Instrumento a Pangisuro Kadagiti Natauan a Kalintegan

TI ESTUDIANTE nga agtawen iti 17 a ni Rut Jiménez Gila, a taga Granada, España, ket inawis ti maestrana nga agsurat iti salaysay maipapan kadagiti natauan a kalintegan. Sumagmamano a lawas kalpasan a naileppasna ti naituding nga aramidenna, isut’ sinuratan ti grupo dagiti Europeo a mangek-eksamen idiay Brussels, Belgium. Naipakaammo nga isut’ napili, agraman ti dadduma pay nga estudiante a taga España, a mangirepresentar iti pagilianna. Idi agangay, kastoy ti insuratna kadagiti agipabpablaak iti magasin nga Agriingkayo!

“Kasapulak idi ti kabaruan nga impormasion maipapan kadagiti natauan a kalintegan, ket ti ruar ti ‘Agriingkayo!’ a Nobiembre 22, 1998, a ‘Maaddaanto Kadi ti Amin iti Natauan a Kalintegan?,’ ti nangipaay iti eksakto a sapsapulek. Tapno mayilustrar ti pannakaabuso dagiti natauan a kalintegan, nangpiliak met iti impormasion manipud iti dadduma pay nga artikulo ti ‘Agriingkayo!’ maipapan iti masakbayan dagiti babbai ken maipapan iti Holocaust. [Kitaenyo dagiti ruar ti Abril 8, 1998, ken Agosto 8, 1998.] Iti panagsirarakko, naamirisko nga adda impormasion ti ‘Agriingkayo!’ a diak masarakan iti dadduma a magasin wenno reperensia a libro. Nagustuak met dagiti retrato, ket innayonko ti dadduma kadagitoy iti reportko.

“Gapu iti premiado a salaysayko, makalawas a nagyanak idiay Finland, ket nakapagdiskursoak pay sadiay maipapan kadagiti natauan a kalintegan ken nailawlawagko ti kinapateg ti magasin nga ‘Agriingkayo!’ iti panangitampokna kadagiti agkakapateg nga isyu a kas iti daytoy.

“Agyamanak unay ta kanayon nga umun-unakayo a mangipakaammo kadakami maipapan kadagiti pasamak iti lubong. Sapay koma ta itultuloy ni Jehova ti mangbendision kadakayo, tapno minilion a tattao ti magunggonaan iti daytoy nga impormasion.”

[Dagiti ladawan iti panid 15]

Ni Rut ken ti sertipiko ti pannakipasetna