Dagiti Saksi Ni Jehova Idiay Russia

Panangmatmat ti Maysa a Teologo

IDIAY Roma, kinuna dagiti panguluen iti komunidad dagiti Judio idi umuna a siglo maipapan iti Kinakristiano: “No maipapan itoy a sekta naammuanmi a masupsuppiat iti isuamin a lugar.” Ania ti inaramid dagidiay a panguluen? Naimbag ta napanda ken ni apostol Pablo, nga idin ket naibalud iti mismo a balayna, ket kinunada: “Pagarupenmi nga umiso a dumngegkami kenka no ania dagiti kapanunotam.” (Aramid 28:22) Dimngegda iti maysa a Kristiano nga aduan-pannakaammo imbes a kadagidiay mangpadpadakes iti Kinakristiano.

Kasta met ti inaramid ti mapagraraeman a Ruso a teologo a ni Sergei Ivanenko. Nupay pinatina ti adu a negatibo a damag maipapan kadagiti Saksi ni Jehova nga agwarwaras idiay Russia, inkeddengna nga awagan ti sanga nga opisina dagiti Saksi a masarakan iti ruar laeng ti St. Petersburg tapno umamad. Inawatna ti awis a sumarungkar sadiay, umamad, ken paliiwenna a mismo dagiti Saksi.

Idi simmangpet ni Mr. Ivanenko idi Oktubre 1996, dandanin mairingpas dagiti pasilidad a pagdagusan ti gistay 200 a miembro ti sanga dagiti Saksi ni Jehova idiay Russia. Naikkan iti gundaway iti simmaganad a tallo nga aldaw a mangpaliiw iti lugar a pagibangbangonan, makipangan iti dining hall, ken kasarita ti asinoman a kayatna.

Naipablaak ti artikulo nga insurat ni Mr. Ivanenko maipapan kadagiti Saksi iti nalatak a Ruso a periodiko a Moscow News idi Pebrero 16-​23, 1997. Napauluan ti artikulo iti “Rumbeng Kadi a Kaamaktayo Dagiti Saksi ni Jehova?,” a nagparang met iti Ingles nga edision ti Moscow News, a napetsaan iti Pebrero 20-​26. Tangay adu nga agbasbasa iti Agriingkayo! ti interesado unay iti aktibidad dagiti Saksi ni Jehova idiay Russia, kinopiami ditoy, buyogen iti pammalubos, ti kaaduan a paset daytoy nga artikulo. Nangrugi ni Mr. Ivanenko babaen ti sumaganad a kapadasan a nagparang kadagiti napatak a letra:

“‘Dakayo a sektariano, pumanawkayo ditoy Russia!’ ti mabasa iti poster nga iwagwagayway dagiti miembro ti partido LDPR ni Zhirinovsky a mangprotprotesta iti panaggigimong dagiti Saksi ni Jehova. ‘Aniat’ diyo magustuan iti daytoy nga organisasion?’ ti inyimtuodko iti maysa kadagidiay a nagprotesta. Inyawatannak iti kopia ti Megapolis-Express a napauluan ‘Kellaat a Panagraira ti Narelihiosuan a Syphilis Idiay Kamchatka.’ Kinuna ti periodiko a tapno makakuarta ti organisasion, manggunggundaway ken mangimanmanehar dagiti Saksi ni Jehova kadagiti pagbalangkantisan, a pagrarairaan ti benereal a saksakit kadagiti marino. ‘Maysaka met kadi kadagiti biniktimada?’ inamadko buyogen ti pannakipagrikna, ‘Patiem kadi daytoy nga impormasion?’‘Saan a napateg no patiek wenno saan,’ ti sungbatna. ‘Ti kapatgan ket daddadaelen daytoy a sekta dagiti Americano ti espiritualidad ken kultura ti Russia, ket rumbeng a pasardengentayo dayta.’”

Naisurat iti baba ti artikulo nga insurat ni Mr. Ivanenko ti: “Babaen ken ni Sergei Ivanenko, teologo, kandidato iti pilosopia.”

“Talaga a manmano ti kinapudno a kas itoy, nupay agpayso a saan a nasayaat ti panangmatmat ti adu a Ruso kadagiti Saksi ni Jehova. Uray dakamatem laeng a maminsan daytoy nga organisasion, agkakanaten dagiti komento maipapan iti nakaam-amak a kinapanatikona, ti itataudna idiay America, maipapan iti bulsek a pammati dagiti ordinario a miembro kadagiti mangipangpangulo iti organisasion, ken ti panamati nga asidegen ti panagpatingga ti lubong. Kadagiti adu, matmatanda dagiti Saksi ni Jehova buyogen ti naglaok a buteng ken panagusioso.

“Ania Daytoy a Relihion, ket Rumbeng Kadi a Kaamaktayo Dayta?

“Tapno maammuak a mismo, sinarungkarak ti purok a Solnechnoye idiay distrito ti Kururtnoye, St. Petersburg, a sadiay ti ayan ti sentro administratibo dagiti Ruso a Saksi ni Jehova.

***

“[Daytoy ket] adda iti lugar ti dati a summer camp. Idi 1992, narpuog ti [dati a] pasdek, ket imbes nga ubbing, dagiti baliudong ken pinangen nga utot ti agnanaed idin sadiay. Agparang a ti narugit a kasasaad ti nakatulong tapno maipaima kadagiti Saksi ni Jehova ti pito ektaria a lote a mausar iti di masnup a kabayag. Rinetubarda dagiti daan nga estruktura ken rinugianda pay ti nagibangon kadagiti kabbaro, agraman ti uppat-kadsaaranna nga administratibo a pasdek, [Kingdom Hall] a makalaon iti 500, ken dining hall. Agmulmula met dagiti Saksi ni Jehova iti baro a ruot (a naorder pay a mismo idiay Finland) ken nadumaduma a kita ti manmano a kita ti kaykayo. Mainanama a mairingpas ti trabaho iti daytoy umay a kalgaw. Ti kangrunaan a trabaho ti sentro administratibo isut’ panangorganisar iti trabaho a panangasaba ken panangitulod iti literatura kadagiti lokal a kongregasion dagiti Saksi ni Jehova. Ti Solnechnoye awan bukodna a pasilidad a pagimprentaan, isu a ti Ruso a literatura mayimprenta idiay Alemania, sa maitulod idiay St. Petersburg, a sadiay ti pakaiwarasanna kadagiti rehion. Agarup 190 a tattao ti agtartrabaho iti sentro. Agtartrabahoda a boluntario ket nupay awan sueldoda, maipapaayanda iti amin a kangrunaan a kasapulan, a kas iti pagdagusan, taraon, ken kawes.

“Ti trabaho ti sentro ket tartarawidwidan ti komite ti 18 a panglakayen. Ni Vasily Kalin ti coordinator ti sentro administratibo nanipud pay idi 1992. Naipasngay idiay Ivano-Frankovsk. Idi 1951, idi uppat ti tawenna, isu ken dagiti dadakkelna ti napagtalaw a naipan idiay Siberia (idi 1949 ken 1951 agarup 5,000 a pamilia ti indadanes dagiti autoridad gapu ta Saksi ni Jehova-da). Nabautisaran idi 1965 ket nagindeg idiay rehion ti Irkutsk. Agtartrabaho idi kas foreman iti maysa a planta a pagprosesuan ti kayo.

“Malaksid kadagiti boluntario iti sentro administratibo adda pay 200 a boluntario a trabahador iti konstruksion a taga Russia, Finland, Sweden ken Norway nga agnanaed idiay Solnechnoye: Kaaduan kadakuada ti nagbakasion manipud iti regular a panggedanda. Nagadu met a Saksi ni Jehova ti naggapu idiay Ukraine, Moldova, Alemania, Estados Unidos, Finland, Poland ken dadduma pay a pagilian. (Dagiti Saksi ni Jehova dida mangidumduma iti puli. Nupay agtataeng a sangsangkamaysa dagiti taga Georgia, Abkhaz, Azerbaijan, ken Armenia idiay sentro, iti unos ti uppat a tawenda sadiay, uray naminsan, awan ti napasamak a rinnanget.)

“Kaaduan kadagiti pagbangon a materiales ken alikamen ket inted dagiti pagilian iti Scandinavia, ket adu met ti libre nga inted dagiti padada a manamati. Naipakita kaniak ti maysa a bulldozer nga impan ti maysa a Saksi ni Jehova a taga Sweden idiay Solnechnoye idi 1993. Inusarna dayta iti amin a tiempo a kaaddana sadiay, ket sakbay a nagawid, intedna dayta kadagiti kapammatianna. Mapadpadagus dagiti trabahador iti konstruksion kadagiti nanam-ay a balbalay ken cottage. Ti inaldaw a rutinada ket kas iti daytoy: alas 7:00 t.b.​—pammigat ken kararag; agtrabahoda manipud alas 8:00 t.b. agingga iti alas 5:00 t.m. a kalagum ti maysa oras a pangngaldaw. No Sabado, agtrabahoda agingga iti pangngaldaw, ket ti Domingo ti aldaw ti panaginanada.

“Manganda a naimbag ken kanayon nga adda prutas iti menu. Awan ti aniaman a panagayunar wenno siiinget a maiparit a taraon ti relihion. Kalpasan ti trabaho, adu ti mapan iti sauna sada uminum iti serbesa ken basta agtugaw a dumngeg iti musika. Awan ti mammartek a Saksi ni Jehova, ngem saan met a maiparit ti arak. Maipalubos kadagiti manamati ti uminum iti kalalainganna nga arak, cognac, vodka ken dadduma pay. Nupay kasta, saan nga agsigsigarilio dagiti Saksi ni Jehova.

***

“Mamitlo iti kada lawas, addada klase a panagadal iti Biblia, a kaaduan ket tabunuan dagiti agtutubo. Nupay kasta, kadawyan a makita dagidiay nagbalin a Saksi ni Jehova iti 30-​40 a tawenen. Gistay amin kadagiti nataengan ti naibalud idi, napaggian iti kampo dagiti trabahador ken napagtalaw. Idi nagpatinggan ti tiempo ti pannakaidadanes, adu a doktor, abogado, inheniero, mannursuro, negosiante, ken estudiante ti nagbalin a Saksi ni Jehova.

“Ikagkagumaan dagiti kongregasion a taginayonen ti atmospera ti kinaagpapada kadagiti miembroda. Kas pagarigan, aginnaw uray ti coordinator ti sentro administratibo iti rabii a batangna. Awagan dagiti Saksi ni Jehova ti tunggal maysa iti di pormal a pamay-an ket inayonda ti ‘kabsat’ no adda awaganda iti naganna.

“No adda Saksi ni Jehova a manglabsing iti pannursuro ti Biblia ket di agbabawi, isut’ maipasidong iti kakaruan a kita ti dusa​—isut’ mailaksid. Ti tao ket makatabuno pay latta kadagiti gimong, ngem saanen a kablaawan dagiti padada a manamati. Ti saan unay a nainget a pamay-an ket panangbabalaw.

***

“Nabayag a pinalpaliiwko dagiti Saksi ni Jehova agsipud ta ikagkagumaak nga ammuen no aniat’ nakaallukoyan ti nagadu a nadumaduma a tattao iti daytoy a narelihiosuan nga organisasion. Tangay agduduma ti personalidadda, nadanon a tukad ti nagadalan ken personal a kayat ken di kayat, [saan a makiramraman dagiti Saksi ni Jehova kadagiti] relihion a makikompromiso iti managbasol a lubong. Alusiisenda kadagiti lugar a [dagiti tattao] nabulsekda la ketdi a mamati iti autoridad, a sadiay maal-alagad ti mistisismo, a sadiay dagiti tattao ti nabingaybingay iti hirarkia ken dagiti natulnog a kaaduan.

“Naisalsalumina dagiti Saksi ni Jehova iti nabileg a pammatida nga agbiag a maitunos iti Biblia. Ikagkagumaanda a paneknekan iti amin a tignayda a daytoy wenno dayta ti prinsipio ti Biblia, wenno babaen ti panangisitar iti teksto manipud iti Daan wenno Baro a Tulag. Patien dagiti Saksi ni Jehova a ti Biblia ken ti laeng Biblia ti aglaon kadagiti sungbat iti amin a saludsod. Para kadagiti Saksi ni Jehova, ti Biblia ti konstitusion, ti pagannurotan ken ti kangrunaan nga ebkas ti kinapudno.

“Gapu itoy, agdindinamag dagiti Saksi ni Jehova iti intero a lubong kas awan pakapilawanda a managtulnog iti linteg nga umili ken nangnangruna iti nainget a kababalinda iti panagbayad iti buis. Kanayon a suksukimaten ida ti opisina a mangus-usig iti buis ket masmasdaawda kada aramidenda dayta agsipud ta awan ti masarakanda nga aniaman a pananglabsing. Siempre, kabaelan dagiti Saksi ni Jehova, a kas iti adu pay a sabsabali, ti agpambar iti di panagbayad iti buis, ngem kuna ti Biblia a rumbeng a mapagpiaran ti maysa a tao iti panagbayad iti buis, ket para kadagiti Saksi ni Jehova, daytoy ti rumbeng a masurot.

“Nupay kasta, ti di makikompromiso a kababalinda iti Biblia ti masansan a pagkontraan, no dadduma, dagiti Saksi ni Jehova ken ti gobierno. Ti naan-anay a dida pannakinamin iti politika ti kangrunaan nga iruprupirda, ket nabatad dayta iti panagkedkedda nga agsoldado.

“Literal ti panangipaulog dagiti Saksi ni Jehova iti sasao ni Jesus maipapan iti no kasano a dagiti adalanna ken ti pagarianna dida paset daytoy a lubong, ket gapu itoy, agkedkedda a makinamin iti politika ken gubat, sadinoman ti pagdadangadangan ken ania a gapu ti pakidangdangadangan. Gapu ta nagkedked dagiti Saksi ni Jehova nga idir-i ti ‘Heil Hitler’ ken agserbi iti buyot ni Hitler, rinibu a manamati ti naipan kadagiti kampo konsentrasion dagiti Nazi, ket rinibu ti natay. Tunggal Aleman a Saksi ni Jehova a natay gapu iti panagkedkedna a makipaset iti panangraut a maibusor iti Soviet Union, ket ibilang dagiti Ruso kas tao a nagsayaat unay ti naaramidanna. Maigiddato, nupay kasta, adu a Russo ti di man la maasian kadagidiay [Ruso] a Saksi ni Jehova a napapatay gapu iti panagkedkedda a mangibaklay iti igam ken makipaset iti Gubat Sangalubongan II, wenno nakondenar iti panagkedkedda nga agserbi iti buyot kabayatan ti tiempo ti talna. Ngem iti agpada a kaso, nagtignay dagiti Saksi ni Jehova a maitunos kadagiti narelihiosuan a patpatienda ken saan a kadagiti napolitikaan a kombiksion.

“Saan pay a nabayag a rimsua ti umasping a parikut idiay Japan, a sadiay sumagmamano nga estudiante a Saksi ni Jehova ti nagkedked nga agadal iti martial arts, ket nagpeggadda a maikkat iti unibersidad. Idi 1996, nangiruar ti Korte Suprema iti Japan iti pammilin a mangsupsuporta iti kalintegan dagitoy nga estudiante ken pinalubosanda ida a sumrek kadagiti kasandi a klase.

***

“Ania ti pagsiddaawan dagiti moderno a managpanunot maipapan kadagiti Saksi ni Jehova? Kangrunaanna, ti awan-sarday a panangikasabada nga asidegen ti panungpalan ti lubong (mangar-aramidda iti trabaho a kinamisionero kadagiti lansangan ken binalaybalay). Nabiit pay a dagiti manangaskasaba ket binalakadan dagiti panglakayen a saanda unay nga ipaganetget ti ‘panungpalan ti lubong’ ken ti nakas-ang a pagbanagan dagiti managbasol, no di ket ilawlawagda kadagiti dumngeg a mangituktukon ni Jehova kadakuada iti gundaway a maaddaan iti ‘agnanayon a biag iti paraiso a daga.’

“Ti sabali pay a pakasuronanda kadakuada ket ti negatibo a kababalin dagiti Saksi ni Jehova iti panaglalaok ti pammati, ken ti panangilibakda iti ekumenismo. Patienda a ti Kristiano a lubong liniputanna ti Dios ken ti Biblia, ken nakaro ti biddut ti amin a dadduma pay a relihion. Idildilig dagiti Saksi ni Jehova dagitoy a relihion iti ‘balangkantis a Babilonia,’ ken patienda a ti pagbanaganna umapayto met kadagitoy a relihion. Kuna ti nabiit pay a ruar ti ‘Agriingkayo!’ nga asidegen ti panungpalan ti nadumaduma a relihion, ket ti laeng relihion nga agtalinaed isu daydiay ikaskasaba dagiti Saksi ni Jehova.

“Naimbag laengen ta bigbigen dagiti Saksi ni Jehova ti kalintegan ti tunggal tao a maaddaan iti siwayawaya a konsiensia.

***

“Adu a pagilian ti nangyebkasen iti pannakaseknanda no pangta iti kagimongan ti pannursuro dagiti Saksi ni Jehova wenno saan. Indeklara ti Korte Suprema iti estado ti Connecticut, Estados Unidos (1979) ken ti New South Wales, Australia (1972), ti Provincial Court ti British Columbia, Canada (1986) ken dadduma pay a korte nga awan ti prueba a dagiti Saksi ni Jehova ket pangta iti kagimongan, wenno pangtada iti salun-at wenno emosion dagiti tattao. Ti kalintegan iti wayawaya ti relihion dagiti Saksi ni Jehova ket indepensa ti European Human Rights Court (1993), a limitado laeng idiay Grecia ken Austria. Ita, maidaddadanes dagiti Saksi ni Jehova iti 25 a pagilian . . .

“Maibilang dagiti Saksi ni Jehova kas pagwadan kadagiti padada nga umili gapu iti debosionda iti kinapudno ti Biblia ken ti awan panagimbubukodan a kinatulokda a mangirupir iti pammatida. Ngem rumsua ti saludsod: Nakasagana kadin ti kagimongantayo a mangipaay kadagiti konstitusional a pammatalged iti wayawaya ti konsiensia kadagiti organisasion a mangipatpatangken iti nainget unay ken di makikompromiso a pamay-an a panangyaplikarda iti Biblia iti amin nga aspeto ti biag?”

Kadagiti maudi a sasaona, nangpataud ni Mr. Ivanenko iti napateg a saludsod. Idi umuna a siglo, ni apostol Pablo, a direkta a pinili ni Kristo nga agserbi a pannakabagina, nagsagaba kadagiti di nainkalintegan a ‘pannakaparparautna iti pagbaludan.’ Isu a nagsurat ni Pablo kadagiti padana a manamati maipapan iti panagreggetna iti “panangikalintegan ken legal a panangipasdek iti naimbag a damag.”​—Filipos 1:7; Aramid 9:3-16.

Aw-awaten dagiti Saksi ni Jehova ita ti amin a mangusig a naimbag kadagiti ar-aramidenda a kas iti inaramid ni Mr. Ivanenko. Agtalekkami a no kasta ti aramiden dagiti tattao, matakuatandanto a dagiti negatibo a damag maipapan kadagiti Saksi ni Jehova ket ulbod, a kas iti kinapalso dagiti damag maipapan kadagiti nagkauna a Kristiano. Kangrunaanna, pagtultulnogan dagiti Saksi ti “baro a bilin” nga inted ni Jesus kadagiti adalanna: “Ayatenyo ti maysa ken maysa; kas ti panagayatko kadakayo.”​—Juan 13:34, 35.

[Kahon iti panid 23]

Salansan ti MN

(Ti sumaganad nga impormasion a naggapu iti salansan ti Moscow News ket naimaldit a kakuyog daytoy artikulo ni Sergei Ivanenko.)

“Dagiti Saksi ni Jehova iti Russia ket paset ti sangalubongan a Kristiano nga organisasion nga agtigtignay iti 233 a pagilian ken addaan iti 5.4 a milion a miembro. Sursuroten dagiti Saksi ni Jehova ti naespirituan a panangiwanwan ti Bagi a Manarawidwid a masarakan idiay Brooklyn, New York. Rimmang-ay ti moderno-aldaw nga organisasion dagiti Saksi ni Jehova manipud iti klase a panagadal iti Biblia a binuangay ni Charles Taze Russell idi 1870 idiay Pittsburgh, Pennsylvania. Idi 1887, nakagteng ti organisasion idiay Russia. Maysa kadagiti immuna a Ruso a Saksi ni Jehova a ni Semyon Kozlitsky, ti napagtalaw manipud Moscow a nagpa-Siberia idi 1891. Nupay naidadanes, ti organisasion nagibtur, idi 1956 adda 17,000 a Saksi ni Jehova iti Soviet Union. Idi laeng Marso 1991 a nabigbig dagiti Saksi ni Jehova idiay Russia, kalpasan a naipaulog ti linteg ‘Maipapan iti Wayawaya ti Relihion.’ Ita, nasurok a 500 a grupo nga addaan iti agarup 70,000 a miembro ti aktibo idiay Russia. Agibumbunong ti organisasion kadagiti kopia ti ‘Pagwanawanan’ (maipabpablaak iti 125 a pagsasao, nga addaan iti sirkulasion a 20 a milion) ken ‘Agriingkayo!’ (iti 81 a pagsasao, nga addaan iti sirkulasion a 18 a milion).”

[Ladawan iti panid 23]

Paset ti complex ti sanga nga opisina idiay Russia

[Ladawan iti panid 24]

Ti Kingdom Hall a pagtataripnongan ti pamilia iti sanga idiay Russia tapno adalen ti Biblia

[Ladawan iti panid 25]

Sangsangkamaysa nga agad-adal dagiti pamilia a Saksi ken tagtagiragsakenda ti panaglinglingay

[Dagiti ladawan iti panid 26]

Iranranudda kadagiti sabsabali ti pannakaammoda manipud Biblia