Kadagiti Lapayag ti Ubing

MAYSA nga aldaw, idi balasitangak pay laeng, adda lalaki nga immay iti balaymi idiay Coeburn, Virginia, E.U.A., ket bayat a nagtungtongda ken ni tatangko, ti kaduana ti nakisarita kaniak tapno agtalnaak. Inladawan dagiti sasaona ti maysa a paraiso a daga, a pakiay-ayamakto kadagiti atap nga animal a dinton mangdangran kaniak. (Isaias 11:6-9) Inlawlawagna a diakto payen matay no di ket agbiagakton iti agnanayon ditoy daga a mismo. Masakbayan a nagsayaat a denggen! Diak pulos nalipatan ti nasao ti lalaki a panagbiag iti daga.​—Isaias 25:8; Apocalipsis 21:3, 4.

Panaginteres iti Relihion

Dagiti dadakkelko, nga aduan iti parikut iti panagasawa ket nagdiborsio sumagmamano a tawen kalpasanna, ket nakipaggianak ken ni Nanang. Awan a pulos ti interesna iti relihion. Isu a sisiak ti mapan iti Sunday school iti aniaman a simbaan a mapagpagna laeng manipud balaymi. Di nagbayag, nakiasawa manen ni Nanang, ket immakarkami agraman ti agsiuman kaniak idiay Indiana. Ngem kada kalgaw, mapanak idiay Virginia tapno sarungkarak ni tatangko.

Nagbalin ni tatang a Mormon di nagbayag kalpasan ti diborsio, ket inkagumaanna nga itukit kaniak ti kabbaro a relihionna. Kabayatan ti kalgaw ti 1960, idi walot’ tawenko, binautisarannak. Ngem no addaak idiay Indiana, makimisaak iti aniaman a simbaan nga asideg iti balaymi. Aminda ti nangisuro a no nasingpettayo, mapantayo idiay langit ket no dakestayo, mapantayo idiay impierno a pakatutuokantayo. Tangay patiek nga awan idi ti makatarus iti rikriknak a kayatko ti agbiag iti daga imbes nga idiay langit, awan a pulos ti nangibagbagaak maipapan iti dayta.

Idi 11 ti tawenko, immakar ni Tatang idiay Oregon. Madit’ riknak ken nagpasugnodak. Ateista ken mangnginum ti agsiuman kaniak, ket igaggagaranak a pabainan maipapan iti pammatik. Awagannak iti Santasantita, ket no makasangitakon, kunana: “Apay a dika awagan ti Diosmo tapno tulongannaka?” Awan man la ti kasla maseknan idiay balay maipapan iti Dios. Naliday ken nagrigat dagidi a tawen. Naabusoak iti pisikal, berbal, ken seksual. Naliwliwaak iti pannakisaritak iti Dios agsipud ta namin-adu a nariknak nga is-isu laengen ti maseknan kaniak.

Pinanawan ni Nanang ti agsiuman kaniak, ket simmardeng ti panangabuso. Ngem nakapangpanglawkami, ket narigatan ni Nanang a mangbiag kadakami a dua. Idi 13 ti tawenko, nagsublikami idiay Virginia tapno sarungkaran ti ikitko. Nakasingsingpet, napeklan a Baptist. Ay-ayatek unay. No kiddawenna a kaduaek a makimisa, kumuyogak. Kimmuyog pay ketdi ni Nanang, ket malagipko nga anian a nagsayaat ti riknak a kaduak ti pamiliak sadiay. Idi nagpatinggan ti isasarungkarmi, nagamkak ti panagawidmi. Kaamakko a no agawidkamto, makiramanakto iti imoralidad. Isu nga impakpakaasik ken ni ikitko a pagbatiennak laengen, ket pinalubosannak ni Nanang.

Inggatangannak ni ikitko iti King James a bersion ti Biblia. Pagpannakkelko unay dayta ket rinabii a basaek ti sumagmamano a pasetna. Nabasak iti maudi a kapitulo ti Biblia a no “asinoman nayonanna dagitoy a bambanag, ti Dios inayonnanto kenkuana dagiti pannaplit a naisurat iti daytoy a libro.” (Apocalipsis 22:18, 19, King James Version) Isu nga inrasonko, “Kasanok pay a patien a ti Book of Mormon ket paset ti sagrado a Kasuratan?” Isu nga inkeddengko ti agbalin a Baptist.

Nupay siertok a nasair ni Tatang idi insuratko kenkuana ti pangngeddengko, ti laeng nasaona ket maragsakan ta makimismisaak. Kanayon idi a makikaduaak iti Baptist a ministromi iti balbalay dagiti tattao tapno awisenmi ida iti tent revival-mi. Impagarupko nga ar-aramidek ti pagayatan ti Dios babaen ti isasarungkarko iti tattao kadagiti balayda ken makisarita kadakuada kas inaramid idi ni Jesus.

Kaskasdi a tarigagayak latta ti agbiag iti paraiso a daga imbes nga idiay langit. Ngem kalpasanna nabasak ti sumaganad a teksto ti Biblia, ket daytat’ nangted kaniak iti namnama: “Agdawatkayo, ket maitedto dayta kadakayo; agsapulkayo, ket makasarakkayto; agtuktokkayo, ket mailukatto dayta kadakayo: ta tunggal maysa nga agdawat umawat; ken tunggal maysa nga agsapsapul makasarak; ket iti tunggal maysa nga agtuktuktok mailukatto dayta.”​—Mateo 7:7, 8, KJ.

Panagasawa ken Panagpamilia

Iti simmaganad a tawen, immakarak tapno makipagnaed ken ni Nanang idiay Indiana. Idi agtawenak pay laeng iti 15, naasawaanakon, masikog, ken naka-bus nga agpaabagatan ti California. Diak unay am-ammo ti pamilia ni lakayko, ngem kayatko nga awatendak koma. Pentecostalda, ket nasao ti manang ni lakayko ti maipapan iti sagut a panagsao iti dildila. Isu nga idi rabii a kimmuyogak kadakuada iti serbisio ti kararag, inkararagko a makapagsaoak koma iti dildila.

Kellaat nga adda karkarna a rikna a nangsallukob kaniak iti serbisio. Nagpigergerak, ket diakon nakontrol ti panagsaok. Impukkaw ti manangaskasaba a sumalsallukoben kaniak ti espiritu, ket pinikpikna ti bukotko. Kalpasanna, tunggal maysa ti nangarakup kaniak ken kinunada a nagsayaaten ta inusarnak ti Dios iti daytoy a wagas. Ngem mariribukan ken mabutengak idi. Diak man la malagip ti aniaman a sinaok.

Di unay nagbayag, nagkomplikasion ti panagpasikalko iti umuna nga anakmi. Kinuna ti pastor ti kapilia ken ni lakayko a pakpakaruen ti Dios ti panagpasikalko gapu ta saan a Kristiano [ni lakayko]. Agsangsangit ni lakayko nga immasideg kaniak ket kinunana a no patiek a daytat’ mangkissay iti rigatko, isut’ agpabautisar. Kinunak kenkuana a siguradoak a di butbutngen ti Dios dagiti tattao iti panagserbida kenkuana.

Panangpanaw iti Iglesia

Maysa a Domingo, kalpasan ti sermonna, nagkiddaw ti pastor iti kongregasion iti kontribusion. Kasapulan idi a matarimaan ti kapilia gapu iti nabiit pay a ginggined. Idi naipasa ti plato ti koleksion, inkabilko amin a kuartak. Kalpasan a binilangna ti kuarta, ti pastor, imbes a nagyaman iti kongregasion, indagadagna kadakuada a naparparaburda pay koma para itoy a napateg a panggep. Impasana manen ti plato. Awanen a pulos ti kuartak, isu nga iti bainko, dagus nga impasak ti plato. Dinardaras manen a binilang ti pastor ti kuarta ket di man la nagyaman kadakuada a kinunana a di pay la umdas dayta. “Sigurado nga awan ti agawid agingga a maur-ortayo ti kuarta a kasapulan a pangaramid iti trabaho ti Dios,” kinunana.

Agur-uray ni lakayko idiay ruar, ket ammok a din makaanus. Saan la nga is-isu. Diak metten naanusan ti kinaawan panagyaman ti pastor. Isu nga inubbak ti anakko ken agluluaak a rimmuar iti simbaan a kitkitaen ti amin. Inkeddengko a diakton pulos makimisa. Nupay diak nakimisan, diak insardeng ti pammatik iti Dios. Basbasaek pay latta ti Bibliak ken inkagkagumaak ti agbalin a nasayaat nga asawa.

Pannakaammo iti Kinapudno ti Biblia

Kalpasan a naipasngay ti maikadua nga anakmi, nakisarita dagiti gagayyemmi nga immakar idiay Texas iti makinkua ti pagnanaedanda nga ipaabangna laengen kadakami ti balay a pagnanaedanda. Idi pumanawen ni gayyemko a Pat, kinunana nga adda babai a nakautang kenkuana iti kuarta ket umayto agbayad. Kiniddaw ni Pat nga ikoreokto dayta kenkuana idiay Texas. Sumagmamano nga aldaw kalpasanna, dua a babbai ti timmuktok iti ruangan. Tangay impagarupko nga umaydan bayadan ti utangda [ken ni Pat], dagus a pinastrekko ida. Inlawlawagko nga immakaren ni Pat ngem nasaona a dumaw-asdanto. “Bueno, naimbag man ta imbaga ni Pat dayta,” kinuna ni Charlene Perrin, maysa kadagiti babbai. “Talaga a tinagiragsakmi ti panangyadalmi kenkuana.”

“Ania?” dinamagko. “Nangyadal? Nalabit nagkamalikayo.” Inlawlawag ni Charlene a narugianda nga inyadalan ni Pat iti Biblia. Idi naammuanda nga immakaren ni Pat, dinamag ni Charlene no kayatko nga adalen ti Biblia. “Sige,” kinunak a sikokompiansa. “Isurok kadakayo ti aniaman a kayatyo a maammuan.” Impagpannakkelko ti panagbasbasak iti Biblia, ket impagarupko a maparegtak ida.

Impakita kaniak ni Charlene ti libro a Ti Kinapudno a Mangiturong iti Biag nga Awan Inggana, ket binasami ti Salmo 37:9: “Dagiti agaramid iti dakes magessatdanto, ngem dagidiay nga agpannuray ken Jehova, tawidendanto ti daga.” Nasdaawak. Sadiay, iti mismo a Bibliak, kunana a dagiti tattao tawidendanto ti daga. Kalpasanna, adut’ sinaludsodko, a namimpinsan. Immisem ni Charlene ket kinunana: “Ney, agurayka! Saggaysaentayo dagiti bambanag.” Inlawlawagna a kasapulan ti regular, sistematiko a panagadal iti Biblia. Dagus nga inawisnak iti Kingdom Hall, ti pangawag iti paggigimongan dagiti Saksi ni Jehova.

Nasaok ken ni Charlene ti kapadasak maipapan iti plato a pagkolekta ken diak kayaten ti makimisa. Inranudna kaniak ti Mateo 10:8 a kunana: “Inawatyo nga awan bayadna, itedyo nga awan bayadna.” Inlawlawagna nga awan maipaspasa a plato a pagkolekta iti gimong dagiti Saksi ni Jehova ken boluntario amin a donasion. Kinunana pay nga adda kahon ti kontribusion iti paggigimongan ket mabalin nga ikabil sadiay dagiti tattao a mayat nga agkontribusion. Inkeddengko nga ikkak manen iti gundaway ti relihion.

Bayat a nagadalak, naammuak no apay nga alusiisenak idi nagsaoak iti dildila idiay kapilia dagiti Pentecostal. Naited laeng kadagiti nagkauna a Kristiano ti sagut ti Dios a panagsao iti nadumaduma a pagsasao kas pammaneknek nga addaanda idi iti nasantuan nga espirituna. Nagserbi met iti praktikal a panggep daytoy a namilagruan a sagut tapno dagiti kinapudno iti Biblia magun-odan ti tattao a naggapu iti nadumaduma a lugar a nagtitipon idi Pentecostes 33 K.P. (Aramid 2:5-​11) Nupay kasta, saritaen ti Biblia nga agsardeng ti sagut ti Dios a panagsao iti dildila, a nabatad a kasta kalpasan a natay dagiti apostol. (1 Corinto 13:8) Ngem tapno kullaapan ti pampanunot dagiti tattao, ni Satanas ken dagiti demoniona ti mangpasao iti sumagmamano a tattao kadagiti di maawatan, iti pamay-an a pamatian ti adu nga adda kadakuada ti nasantuan nga espiritu ti Dios.​—2 Corinto 4:4.

Ibubusor ti Pamilia

Di nagbayag, naawatak met laengen ti panggep ti Dios iti daga ket rumbeng a saanak a paset ti nadangkes a lubong. (Juan 17:16; 18:36) Naammuak met a rumbeng a pugsatekon amin a pannakaisinggalutko iti Babilonia a Dakkel, ti simbolo a nausar iti Biblia para iti sangalubongan nga imperio ti ulbod a relihion. (Apocalipsis 18:2, 4) Naldaang ni Tatang idi imbagak nga agpabautisarakon kas maysa kadagiti Saksi ni Jehova. Impakpakaasina a diak agbalin a Saksi. Idi la a nakitak a nagsangit. Nagsinnangitkami, tangay pulos a diak kayat a sairen. Ngem ammok a nasarakakon ti kinapudno ket pulos a diak tallikudanen ni Jehova.

Bimmusor ti intero a pamiliak iti panagbalinko a maysa kadagiti Saksi ni Jehova. Simmardengak pay laeng a makigimong. Daytoy ti namagsardeng iti panangbusor dagiti miembro ti pamiliak, ngem pimanak pay. Ammok a diakto agtalna no diak aramiden ti pagayatan ni Jehova. Maysa nga aldaw, iti oras ti pangngaldawko, dimmagasak iti balay ni Charlene ket imbagak a rumbeng nga agpabautisarakon. “Dimo kadi napanunot nga umuna a masapul a makigimongka manen?” dinamagna. Imbagak kenkuana a determinadoak nga awanen ti makalapped kadakami ken ni Jehova. Nabautisaranak idi Setiembre 19, 1973.

Daytat’ nasurok a 23 a tawenen ti napalabas. Naimbag ta raemenen ti pamiliak ti desisionko, ket awan kadakuada ti nangpilit kaniak a mangpanaw iti kinapudno, banag nga apresiarek unay. Nupay kasta, ti inauna a balasangko a ni Kim ti kakaisuna a nagbalin a Saksi. Ti nasungdo a panagserbina ken Jehova ti dakkel a gubuayan ti pammaregta kaniak iti panaglabas dagiti tawen.

Nakalalagip a Panagkinnita

Idi 1990, idi nagsubliak idiay Coeburn, Virginia, tapno sumarungkar, kiniddawko ken ni Nanang a dumagaskami idiay Kingdom Hall tapno maammuak no ania nga oras a mangrugi ti gimong iti Domingo. Bayat a sumrekkami, kinunana a nagnaedkami idi iti maysa a balay iti mismo a likudan ti paggigimongan, iti ballasiw ti riles ti tren. Nabayagen a napuoran ti balay, ket ti laeng ladrilio a simborion ti nabati. “Ubingka pay idi,” kinunana, “awan pay tallo wenno uppat a tawenmo.”

Kadaydi a Domingo, sibabara a naabrasaak idiay Kingdom Hall. Idi kasarsaritak ni Stafford Jordan, nadakamatko nga idi ubingak, naggiankami kadaydi balay iti likudan ti Kingdom Hall. Miningmingannak a naimbag. “Malagipka!” indir-ina. “Sika daydi kusokuso ti buokna nga ubing a kastoy idi ti katayagna [inseniasna]. Mangaskasabakami idi ditoy idi a nakitungtong ti kaduak ken ni tatangmo. Inkagumaanka a pagtalnaen babaen ti pannakisaritak kenka maipapan iti Paraiso.”

Diak nakauni. Agpakarigatak a nagsao bayat nga inyestoriak kenkuana ti panangbirokko iti kinapudno ti Biblia. “Idi ubingak pay laeng, immulamon dagiti bukel ti kinapudno iti bassit a pusok!” kinunak. Kalpasanna nasaona a ni Stephen Dingus a kabagiak iti partido ni apongko a lakay, ti nabayagen a matalek a Saksi. Pulos nga awan nasasao ti pamilia maipapan kenkuana, ta binusorda unay. “Maragsakan la ketdi koma kenka!” kinuna ni Kabsat Jordan.

Bayat a lagipek dagiti tawenko iti organisasion ni Jehova, talaga nga agyamanak iti ayat ken asi a naipakita kaniak. Wen, adda pay latta panawen a medio maldaanganak no makitkitak idiay Kingdom Hall dagiti pamilia a sangsangkamaysa nga agserserbi ken ni Jehova, ta masansan a sisiak laeng ti adda sadiay. Ngem dagus a malagipko a kaduak ni Jehova. Kanayon a kitkitaennak, ket idi inawat ti pusok ti kinapudno a naipangngeg iti lapayag ti maysa nga ubing adun a tawen ti napalabas, impalubosna a rimmusing ken rimmangpaya dayta.

“Pagyamanan Kabsat Jordan,” kinunak, “iti panangbusbosmo iti tiempo a nangibaga maipapan iti Paraiso iti daydi nakarting a balasitang!”​—Kas insalaysay ni Louise Lawson.

[Ladawan iti panid 13]

Kaduak ni Stafford Jordan idi nagkitakami manen idi 1990