sekta, wenno aniaman ti pangawagyo kadakuada [dagiti Saksi ni Jehova] kabaelanda ti agtataripnong iti nagdadakkel a bunggoy ket awan mapasamak a peggad iti urnos ti publiko ken iti kinatalged, idinto ta dagiti agtutubotayo a Katoliko no addada iti bunggoy agbalinda a napeggad, ket nasken ti panangsalaknib ti polis a maibusor iti inuubingan a kinariribukda. Adu unay ti panunoten.”

Naaramid met ti panagbautisar dagiti kabbaro a manamati ditoy, nga adda 462 a nabautisaran idiay Warsaw ken 278 idiay Lodz. Maysa kadagitoy isu ni Sylwia nga agtawen iti 19, nga idumdumana idi dagiti Saksi. Maysa nga aldaw nga agtudtudo isut’ inasitgan ti maysa a Saksi iti kalsada. “Nabaelak a pinapanaw, ket immadayoakon. Ngem pinayongak ti maysa a balasitang a mabasbasan. Idi agangay naammuak a Saksi met gayam! Intukonna nga itugotannak iti libro a Dagiti Saludsod nga Iyimtuod ti Agtutubo​—Dagiti Sungbat nga Epektibo. Gapu iti pammadayaw, intedko ti direksionko, ket . . . nabautisaranak ita!”

Ti Bassit nga Estonia Nakagun-od iti Dakkel a Panangsaksi

Ti Estonia, Latvia, ken Lithuania buklenda dagiti Estado ti Baltic. Ti populasion iti Estonia ket agarup 1.5 milion laeng, ket ti kabesera a siudad adda agarup 450,000 nga agindeg. Dua a kombension ti naangay sadiay idi Agosto 1996.

Kasta unay ti epekto dagitoy a dadakkel a panaggigimong ta kinuna ti maysa a periodiko: “Literal a napunno ti Tallinn iti panagdayaw dagiti Saksi ni Jehova. Ti kombensionda a naangay idiay Linnahall naipadamag a nagtitipon ti kadadakkelan a tallaong kadagiti amin a relihion a naangay pay laeng idiay Estonia.” Inreserba dagiti Saksi ti amin nga otel.

Kalpasanna, nagreport ni Kabsat Carey Barber a nangikunaanna: “Di pakasdaawan a dagiti kakabsat a taga Finland ken dadduma a kakabsat a naituding idiay Estonia pagay-ayatda ti kaaddada sadiay. Daytoy bassit ngem napintas a pagilian ti inturayan ken inrurumen dagiti daddadakkel a nasion ket inibturanna ti adu a panagsagaba. Ita dagiti taga Estonia . . . segseggaanda unay ti maaddaan iti masanguanan nga agnanayon a kinatalna ken kinatalged nga agtaud ken Jehova.” Adda nasurok a 3,100 nga aktibo a Saksi idiay Estonia, a kagudua kadagitoy ti agsasao iti Ruso.

Dagiti kombension nagserbi kadagiti taga Estonia, dagiti agsasao iti Ruso a taga Estonia ken Latvia, Lithuania, ken dagiti bumisbisita a delegado a naggapu kadagiti 15 a pagilian, agraman dagiti 155 a naggapu idiay Britania ken 300 a naggapu idiay Finland.

“Makangngeg” met Dagiti Tuleng Idiay Estonia

Tallo a tawenen ti napalabas maysa a tuleng a panglakayen a naggapu idiay Finland ti napan idiay Tallinn, Estonia, tapno kitaenna no ania ti maaramidanna para kadagiti tuleng iti dayta a pagilian. Awan am-ammona nga uray maysa a tuleng a tao sadiay, isu a napan iti balay a pagtitiponan dagiti tuleng idiay Tallinn, nga awitna dagiti nabunton a magasin a Pagwanawanan ken dadduma a literatura. Isut’ inabrasa dagiti tuleng a taga Estonia ket magagaranda a mangkita no ania ti awitna. Naipaimana amin a literatura bayat ti umuna nga ibibisitana ket inlistana ti nagnagan ken direksion dagiti interesado, nga agdagup iti 70 a nagan.

Dandani amin mayatda a payadalan iti Biblia, ket nabigbig ti kabsat a lalaki a dina magebgeban amin dagidiay a panangyadal. Gapuna masapul a pilienna dagiti tattao nga interesado unay. Di nagbayag kalpasan ti immuna nga ibibisitana idiay Estonia, addaanen iti 30 a panangyadal iti Biblia ken adda pay 40 nga agur-uray a payadalan! Adda itan uppat a managipatarus iti panagsenias para kadagiti tuleng idiay Tallinn.

“Baro a Naisangsangayan a Pasamak iti Salaysay ti Baro a Tulag”

Maysa a Saksi ti agtartrabaho iti sangladan ti lantsa a mangkabkablaaw kadagiti delegado ti kombension. Inasitganna ti maysa a taga Estonia a giya dagiti biahero ket sinaludsodna kenkuana no ania ti makunana maipapan itoy dakkel a kombension. Imbaga ti giya kenkuana a naiturongnan ti sumagmamano a grupo dagiti Saksi a naggapu kadagiti nadumaduma a pagilian ti Europa ket nadlawna a dagiti Saksi kankanayonda a nasingpet, nasayaat a tattao. Isut’ naawis nga agpasiar iti opisina ti Watch Tower Society iti Puhangu Street, ket nasdaaw a makakita iti nagsayaat nga urnos ken dagiti naasi ken naragsak nga agtutubo. Dina maawatan no apay a sangsanguen dagiti Saksi ti naulpit a pannakabusor ken ulbod a pammabasol idinto ta dagiti kinapudno paneknekanda a saan a pudno dagiti pammabasol. Kinunana: “No pampanunotek ti trabahoyo, ti panagserbiyo, ket kas iti baro a naisangsangayan a pasamak iti salaysay ti Baro a Tulag.”

Pudno unay, kas mensahero ti nadiosan a talna, inanamaen dagiti Saksi ni Jehova ti mangipasdek iti nasayaat a pakasarsaritaan iti sangalubongan gapu iti managraem a kababalinda ken ti kinamanangngaasida kadagiti ganggannaet. (1 Pedro 3:16) Ipakita dagitoy a kombension idiay Makindaya a Europa a nupay adda pammadpadakes ken pammardaya dagiti narelihiosuan a kabusor ken apostata, dagiti Saksi ni Jehova ket bembendisionan ti Dios bayat nga iwaragawagda ti mensahe ti talna a kasapulan unay ti sininasina ti gubat, napno iti gura a lubongtayo.​—Isaias 2:2-4; Marcos 13:10.

[Footnote]

[Ladawan iti panid 23]

Nupay nagtudo, nagimdeng a naimbag dagiti pamilia iti programa

[Ladawan iti panid 24]

Dagiti naragsak a Saksi a taga Poland agraman dagiti baro a ruar a literatura

[Ladawan iti panid 25]

Dagiti nararagsak a Saksi a taga Estonia iti gagangay a kawesda