Saan a Simmuko
IDI Oktubre 5, 1995, naopera ti 14-anyos a ni Matt Tapio gapu iti tumor iti paset ti utekna a mangikonekta iti duri ken ti cerebrum. Napaneknekan a malignant ti tumorna. Ti operasion ket immuna laeng kadagiti adu nga operasion a napasaranna iti simmaganad a dua ket kagudua a tawen. Simmaruno dagiti panangagas babaen iti chemotherapy ken radiation.
Nagindeg ni Matt idiay Michigan, E.U.A., a sadiay nageskuela iti eskuelaan publiko ken timmabuno kadagiti Nakristianuan a gimong. Inaprobetsarna dagiti gundaway a mangiranud iti pammatina kadagiti mannursurona ken kaklasena ken nakiraman met iti panangasaba. Bayat ti kanayon a pannakayospitalna—binusbosna ti 18 a bulan iti naudi a dua ken kagudua a tawen ti biagna iti ospital—nakaipaima iti ginasut a literatura ti Biblia kadagiti naam-ammona sadiay.
Adu a daras a kasla saan a malasatan ni Matt, ngem iti tunggal ikakarona, makaungar. Naminsan, iti dalan a mapan iti ospital, kimmaro ket simmardeng nga aganges. Na-cardiopulmonary resuscitation, ket nakaungar. Idi nakapuot, nagsangit ken impukkawna: “Lumabanak! Lumabanak! Saanak a sumuko!” Kuna dagiti tattao a ti pammati ni Matt iti Dios ti nangpapaut iti biagna.
Natungpal ni Matt ti ipatpategna a tarigagay idi Enero 13, 1996, idi nabautisaran kas simbolo ti dedikasionna ken Jehova a Dios. Naaramid ti bautismo iti pribado a pagitaneban gapu iti peggad a maimpeksion. Sumagmamano nga aldaw kalpasanna, nayospital manen para iti ad-adu pay a pannakaopera. Idi Agosto 1997, awan sarday ti panagbakuar ni Matt iti adu a lawas, ngem simmardeng met laeng kalpasan ti kanayonan a pannakaopera.
Kadagiti amin a linasatna, kanayon a managpakatawa ni Matt, a makiin-innangaw kadagiti doktor ken nars. Saanda a maawatan no apay a nakaskasdaaw ti kinamanagpakatawana. Imbaga ti maysa kadagiti doktor kenkuana: “Matt, no siak ti adda iti kasasaadmo, iserrakon ti kortina, agkumotakon, ken ibagak iti isuamin a pumanawdan.”
Idi Pebrero 1998, nagawid ni Matt a naggapu iti ospital iti maysa kadagiti naudi a panagawidna. Naragsakan unay ta sibibiag ket apagserrekna iti ruangan, kinunana: “Maragsakanak unay! Agkararagtayo.” Ngarud inyebkasna ti ragsakna ken Jehova babaen iti kararag. Dua a bulan kalpasanna, idi Abril 19, isu ket natay gapu iti kanser.
Sakbayna, maysa a nairekord nga interbiu ken Matt ti napatokar bayat ti gimong dagiti Saksi ni Jehova idiay Kingdom Hall iti lugarda. Isut’ napagsaludsodan: “Ania ti ibagam kadagidiay nasalun-at a kaduatayo maipapan iti ministeriotayo ken dagiti Nakristianuan a gimong?”
Simmungbat ni Matt: “Aramidenyo ti amin a kabaelanyo itan. . . . Dikay pulos ammo no ania ti mabalin a mapasamak. . . . Ngem aniaman ti mapasamak, dikay pulos sumardeng a mangasaba maipapan ken Jehova.”