Natibker a Pammati iti Sidong ti Trahedia
DANDANI 60 a tawen ti napalabasen, nakaawat ni Mina Esch iti maysa a postcard manipud ken lakayna, a ni Peter. Ababa ken di maawatan ti naisurat a mensahe. Nupay kasta, naragsakan ken naliwliwa nga immawat iti dayta. Maysa a balud ti lakay ni Mina iti kampo a pagbaludan idiay Buchenwald. Impaibalud sadiay ti gobierno dagiti Nazi gapu ta maysa kadagiti Saksi ni Jehova. Kastoy ti ababa a naisurat iti likudan ti postcard: “Ti balud ket nasukir latta nga Estudiante ti Biblia [kas pangawag idi kadagiti Saksi ni Jehova] . . . Gapu itoy, maiparit kenkuana ti makisinnurat.” Daytoy a mensahe ti nakaammuan ni Mina a ni Peter ket natibker iti pammatina.
Ti postcard, nga agkulkulatlat ken duyawen, ket naipabulod iti Museum of Jewish Heritage—A Living Memorial to the Holocaust, a masarakan idiay Battery Park, New York City. Ti postcard, agraman ti retrato ni Peter Esch, adda bassit ipasimudaagna a paset ti nakas-ang a trahedia ti tao—ti Holocaust—a nakatayan ti innem a milion a Judio. Ti kangrunaan nga eksibit ti museo ket aglaon iti nasurok a 2,000 a retrato ken 800 nga ebidensia a nainaig iti historia ken kultura a mangiladawan kadagiti kapadasan dagiti Judio nanipud dekada 1880 agingga iti agdama, agraman ti Holocaust. Apay a maitutop ti Museum of Jewish Heritage a pakaipakitaan ti surat ni Peter Esch?
“Kalat ti museo nga ipakaammo ti historia dagiti Judio,” inlawlawag ti historiador ti museo a ni Dr. Jud Newborn. “Naidadanes dagiti Saksi ni Jehova gapu iti kina-Saksi ni Jehova-da. Naan-anay a naidadanes dagiti Saksi gapu kadagiti narelihiosuan a patpatienda ken gapu ta dida anamongan ti panangidumduma iti puli, panagsapata iti dakes, nailubongan a diktador. Ket dida patien ti iruprupir ti gubat ni Hitler. . . . Inkagumaan dagiti Judio a taginayonen dagiti prinsipioda ken ti pammatida maibusor iti nakaro a pannakaidadanes. Itandudo ti museo ti kasta a naespirituan a panagkedked. Gapu iti dayta, bigbigen ken dayawen met daytoy nga institusion ti pammati dagiti Saksi ni Jehova kabayatan ti panawen dagiti Nazi.”
Iti temporario a nakaisaadanna iti Museum of Jewish Heritage, adda simple a surat a nangilanad iti pannakidangadang ti maysa a lalaki a nasuot ti kinasungdona ken Jehova. Nalasatan ni Peter Esch ti rigat a sinagabana iti kampo dagiti Nazi a nabileg ti pammatina.
[Ladawan iti panid 31]
Ti Museum of Jewish Heritage, idiay New York City
[Dagiti ladawan iti panid 31]
Ni Esch, maysa kadagiti Saksi ni Jehova a naibalud nanipud 1938 agingga idi 1945 gapu ta dina kayat nga ilusulos dagiti patpatienna