Kamchatka—Naisangsangayan a Pagilian ti Russia iti Pacifico
BABAEN ITI MANNURAT TI AGRIINGKAYO! IDIAY RUSSIA
NASUROK a tallo gasut a tawenen ti napalabas, dagiti agpadpadaya a managsirarak a lumasat iti Asia dimtengda iti kabambantayan a peninsula a dimmawadaw iti abagatan ti Taaw Pacifico, a namagsina iti Sea of Okhotsk ken ti Bering Sea. Daytoy a daga, a dakdakkel bassit ngem iti Italia, nakaskasdaaw ti kinapintasna ngem saan a nalatak kadagiti ganggannaet.
Nalamlamiis ti panniempo no panawen ti lam-ek iti makin-uneg a lugar iti Kamchatka ngem iti igid ti baybay. Dadduma a makin-uneg a deppaar ti maabbungotan iti niebe nga 6 a metro ken no dadduma 12 a metro ti kapuskolna! Bayat ti kalgaw, masansan a naangep iti peninsula ken napigsa ti angin. Gapu ta masansan a matuduan ti bulkaniko a daga ti Kamchatka, nalasbang dagiti agtubo a mulmula, a pakairamanan dagiti babassit a kayo nga agbunga, ruot a kas katayag ti tao, dagiti nagpipintas nga atap a sabong, kas iti rosas a maawagan iti reyna ti kapatagan.
Sinaknapan ti Stone, wenno Erman’s birch tree ti dandani kakatlo ti peninsula. Agbayukyok dagiti puon ken sangsangada gapu kadagiti napipigsa nga angin ken nakaro a niebe. Naisangsangayan ti kinalagda dagitoy a kayo nupay nabayagda a dumakkel, ken nakabbeng ti ramutda isu nga agtuboda iti dandani amin a lugar—uray pay iti bakras! Agrusingda iti Hunio, uray adda pay niebe, ket iti Agosto agbalin a duyaw ti bulongda, a mangipakaammo a dandanin ti kalam-ekna.
Dagiti Bulkan, Burayok, ken Napudot nga Ubbog
Masarakan ti Kamchatka iti Ring of Fire―dagiti kanayon a maginggined a lugar a nanglawlaw iti Taaw Pacifico. Addaan ti Kamchatka iti agarup 30 nga aktibo a bulkan. Ti bulkan a Klyuchevskaya, a nailadawan a “naan-anay ken nakapimpintas ti balisungsongna,” ket 4,750 a metro ti kangatona iti ngatuen ti patas ti baybay, isu a daytoy ti kadakkelan nga aktibo a bulkan iti Eurasia. Sipud idi dimteng dagiti managsirarak a Ruso iti Kamchatka idi 1697, nasuroken nga 600 a panagbettak ti nairekord iti peninsula.
Gapu iti panagbettak idi 1975 ken 1976, adda kasla umap-apuy a “silaw” a nasurok a 2,500 a metro ti kangatona kadagiti rengngat iti Tolbachik! Agrimat dagiti ulep a dapo. Timmaud ti uppat a kabbaro a bulkan gapu iti awan sardayna a panagbettak iti dandani makatawen ket kagudua. Napukaw dagiti dan-aw ken karayan, ket dagiti napudot a dapo inramutda nga inuram ti intero a kabakiran. Nagbalin a desierto ti naglawa a paset ti probinsia.
Naimbag laengen ta awan ti agnanaed iti kaaduan a lugar a nakapasamakan ti panagbettak, ket manmano ti tao a natay. Ngem masapul met nga agannad dagiti bisita, nangruna no mapanda iti Valley of Death, nga adda iti sakaanan ti bulkan a Kichpinych. No awan ti angin, ken nangruna no marunrunaw ti yelo iti primavera, adu ti makasabidong a gas iti ginget, isu a matay dagiti atap nga animal. Iti naminsan, naiwalang dagiti bangkay ti sangapulo nga uso ken adu a babbabassit pay nga animal.
Iti nalawa a wangawangan ti bulkan a naawagan iti Uzon caldera, makita ti agburburek a likkaong ti pitak ken agal-alingasaw a dan-aw. Addaan daytoy iti nagadu nga alga a nadumaduma ti kolorda. Masarakan iti dayta met la a lugar ti Valley of Geysers, a natakuatan idi 1941. Pumsuak ti dadduma a burayok iti kada dua agingga iti tallo a minuto, ken ti dadduma iti sumagmamano nga aldaw. Idanon dagiti helikopter dagiti bisita kadagitoy a nakaskasdaaw a lugar, a masarakan iti agarup 180 a kilometro iti amianan ti siudad ti Petropavlovsk-Kamchatskiy. Nupay kasta, nainget a makedngan ti kaadu ti bisita tapno mataginayon ti kinatimbeng ti ekolohia. Dayta ti makagapu nga innem a lugar iti Kamchatka ti masalsalakniban kas World Heritage Sites.
Adu dagiti napudot nga ubbog iti Kamchatka. Adu kadagitoy ti 30 °C agingga iti 40 °C ti barana, banag a makaay-ayo kadagiti bisita ken mangyeg iti baro a klima kalpasan ti napaut, nalamiis a bulbulan ti kalam-ekna. Maus-usar met ti pudot a geothermal tapno mangpataud iti koriente. Kinapudnona, naibangon iti daytoy a peninsula ti umuna a geothermal a planta ti koriente ti Russia.
Dagiti Uso, Salmon, ken Agila iti Baybay
Agarup 10,000 nga uso a kadawyan a maawagan iti ‘grizzly bear’ (maysa a kita ti uso nga ursus arctos beringianus) ti masarakan iti Kamchatka. Agdagsenda iti 150 agingga iti 200 a kilo. Ngem no saanda a maanup, mabalin a dumakkelda iti dandani mamitlo a daras dayta a kadagsen. Sigun iti estoria dagiti katutubo nga Itelmen, “kabsatda” dagiti uso, isu a raemenda dagitoy nga animal. Ngem saanen a kasta ti panangmatmatda idi naguso ti paltog. Madanagan dagiti mangsalsalaknib kadagitoy nga animal di la ket ta maungawto dagitoy.
Naatap dagiti uso isu a manmano a makita ida. Ngem iti Hunio, no agitlogen dagiti salmon kadagiti karayan, adu ti umay mangan kadagiti lames. Kabaelan nga ibusen ti maysa nga uso ti dua dosena a salmon! Apay a nakarawrawetda? Ngamin, bayat ti kalgaw, agurnong dagiti uso iti taba a pangsustinerda iti bagida bayat dagiti nalamiis a bulbulan ti lam-ek ken nakirang ti taraon. Kabayatan dagitoy a tiempo, maturogda kadagiti rukib tapno saan a dagus a maibus ti pigsada.
Ti Steller’s sea eagle, maysa a tumatayab a 2.5 a metro ti payakna no nakaukrad, ti sabali pay nga animal a narawet iti salmon. Dandani nangisit amin ti kolorna, ngem adda puraw a labangna iti abaga ken kasla singat ti puraw nga ipusna. Agarup 5,000 laengen ti bilangda ken bumasbassit pay. Iti daytoy laeng a rehion iti lubong ti pakasarakan kadagitoy nga agila ken no dadduma, iti Aleutian ken Pribilof nga isla ti Alaska. Maymaysa ti pagumokan dagiti tumatayab iti kada tawen. Tarimaanen ken nayonanda laeng dayta. Maysa nga umok ti dimmanon iti 3 a metro ti diametrona ket dimmagsen unay isu a naspak ti nagsaadanna a sanga ti kayo a birch!
Dagiti Umili iti Kamchatka
Nupay Ruso ti kaaduan nga umili iti Kamchatka ita, adda sumagmamano a ribu a katutubo nga umili a kas kadagiti Koryak, ti kadakkelan a grupo dagiti katutubo ken agnanaed iti amianan. Adda met ti grupo dagiti Chukchi ken Itelmen. Tunggal maysa kadagitoy ti addaan iti bukodda a lenguahe. Kaaduan kadagiti agindeg iti Kamchatka ket agnanaed iti Petropavlovsk-Kamchatskiy, ti ayan ti administrasion. Manmano ti tao iti dadduma a paset ti peninsula, ken madanon laeng babaen ti bilog wenno eroplano ti kaaduan nga igid ti baybay ken karayan.
Panagdaklis ken panagala iti rasa ti kangrunaan a panggedan. Nakalatlatak dagiti dadakkel a nalabaga a rasa ti Kamchatka. Gapu ta 1.7 a metro ti kaatiddogda manipud iti maysa nga ipit agingga iti sabali, makapainteres ken makaawis dagitoy kadagiti lamisaan a paglakuan.
Sipud idi 1989, mapmapan idiay Kamchatka dagiti Saksi ni Jehova gapu iti sabali a kita ti panagdaklis. Kas “dumadaklis iti tattao,” idandanonda ti naimbag a damag ti Pagarian ti Dios kadagiti naiputputong a tattao iti Kamchatka. (Mateo 4:19; 24:14) Dadduma ti nagtignay ket dagitoy ti tumultulong ita kadagiti sabsabali tapno maam-ammo ken maidaydayawda ti Namarsua, ni Jehova a Dios, imbes nga iti pinarsuana. Nagbanaganna, adu nga umili ti nawayawayaan iti panagbuteng kadagiti dakes nga espiritu. (Santiago 4:7) Naammuanda met ti mapasamakto iti masanguanan inton ti intero a daga, a nadalusanen kadagiti amin a dakes ken managdakdakes, “mapnonto iti pannakaammo ken Jehova kas iti dandanum abbonganda ti mismo a baybay.”—Isaias 11:9.
[Kahon/Dagiti Ladawan iti panid 18]
NAISANGSANGAYAN A CALDERA
Ti Uzon caldera, a wangawangan ti nagkauna a bulkan, ket agarup 10 a kilometro no ballasiwen. Sigun iti maysa a reperensia, “masarakan kadagiti napasdok a bakrasna ti amin a banag a paglatakan ti Kamchatka.” Ti kapataganna ket addaan kadagiti napudot ken nalamiis nga ubbog, dagiti agburburek a pitak, dagiti bunton a pitak a nanglikmut iti napudot nga ubbog wenno burayok, nalitnaw a dan-aw nga aduan iti lames ken kalamon, ken adu a mula.
Kuna ti libro a Miracles of Kamchatka Land a “dandani awanen ti sabali a lugar ditoy Daga” a sadiay nakapimpintas ti otonio nupay ababa laeng. Ti lumabaga a daga ket maisupadi unay iti natayengteng a duyaw ken bimmalitok a kayo a birch, ken iti intero a lugar agalingasaw ti agburburek a pitak a nakakadkadlaw no maidilig iti natayengteng nga asul a langit. Ket iti parbangon, kasla “agkanta” ti kabakiran no agregreg ti adu a bulong a nabalkot iti niebe, a mangipakaammo a dandanin ti kalam-ekna.
[Kahon iti panid 19]
MAKAPAPATAY A DAN-AW!
Idi 1996, maysa a bulkan a naipagarup a natayen ti bimtak iti tukok ti Dan-aw Karymsky, a nangpataud iti 10 a metro nga allon a nangpatag kadagiti kabakiran iti aglawlawna. Iti sumagmamano laeng a minuto, immalsem unay ti dan-aw isu a saannan a masustiner ti biag dagiti adda iti dan-aw. Nupay kasta, awan ti nasarakan a natay nga animal iti asideg ti dan-aw iti laksid ti adu a nagayus a rugit manipud iti bulkan ken dagiti allon a nanglapunos iti igid ti baybay, kuna ti managsirarak a ni Andrew Logan. Kinunana a “sakbay a nagbettak, sumagmamano a milion a lames (nangruna dagiti salmon ken dalag) ti pagaammo nga agbibiag iti Dan-aw Karymsky. Kalpasan ti panagbettakna, awanen ti makapagbiag iti dan-aw.” Ngem mabalin nga adu a lames ti nakalasat. Patien dagiti sientista nga adda pagilasinan—nalabit ti panagbalbaliw iti kemika ti danum—a nangpakdaar kadagiti lames, isu nga immakarda iti asideg a Karayan Karymsky.
[Mapa iti panid 16]
(Para iti aktual a pannakaurnosna, kitaem ti publikasion)
RUSSIA
KAMCHATKA