No Kasano nga Agpatingga Dagiti Pisikal a Depekto

DAREPDEPENYO a makakita dagiti bulsek, makangngeg dagiti tuleng iti tunggal uni, sirarag-o a makakanta dagiti umel, ken dagiti pilay makapagnada ken natibker dagiti sakada! Tuktukoyentayo, saan a ti dakkel a gapuanan iti medikal a siensia, no di ket dagiti resulta ti mismo nga ibaballaet ti Dios agpaay iti sangatauan. Impakpakauna ti Biblia: “Iti dayta a tiempo maluktanto ti matmata dagidiay bulsek, ket maluktanto ti mismo a laplapayag dagidiay tuleng. Iti dayta a tiempo kumalay-atto daydiay pilay a kas iti panagkalay-at ti kalakian nga ugsa, ket ti dila daydiay umel umkisto gapu iti ragsak.” (Isaias 35:5, 6) Ngem kasanotayo a makasigurado a matungpal daytoy a nakaskasdaaw a padto?

Umuna iti amin, idi adda ditoy daga ni Jesu-Kristo, talaga nga inagasanna dagiti tattao iti amin a kita ti sakit ken pisikal a depekto. Kasta met, kaaduan kadagiti milagrona ket nasaksian ti adu a tattao​—uray dagiti kabusorna. Kinapudnona, iti laeng maysa nga okasion, dagiti managduadua a bumusbusor ti nagpalutpot a naimbag maipapan iti maysa a panangpaimbag tapno padaksenda ni Jesus. Ngem napaayda agsipud ta ad-adda laeng a napasingkedanda ti milagro nga inaramidna. (Juan 9:1, 5-34) Kalpasan a nagaramid ni Jesus iti maysa pay a nabatad a milagro, kinunada buyogen ti pannakapaay: “Ania ti aramidentayo, agsipud ta daytoy a tao agar-aramid iti adu a pagilasinan?” (Juan 11:47) Ngem saan a kasta katangken ti puso dagiti gagangay a tattao, agsipud ta adu dagiti namati ken ni Jesus.​—Juan 2:23; 10:41, 42; 12:9-11.

Dagiti Milagro ni Jesus​—Pakpakauna ti Sangalubongan a Pannakapaimbag

Dagiti milagro ni Jesus saanda laeng a pinaneknekan a ni Jesus ti Mesias ken Anak ti Dios. Nangipaayda kadagiti pagibatayan a pamatian kadagiti kari ti Biblia a maagasanto ti natulnog a sangatauan. Dagitoy a kari iramanna ti padto ti Isaias kapitulo 35, a nadakamat iti panglukat a parapo. Kunaen ti Isaias 33:24 mainaig iti salun-atto dagiti managbuteng-Dios a tattao: “Awanto ti agtataeng nga agkuna: ‘Masakitak.’” Kasta met, ikari ti Apocalipsis 21:4: “[Ti Dios] punasennanto ti amin a lua kadagiti matada, ket awanton ni patay, awanto metten ti panagleddaang wenno panagsangit wenno ut-ot. Ti immuna a bambanag [dagiti agdama a pakasuotan ken panagsagaba] naglabasdan.”

Regular nga ikarkararag dagiti tattao ti kaitungpalan dagitoy a padto no ibalikasda ti modelo a kararag ni Jesus, a kastoy ti pasetna: “Umay koma ti pagariam. Maaramid koma ti pagayatam, kas sadi langit, kasta met iti daga.” (Mateo 6:10) Wen, ti pagayatan ti Dios iramanna ti daga ken ti sangatauan. Nupay naipalubos gapu ta adda makagapu, din agbayag, maawanton dagiti sakit ken pisikal a depekto; dida dadaelen nga agnanayon ti ‘pagbatayan ti saka’ ti Dios.​—Isaias 66:1.a

Napaimbag nga Awan ti Ut-ot Wenno Bayad

Aniaman a pisikal a pakarigatan dagiti tattao, inagasan ni Jesus ida nga awan ti ut-ot, taktak ken bayad. Di naliklikan ti kasla uram a panagsaknap ti kasta a panangpaimbag, ket di nagbayag “immasideg kenkuana ti dadakkel a bunggoy, a naikuyog kadakuada dagiti tattao a pilay, pawad, bulsek, umel, ken adu a sabsabali pay, ket ngannganida la ipuruak ida iti sakaananna, ket inagasanna ida.” Ania ti reaksion dagiti tattao? Kastoy ti panangituloy ti salaysay ti mismo a nakakita a ni Mateo: “Nagsiddaaw ti bunggoy idi nakitada a ti umel agsasao ken ti pilay magmagna ken ti bulsek makakita, ket indaydayawda ti Dios ti Israel.”​—Mateo 15:30, 31.

Siputanyo ta dagidiay inagasan ni Jesus ket saan a siaannad a napili iti bunggoy​—maysa a kinasikap nga ar-aramiden dagiti impostor. Imbes ketdi, ti adu a kabagian ken gayyem dagiti masaksakit ‘ngannganida la ipuruak ida iti sakaanan [ni Jesus], ket inagasanna ida.’ Repasuentay ita ti dadduma nga espesipiko a pagarigan ti abilidad ni Jesus a mangpaimbag.

Kinabulsek: Bayat ti kaaddana idiay Jerusalem, nakita ni Jesus ti maysa a lalaki a “bulsek nanipud pannakayanakna.” Daytoy a lalaki ket nalatak iti siudad kas maysa nga agpalpalama a bulsek. Isu a mapanunotyo ti gagar ken siddaaw dagiti tattao idi naimatanganda a magmagna a makakitan! Ngem saan nga amin ket naragsakan. Gapu iti rurodda iti immuna a panangibutaktak ni Jesus iti kinadakesda, dadduma a kameng ti maysa a prominente ken impluensiado a sekta dagiti Judio a naawagan kas dagiti Fariseo ti desperado idi nga agsapsapul iti ebidensia a mangpaneknek iti kinamanangallilaw ni Jesus. (Juan 8:13, 42-44; 9:1, 6-31) Gapuna, pinalutpotda ti napaimbag a lalaki, kalpasanna dagiti nagannak kenkuana, sa ti lalaki manen. Ngem ti panagpalutpot dagiti Fariseo ad-adda laeng a pinatalgedanna dagiti milagro ni Jesus, a namagpungtot kadakuada. Gapu ta mariribukan iti kinaballikug dagitoy managinsisingpet a relihioso a tattao, kinuna a mismo ti naagasan a lalaki: “Manipud idi ugma saan a pulos nangngegan a ti asinoman linuktanna dagiti mata ti maysa a nayanak a bulsek. No daytoy a tao saan a naggapu iti Dios, awan a pulos ti mabalinna nga aramiden.” (Juan 9:32, 33) Gapu iti dayta napudno ken nasaririt nga ebkas ti pammati, ‘pinagtalaw’ dagiti Fariseo ti dati a bulsek a lalaki, a mangipasimudaag a pinapanawda manipud iti sinagoga.​—Juan 9:22, 34.

Kinatuleng: Bayat ti kaadda ni Jesus idiay Decapolis, maysa a rehion iti daya ti Karayan Jordan, dagiti tattao “inyegda kenkuana ti maysa a lalaki a tuleng ken adda lapped ti panagsaona.” (Marcos 7:31, 32) Saan laeng a pinaimbag ni Jesus daytoy a lalaki no di ket impakitana met ti nauneg nga empatia iti rikrikna ti tuleng, a mabalin a mababain iti bunggoy. Kunaen kadatayo ti Biblia a ti tuleng a lalaki ‘inyadayo [ni Jesus] a pribado manipud iti bunggoy’ ket pinaimbagna. Manen, ‘nalabes unay ti panagsiddaaw’ dagiti nakaimatang, a kunkunada: “Naimbag ti panangaramidna iti amin a bambanag. Pagbalinenna pay a makangngeg dagiti tuleng ken makasao dagiti umel.”​—Marcos 7:33-37.

Paralisado: Idi adda ni Jesus idiay Capernaum, inyasideg kenkuana dagiti tattao ti maysa a paralitiko a lalaki a naidalit iti pagiddaan. (Mateo 9:2) Iladawan ti bersikulo 6 agingga iti 8 ti napasamak. “Kinunana [ni Jesus] iti paralitiko: ‘Bumangonka, bagkatem ta pagiddaam, ket agawidka iti pagtaengam.’ Ket bimmangon ken nagawid iti pagtaenganna. Idi makitada daytoy nagbuteng dagiti bunggoy, ket indaydayawda ti Dios, a nangted iti kasta a kinaturay kadagiti tattao.” Naaramid met daytoy a milagro iti imatang dagiti adalan ken kabusor ni Jesus. Siputanyo ta dagiti adalanna, a saan a binulsek ti gura ken panangidumduma, “indaydayawda ti Dios” gapu iti naimatanganda.

Sakit: “Adda met maysa nga agkukutel nga immay kenkuana [ken ni Jesus], a sipaparintumeng nga agpakpakaasi kenkuana, a kunkunana kenkuana: ‘No kayatmo laeng koma, kabaelannak a dalusan.’ Iti kasta simnek ti asina, ket inunnatna ti imana ket sinagidna, ket kinunana kenkuana: ‘Kayatko. Madalusanka koma.’ Ket dagus a nagpukaw kenkuana ti kukutel.” (Marcos 1:40-42) Siputanyo ta saan a napilpilit ti panangpaimbag ni Jesus iti daytoy a tao no di ket gapu iti pudno nga asi. Iladawanyo iti panunotyo a maysakayo nga agkukutel. Ania ti panagriknayo no kellaat ken saan a naut-ot ti pannakaagasyo iti makapapatay a sakit nga in-inut a nangdadael iti bagiyo ken nakailaksidanyo iti kagimongan? Awan duadua a maawatanyo no apay a ti sabali pay nga agkukutel a simimilagro a naagasan “inruknoyna ti rupana iti sakaanan ni Jesus, nga agyamyaman kenkuana.”​—Lucas 17:12-16.

Dunor: Maysa a panangpaimbag ti naudi a milagro nga inaramid ni Jesus sakbay ti pannakatiliw ken pannakailansana. Iti panagtignayna a sidudursok maibusor kadagiti mangala ken ni Jesus, inasut ni apostol Pedro ti kampilanna “ket kinabilna ti adipen ti nangato a padi ket piningasanna ti makannawan a lapayagna.” (Juan 18:3-5, 10) Ti kapada a salaysay iti Lucas ibagana kadatayo a “sinagid [ni Jesus] ti lapayag ket isu pinaimbagna.” (Lucas 22:50, 51) Manen, daytoy a naasi a tignay ket naaramid iti imatang dagiti gagayyem ken kabusor ni Jesus​— iti dayta a gundaway, dagiti nangtiliw kenkuana.

Wen, no ad-adda nga usigentayo dagiti milagro ni Jesus, ad-adda met a mabigbigtayo dagiti pagilasinan a pudno dagita. (2 Timoteo 3:16) Ken kas nadakamaten, ti kasta a panagadal pabilgenna koma ti pammatitayo iti kari ti Dios a paimbagenna dagiti natulnog a tattao. Depinaren ti Biblia ti Nakristianuan a pammati kas “ti sigurado a panangsegsegga iti bambanag nga in-inanamaen, ti nabatad a parangarang dagiti kinapudno nupay saan a makita.” (Hebreo 11:1) Nalawag a ti Dios iparparegtana, saan a ti basta panamati lattan wenno panagarapaap, no di ket ti nabileg a pammati a naisaad iti pammaneknek. (1 Juan 4:1) Bayat a gun-odentayo ti kasta a pammati, ad-adda a nabileg, nasalun-at, ken naragsaktayo iti naespirituan.​—Mateo 5:3; Roma 10:17.

Masapul nga Umuna ti Naespirituan a Pannakapaimbag!

Naladingit ti adu a nasalun-at a tattao. Pinadas pay ketdi ti dadduma ti agpakamatay agsipud ta awan makitada a namnama iti masanguanan wenno agsipud ta nalapunosda kadagiti parikut. Makuna ngarud a masakitda iti naespirituan​—kasasaad nga adayo a dakdakes iti imatang ti Dios ngem iti pisikal a depekto. (Juan 9:41) Iti sabali a bangir, adu nga addaan iti pisikal a depekto, kas kada Christian ken Junior a nadakamat iti immuna nga artikulo, ti addaan iti naragsak, makapnek a panagbiag. Apay? Agsipud ta nasalun-atda iti naespirituan ken napabilegda iti natalged a namnama a naibasar iti Biblia.

Idi tukoyenna ti naisangsangayan a kasapulantayo kas tattao, kinuna ni Jesus: “Ti tao agbiag, saan nga iti tinapay laeng, no di ket iti tunggal sao a rumrummuar iti ngiwat ni Jehova.” (Mateo 4:4) Wen, saan a kas kadagiti naparsua nga animal, saan laeng a material a banag ti kasapulan ti tao. Yantangay naparsuatayo iti “ladawan” ti Dios, kasapulantayo ti naespirituan a taraon​—ti pannakaammo manipud iti Dios ken no kasano a makitunostayo iti panggepna agraman ti panangaramid iti pagayatanna. (Genesis 1:27; Juan 4:34) Ti pannakaammo iti Dios ket mangyeg iti biagtayo iti panggep ken naespirituan a bileg. Patalgedanna met ti namnama a biag nga agnanayon iti paraiso a daga. “Daytoy kaipapananna ti agnanayon a biag,” kuna ni Jesus, “ti pananggun-odda iti pannakaammo maipapan kenka, ti maymaysa a pudno a Dios, ken iti daydiay imbaonmo, ni Jesu-Kristo.”​—Juan 17:3.

Makapainteres ta dagiti kasadaranna saanda nga inawagan ni Jesus a “Mangngagas” no di ket “Mannursuro.” (Lucas 3:12; 7:40) Apay? Agsipud ta insuro ni Jesus dagiti tattao maipapan iti permanente a solusion dagiti parikut ti sangatauan​—ti Pagarian ti Dios. (Lucas 4:43; Juan 6:26, 27) Daytoy nailangitan a gobierno iti sidong ni Jesu-Kristo iturayannanto ti intero a daga ken tungpalenna dagiti amin a kari ti Biblia mainaig iti naan-anay ken agnanayon a pannakaisubli dagiti nalinteg a tattao ken ti daga a pagtaenganda. (Apocalipsis 11:15) Daytoy ti makagapu nga iti modelo a kararagna, innaig ni Jesus ti iyaay ti Pagarian iti pagayatan ti Dios a maaramid ditoy daga.​—Mateo 6:10.

Para kadagiti adu nga addaan iti pisikal a depekto, nagbalin a lulua ti rag-o dagiti lulua ti ladingit gapu ta naadalda daytoy makapabileg a namnama. (Lucas 6:21) Kinapudnona, saan laeng nga ikkaten ti Dios ti sakit ken pisikal a depekto; pukawenna ti mismo a pakaigapuan ti panagsagaba ti tao​—ti mismo a basol. Gapuna, ti Isaias 33:24 ken Mateo 9:2-7, nga immunan a naadaw, innaigna ti panagsakit iti kinamanagbasoltayo. (Roma 5:12) No kasta, kalpasan a mapagballigian ti basol, matagiragsakton ti sangatauan ti “nadayag a wayawaya ti annak ti Dios,” wayawaya nga iramanna ti kinaperpekto ti panunot ken bagi.​—Roma 8:21.

Dagidiay nakaradkad mabalin a dida marikna ti dakkel a pateg ti panagbalin a nasalun-at. Ngem saan a kasta kadagidiay agsagsagaba iti pisikal a depekto. Ammoda no kasano kapateg ti salun-at ken biag ken no kasano a kellaat ken di mapakpakadaan ti panagbalbaliw ti kasasaad. (Eclesiastes 9:11) Gapuna, namnamaenmi a dagidiay addaan iti pisikal a depekto nga agbasbasa iti daytoy a publikasion ket mangipaay iti di gagangay a panangusig kadagiti nagsasayaat a kari ti Dios kas nairekord iti Biblia. Inted ni Jesus ti biagna tapno mapasingkedan ti kaitungpalan dagita a kari. Ania pay koma a pammatalged ti kasapulantayo?​—Mateo 8:16, 17; Juan 3:16.

[Footnote]