Ageroplanoka a Sitatalged!
“Agarup maminsan iti kada lawas a mapasamak dagiti panagibakuit manipud kadagiti pangpasahero nga eroplano,” kuna ti report ti USA Today. Nupay kaaduan kadagitoy ti saan a nakaro nga insidente wenno palso a pakdaar, nalabit nalaklaka nga amang ti panagibakuit no aramidem dagiti sumaganad a singasing:
● AGKAWESKA ITI UMISO. Agkaweska iti komportable ken mangipalubos a nawaya ti panaggarawmo. No mabalin, agkaweska iti mangabbong iti kaaduan a paset ti bagim. Maisingasing ti panagpantalon ken panagkamisadentro wenno panagblusa iti atiddog dagiti manggasna. Agkaweska kadagiti naaramid iti natural a tela, kas iti cotton, de-lana, maong, ken lalat. Marunaw dagiti sintetiko, kas iti rayon, polyester, ken nylon (nangnangruna ti stocking), no mapudotan, a pakaigapuan ti nakaro a pannakauram ti bagi ken gurong.
● ISAGANAM TI PANUNOTMO. Panunotem ti aramidem no adda emerhensia. Apaman a nakatugawkan, kitaem ti kaasitgan a pang-emerhensia a ridaw, iti masungad ti ayanmo nga intar wenno iti malikudanna. Dumngegka iti apagbiit a panangilawlawag ti flight attendant kadagiti instruksion sakbay ti panagbiahe. Repasuem ti kard a mangisuro iti natalged nga aramidem ken kadagiti detalye maipapan kadagiti pamay-an ti panagibakuit.
● AGKALMAKA. No adda emerhensia, agkalmaka ken tungpalem ti instruksion dagiti tripulante iti eroplano. No kasapulan ti panagibakuit, mapanka iti kaasitgan a pang-emerhensia a ridaw. Ibatimon dagiti gargaretmo.
● SIAANNAD A RUMMUARKA ITI EROPLANO. Aglagtoka nga umuna dagiti sakam iti paguyasan imbes nga agtugawka nga aguyas. Agdalikepkepka. Pagsimpaem dagiti sakam, ket ikkatem dagiti sapatosmo a nangato ti takonda. Apaman a nakaulogkan, panawam ti eroplano, ken kanayonka nga agalerto para kadagiti pang-emerhensia a lugan.
Makatulong kadi ti panangyaplikar kadagitoy a pagannurotan a mangkissay iti bilang dagiti matay? Wen! “Saan a makapapatay ti amin nga aksidente iti eroplano,” kuna ti pagiwarnak ti Federal Aviation Administration nga Intercom. Kunana pay: “Agarup 50 a porsiento kadagiti amin a matay iti pangpasahero nga eroplano ti mapasamak kadagiti aksidente a mabalin a malasatan.”