Alisto a Panganan Dagiti Insekto

● Magusgustuan dagiti insekto ti mangan iti alisto a masarakan ken aduan iti calorie. Ti nagsayaat a pakasarakanda iti dayta ket iti tengnga ti sabong. Kas kadagiti restawran nga alisto a panganan, agpadlaw dagiti sabong babaen kadagiti natayengteng a kolorda. Gapu ta maallukoy dagiti insekto, agdisso dagitoy iti sabsabong tapno makaduomda iti pollen ken makasusopda iti nektar.

Kalpasan ti nalamiis nga agpatnag, aglaladut dagiti insekto. Agbaliwbaliw ti temperatura ti bagi dagitoy a parsua sigun iti temperatura ti aglawlaw isu a kasapulanda ti bara ti init tapno sumarantada manen. Saan la a nasustansia a taraon ti ipapaay kadakuada ti adu a sabong no di pay ket disso a pagkainaranda. Kitaentayo ti maysa a pamiliar a pagarigan.

Ti oxeye daisy ket pamiliar a sabong a masarakan iti kaaduan a paset ti Europa ken Amianan nga America. Kasla gagangay laeng dayta, ngem no sukimatem, adu ti makitam a mapaspasamak iti dayta. Daytoy a daisy ket nagsayaat a pagmurmurayan dagiti insekto. Iyanninaw dagiti puraw a petalo ti bara ti init. Ti met duyaw a tengngana ket nagsayaat a paginanaan dagiti insekto bayat nga agkakainaranda.a

Ad-adda pay a maimasan dagiti insekto ti idadap-awda ta ti tengnga ti sabong ti daisy ket namsek iti pollen ken nektar a nasustansia a taraon ti adu nga insekto. Sadino koma pay ti nasaysayaat a pakasarakan ti insekto iti naimas a pamigatna ken pagpainitanna?

Gapuna, agsasaruno dagiti insekto nga agdisso iti daisy iti agmalem. Nalabit maimatangam dagiti abal-abal, namaris a kulibangbang, dangaw, kuriat, ken dadduma pay nga insekto. Siempre, no saanka a managpaliiw, dimo pulos madlaw dagitoy makaay-ayo nga alisto a panganan dagiti insekto.

Iti sumaganad ngarud a panagpasiarmo iti away, apay a dimo ikagumaan a paliiwen ti sumagmamano kadagitoy a saan unay a nakadkadlaw a sistema ti ekolohia iti daisy? No aramidem dayta, mabalin nga umuneg ti panangapresiarmo iti Namarsua a nangdisenio amin kadagita.

[Footnote]