Manipud Kadagiti Agbasbasa
Krisis iti Danum—Dagiti Panangikagumaan a Mangrisut (Enero 2009) Diak magustuan ti nagnguduan daytoy nga artikulo. Imbes nga iparegtayo kadagiti agbasbasa a tulonganda ti sabsabali babaen iti panagaramidda kadagiti bubon, panangsuportada kadagiti programa iti panaginut iti danum, wenno uray ti ad-adda pay a panangbirok iti solusion dayta a problema, kuna ti artikulo: “Ti pudno a solusion mainaig iti krisis ti danum ket agpannuray iti Dios, saan nga iti tao,” ken panggep met ti Dios a “‘pagbalinen a baro ti amin a bambanag.’ (Apocalipsis 21:5)” Makaparegta met ketdi dayta a damag ngem saan ngata a nasaysayaat a tumulongtayo pay laeng bayat nga ur-urayentayo dayta? Nagadu ti problema ditoy lubong. Nupay sigurado nga addan dagiti solusion nga implano ti Dios, saantay a basta agur-uray lattan nga awan ti ar-aramidentayo bayat a manarimaan ti Diablo iti ar-aramidenna.
S. S., Estados Unidos
Sungbat ti Agriingkayo!: Ti kangrunaan a panggep ti nadakamat nga artikulo ket saan a tapno ipasimudaag nga awan pagrebbengan ti tattao a mangpasayaat kadagiti agdama a kasasaad. Kas dinakamat ti artikulo, “intalek ti Dios kadagiti tattao ti pannakaaywan daytoy a planeta.” Gapuna, adun nga artikulo ti impablaakmi kadagiti publikasionmi a mangiparparegta kadagiti agbasbasa a pagreggetanda a salakniban ti aglawlaw ken di sayangen dagiti gameng ti daga. Ngem nakalkaldaang ta masansan a malapdan ti panagregget ti tao a mangsalaknib iti daga gapu kadagiti linteg nga ad-adda a mangpabor iti iyaasenso ti ekonomia imbes nga iti pannakasalaknib ti aglawlaw. Kanayonanna, nainkasigudan ti kinaagum ken kinamanagimbubukodan ti imperpekto a sangatauan. Dayta ti rason no apay a nakunami a “ti pudno a solusion iti krisis ti danum ket agpannuray iti Dios, saan nga iti tao.”
Daga—Nadisenio a Pagbiagan (Pebrero 2009) Iti tiempo a bin-ig a makapadanag ti isursurat ti media maipapan iti panagbara ti globo, talaga a timmalna ti panunotko idi nabasak daytoy a serye. Naparegtaak met unay ta naraniag gayam ti masakbayan ti daga iti pisikal ken naespirituan ta agbalinto a paraiso a sitatalna a pagnaedan dagiti tattao. Agyamanak unay.
M. H., Japan
Saan a Makalapped Kaniak ti Dyslexia (Pebrero 2009) Addaanak met iti dyslexia, ken nakalkaldaang ta sa la naammuak ti kakaro ti sakitko idi naibaonkami ken baketko kas misionero ken agsursurokamin iti sabali a lenguahe. Napabilegak unay iti dayta nga artikulo, nangruna iti kahon iti panid 22, a timmulong kaniak a mangtarus iti klase ti sakitko. Naparegtaak iti naballigi a panagsursuro ni Michael Henborg iti adu a lenguahe. Pagyamanan unay.
M. M., Tanzania
Agimtuod Dagiti Agtutubo . . . Kasano a Matagiragsakko ti Panagbasak iti Biblia? (Abril 2009) Adda depekto ti panagkitak, ken agus-usarak iti Braille iti eskuelaan. Magustuak unay dagiti publikasionyo, ta tumultulong kaniak a mangsaranget iti adu kadagiti problemak. Kadawyanna a dumngegak kadagiti cassette tape ken audio CD-yo isu a nasayaat dagiti pampanunotek sakbay a maturogak. Saan la a naminlima nga inimdengak daytoy nga artikulo ket adda dagiti nasursurok a pangpasayaat iti personal a panagadalko.
S. H., Francia