Ti Panangmatmat ti Biblia
Siasino ti Ministro?
IDI bisperas ti sakripisio nga ipapatay ni Jesus, nakaro ti panagsusupiat dagiti kadekketan a gagayyemna. Sigun iti Lucas 22:24, “adda timmaud a nabara a suppiat iti nagtetengngaanda no siasino kadakuada ti kasla kadakkelan.” Saan a daydi ti umuna a gundaway a rimsua ti kasta a panagsusupiat dagiti apostol ni Jesus. Di kumurang a namindua idi a nasken nga ilinteg ni Jesus ti panagpampanunotda.
Anian a nakalkaldaang nga iti daydi a rabii, masapul a palagipan manen ida ni Jesus no ania ti agpayso a pagbalinan koma ti maysa a Kristiano a ministro. Kinunana: “Ti kadakkelan kadakayo agbalin koma a kas ti kaubingan, ket daydiay agak-akem a kas panguluen kas koma iti daydiay agserserbi.”—Lucas 22:26.
Ditay koma masdaaw nga adda di umiso a kapanunotan dagiti apostol maipapan iti kinapateg ti saad ken kinatan-ok. Sakbay a nakikaduada ken Jesus, dagiti eskriba ken Fariseo ti kangrunaan a modeloda iti narelihiosuan a panangidaulo. Imbes nga iwanwan ken tarabayenda dagiti tattao iti naespirituan, impaalagad dagitoy a palso a ministro dagiti nainget a tradision ken pagannurotan a ‘pangrikepda iti pagarian ti langlangit iti sanguanan dagiti tattao.’ Tattaoda nga interesado unay iti saad, kinatan-ok, ken panangpennek kadagiti bukodda a tarigagay a nangibanag iti adu a trabahoda “tapno maimatangan dagiti tattao.”—Mateo 23:4, 5, 13.
Baro a Kita ti Ministro
Nupay kasta, insuro ni Jesus kadagiti adalanna ti baro a konsepto ti naespirituan a ministerio. Insurona: “Dikay maawagan iti Rabbi, ta maymaysa ti mannursuroyo, yantangay agkakabsatkayo amin. Mainayon pay, dikay naganen nga amayo ti asinoman ditoy daga, ta maymaysa ti Amayo, Daydiay nailangitan. . . . Ngem daydiay kadakkelan kadakayo masapul nga agserbi kadakayo.” (Mateo 23:8-11) Rumbeng a saan a tuladen dagiti adalan ni Jesus ti papanguluen ti relihion idi kaaldawanda. No kayatda ti agbalin a pudno a ministro, nasken a tuladenda ni Jesus. Ania nga ulidan ti impakitana?
Masansan nga usaren ti Biblia ti Griego a sao a di·aʹko·nos para iti “ministro.” Ilawlawag ti The Encyclopedia of Religion nga irepresentar daytoy a sao “saan a ti takder no di ket ti panagserbi ti ministro iti daydiay pagserbianna: ti panangsurot iti ehemplo ni Kristo . . . ti kapatgan iti Nakristianuan a pannakaawat iti ministerio.”
Maitunos iti umiso a kaipapanan ti sao a “ministro,” inted ni Jesus ti amin nga adda kenkuana a timmulong kadagiti sabsabali. “Ti Anak ti tao immay,” siaanus nga inlawlawagna, “saan a tapno pagserbian, no di ket tapno agserbi ken tapno itedna ti kararuana a subbot a kasukat dagiti adu.” (Mateo 20:28) Saan a siaagum nga inusar ni Jesus ti panawen, pigsa, ken laingna a timmulong kadagiti sabsabali iti pisikal ken naespirituan. Apay? Agsipud ta naasian kadagiti naabuso iti naespirituan nga umariwekwek a nagaaripuno tapno mapanda kitaen. Kayatna ti tumulong. Ti naparabur a panagayat ti nakatignayanna iti ministeriona, ket kayatna nga ipakita dagiti adalanna ti kasta met laeng a kinamanagparabur.—Mateo 9:36.
Iti unos ti panagbiag ni Jesus, nangipakita iti ulidan para kadagiti ministro iti masakbayan. “Ti anien dakkel,” kinunana, “ngem bassit dagiti managobra. Ngarud, ipakaasiyo iti Apo ti panagani a mangibaon kadagiti managobra iti panaganina.” (Mateo 9:37, 38) Wen, masapul nga agbalin a trabahador dagiti ministro ni Kristo iti kadakkelan a trabaho a maimatangan ti lubong—panangipaay iti naespirituan a liwliwa iti intero a sangatauan babaen ti panangasaba ken panangisuro iti naimbag a damag ti Pagarian ti Dios.—Mateo 28:19, 20.
Daytoy a panangipamaysa iti panangted ken panagserbi iti kasapulan ti sabsabali ti gapu a naisalsalumina unay ti wagas ti panagministro ni Kristo. Sinuruanna dagiti ministrona nga agbalinda a trabahador, naespirituan a mangngalap ken pastor, saan a pasurot ti inaanito a panagbiag ken de adal a siaaruat iti espesial ken agkakangina.—Mateo 4:19; 23:5; Juan 21:15-17.
Ti Panangmatmat ti Biblia
Nakalkaldaang ta iti panaglabas dagiti siglo, nabalbaliwan ti agpayso a kaipapanan daytoy natan-ok, di agimbubukod a konsepto dagiti ministro kas managsakripisio a manangaskasaba ken mannursuro. Ti nangrugi kas Nakristianuan a ministerio ket nagbalin a pormal, natan-ok nga institusion. Timmaud dagiti orden ken ranggo, ket naipaayanda iti dayaw ken pannakabalin ket masansan a nagurnongda iti dakkel a kinabaknang. Daytoy ti nangparnuay iti adu a panagsisina. Nabuangay ti klase klero a nangnangruna a naipamaysa iti panangtarawidwid kadagiti narelihiosuan a sakramento ken panangbagbaga kadagiti agkamali. Kadagiti simmaganad a siglo, ti dati nga aktibo a Kristianidad a ti amin ket ministro ket nagbalin a di aktibo nga addaan laeng iti manmano a nasanay a naimbag ken mabigbigbig a tattao a makabael a mangasaba ken mangisuro.
Nupay kasta, iyam-ammo ti Biblia ti Kristiano a ministro, saan a babaen ti naidumduma nga aruaten, nalabor a ritual, sueldo, wenno pammilin ti gobierno, no di ket babaen ti awanan agum a panagtrabahona. Imbalabala ni apostol Pablo ti kababalin a nasken nga ipakita dagiti Kristiano a ministro. Pinaregtana ida ‘nga awan ti aniaman nga aramidenda gapu iti panangipasindayaw iti bagi, no di ket buyogen ti kinapakumbaba iti isip.’—Filipos 2:3.
Talaga nga inyaplikar ni Pablo ti inkasabana. Babaen ti panangtuladna a naimbag iti ulidan ni Kristo, pulos a ‘dina sinapul ti bukodna a pagsayaatan no di ket ti pagsayaatan ti adu, tapno maisalakanda koma.’ Naawatan ken nabigbigna a rebbengenna nga ‘ideklara ti naimbag a damag nga awan bayadna,’ kas kinunana, “agpaay iti panggep a diak aramaten iti aglablabes ti kinaturayko iti naimbag a damag.” Isut’ saan a ‘nagsapul iti dayag manipud kadagiti tattao.’—1 Corinto 9:16-18; 10:33; 1 Tesalonica 2:6.
Anian a nagsayaat a modelo ti pudno a Kristiano a ministro! Dagidiay a tumulad iti nagsayaat nga ulidanna ken magna a di agimbubukodan a kas iti impakita ni Jesu-Kristo, babaen ti panangipaayda iti bagida nga awan bayadna tapno maipaayda ti naespirituan a tulong ken liwliwa ti naimbag a damag kadagiti sabsabali, ipakpakitada a pudnoda a ministro ti Dios.—1 Pedro 2:21.