Inton Mapukawen ti Amin a Kinabaldado
NAMINSAN, kinuna ti tao a paralisado dagiti saka ken imana (quadriplegic) a kaaduan a tattao “temporario [laeng] ti kinasalun-atda.” Pudno dayta, ta inton agangay, agparangen dagiti pisikal a pakapilawantayo amin! Gapuna, umad-adu ti agkasapulan kadagiti anteohos, contact lens, postiso, hearing aid, elektroniko a pacemaker, ken knee implant. Kas kunaen ti Roma 8:22, “isuamin a sangaparsuaan agtultuloyda nga agas-asug a sangsangkamaysa ken agpapaut-otda a sangsangkamaysa agingga ita.”
Datay amin ngarud ket maliwliwa iti kari ti Dios a mangpasalun-at a naan-anay kadagiti natulnog a tattao iti maysa a nalinteg a “baro a daga.” (2 Pedro 3:13; Apocalipsis 21:3, 4) Kuna ti Isaias 35:5, 6: “Iti kasta maluktanton dagiti mata ti bulsek, ken dagiti lapayag ti tuleng maluktandanto. . . . Aglagtonto ti pilay a kas maysa nga ugsa, ket ti dila ti umel agkantanto.”
Impadto ti Biblia a makalasatto ti “maysa a dakkel a bunggoy” iti pannakadadael daytoy agdama a dakes a sistema. (Apocalipsis 7:9, 14; Salmo 37:10, 11, 29) Awan duadua a kalpasan la unay dayta a pannakadadael, dagidiay nakaro ti kinabaldadoda ken an-annayenda mapasarandanto ti giddato a pannakapaimbag dagiti an-annayenda! (Isaias 33:24) Kas panirpatan iti mapasamakto a panangagas iti baro a daga ti Dios, nangaramid ni Jesus kadagiti umasping a panangagas idi adda ditoy daga. (Idiligmo ti Marcos 5:25-29; 7:33-35.) Di mailadawan ti maysa ti ragsak dagiti tattao ken dagiti agarubos a lulua ti rag-o inton ibellengen dagiti pukol ti prosthesis, saklay, ken wheelchair-da! Tangay nasalun-aten ti bagida, maibaklaydanton ti inted-Dios nga annongenda a tumulong a mamagbalin iti daga a maysa a paraiso a pagtaengan.—Lucas 23:43.
Kabayatanna, masapul nga anduran pay laeng dagiti baldado itatta dagiti limitasionda. Kuna ni Nelson, maysa a baldado a taga Canada: “No mangrugin nga ay-ayek ti bagik, panunotek dagiti sasao ni Jesus idiay Mateo 24:13: ‘Ti nakapagibtur agingga iti panungpalan isunto ti maisalakan.’” Nupay adda dagiti limitasionda, mabalin a naan-anay ken nasalun-at dagiti baldado iti kapatgan a wagas—iti naespirituan—babaen ti panagibtur iti Nakristianuan a pammati.—Santiago 1:3, 4.
Natulonganen dagiti Saksi ni Jehova ti minilion a maaddaan iti kastoy a pammati. Kuna ni Dell, maysa a baldado a lalaki a naadaw iti immuna nga artikulo: “Dandani diak maipeksa ti riknak idi naammuak a dagiti pisikal nga an-annayen a kas iti an-annayek ket talaga a temporario laeng.” Wen, gapu ta pinabileg dayta a namnama, ni Dell—ken adu a sabsabali pay a kas kenkuana—saandan a maibilang a baldado.
[Ladawan iti panid 10]
Dagiti makalasat iti um-umay a pannakadadael sagrapendanto ti namilagruan a pannakapaimbag dagiti an-annayenda