Ammoyo Kadi?

(Masarakan dagiti sungbat daytoy a pannubok kadagiti naipaay a teksto ti Biblia, ket nayimprenta iti panid 21 ti kompleto a listaan dagiti sungbat. Para iti kanayonan nga impormasion, kitaenyo ti publikasion nga “Insight on the Scriptures,” nga impablaak dagiti Saksi ni Jehova.)

1. Sigun ken Pedro, ania a kalidad ti masapul nga ipakita ti tao tapno magun-odanna ti di kaikarian a kinamanangngaasi ti Dios? (1 Pedro 5:5)

2. Kalpasan ti pito nga aldaw a panagturay ti maikalima nga ari ti Israel a ni Zimri, siasino ti dua a lallaki a nakidangadang nga agtugaw iti trono kabayatan ti uppat a tawen a gerra sibil? (1 Ar-ari 16:21)

3. Ania ti nagamkan dagiti Israelita, isu a nagkitakitda a sumrek iti Naikari a Daga? (Numeros 13:28, 31-33; Deuteronomio 1:28)

4. Ania ti kadakkelan kadagiti pagtimbangan ken gatad ti kuarta dagiti Hebreo? (Esdras 8:26)

5. Ania ti impambar ni Felix idi pinaayabanna ni Pablo, ngem ania a talaga ti ur-urayenna? (Aramid 24:24-26)

6. Ania ti impanagan ni Jesus a mangdeskribir agpadpada iti bagina ken kadagiti pasurotna? (Mateo 5:14; Juan 8:12)

7. Ania a nagan ti agaplikar laeng ken Jesus ket saan a kadagiti pasurotna? (Mateo 23:10)

8. Ania a sasao ti inusar ni Santiago a pangtukoy iti ambision, kinaprominente, ken pannakabalin? (Santiago 4:1)

9. Ania a material a pagbangon ti kangrunaan a nausar iti palasio dagiti Persiano idiay Susan? (Ester 1:6)

10. Sigun ken Juan, ania a tallo a nailubongan a banag ti “saan nga agtaud iti Ama”? (1 Juan 2:16)

11. Idi inlista ni Pablo ti naespirituan a kabal ti maysa a Kristiano, ania a paset ti mangirepresentar iti pannakaisalakan? (Efeso 6:17)

12. Siasino ti nadakamat a nangpadayaw iti annakna a nangnangruna ngem ni Jehova? (1 Samuel 2:27-29)

13. Ania ti maikalima a letra iti Hebreo nga alpabeto? (Salmo 111:3)

14. Iti ania a bulan iti kalendario dagiti Judio a rinugian ni Solomon ti pannakaibangon ti templo? (1 Ar-ari 6:1)

15. Siasino a Kristiano a propeta ti nagipadto maipapan iti masakbayan idi a pannakaaresto ni Pablo idiay Jerusalem? (Aramid 21:10, 11)

Dagiti Sungbat ti Pannubok

1. “Kinapakumbaba iti panagpampanunot,” wenno kinapakumbaba

2. Da Tibni ken Omri

3. Ti ‘nalablabes a kadakkel’ ken kinapigsa dagiti umili

4. Ti talento

5. Tapno dumngeg maipapan iti “panamati ken Kristo Jesus”; pasuksok

6. “Ti silaw ti lubong”

7. Panguluen

8. ‘Panaggartem iti linalasag’

9. Marmol

10. “Ti derrep ti lasag,” “ti derrep dagiti mata,” ken “ti panangiparammag iti sanikua a pagbiag ti maysa”

11. Ti kabal ti ulo

12. Ti Nangato a Padi a ni Eli

13. Heʼ

14. Ziv

15. Agabo