Panangmatmat iti Lubong
“Dagiti saan nga agsigsigarilio, kanayon a mawatwat ti bagida, kalkalainganna ti panaginumda iti arak, ken inaldaw a mangan iti di kumurang a lima a dasar ti prutprutas ken natnateng ket napapaut ti biagda iti promedio a 14 a tawen ngem kadagidiay saan a kasta ti ar-aramidenda.” Dayta a konklusion ket naibasar iti 11 a tawen a panagadal iti 20,000 a tattao.—UC BERKELEY WELLNESS LETTER, U.S.A.
“Panagbasa ti kasayaatan a panagrelaks . . . Uray innem a minuto laeng ket makaanayen a mangpukaw iti dandani amin a marikriknam a panagsikor.”—INDIA TODAY INTERNATIONAL, INDIA.
Nabaybay-an nga “Abalbalay”
Kuna ti The New York Times nga idiay Estados Unidos, “nagadu ti nabaybay-an a barangay gapu iti panagsuek ti ekonomia.” Dagiti makinkua lihaenda ti nagan dagiti barangayda, ikkatenda dagiti numero ti rehistro, sada baybay-an wenno palneden dagita. Kasta ti aramiden ti dadduma tapno makaalada iti kuarta iti insurance. Apay a mapaspasamak dayta? “Dadduma . . . ket addaan iti parikut a kas kadagiti bumalay a dandanin maembargo ti balayda: dakkel ti baybayadanda iti sanikua a bumabbaban ti balorna isu nga ikeddengdan nga isardeng ti agbayad,” kuna ti Times, a nangdeskribir kadagiti barangay kas “nangina ti pannakamantenerna ken nagum-umaandan nga abalbalay.” Inlawlawag ti diario: “Dagita ket saan a mailako dagiti makinkukua ta nagadun ti mailaklako a segundamano. Didan kabaelan ti aggasto iti ginasut a doliar iti binulan para iti pannakamantener dagita ken abang iti nakaisangladanda. Awananda met iti rinibu a doliar a kasapulan iti umiso a panangdespatsar kadagita.”
Panangmatmat Dagiti Ubbing iti Pammagida
Sigun iti Sunday Telegraph idiay Sydney, dagiti ubbing nga uppat pay la ti tawenda ket “padpadasendan a balbaliwan ti langada tapno maipada iti pammagi a magusgustuan ti kagimongan.” Iti maysa a panagadal iti kababalin iti pannangan ken panagehersisio dagiti ubbing, natakuatan nga agpadpada a maseknan dagiti babbai ken lallaki iti pammagida—kayat dagiti babbai ti agpakuttong ken kayat met dagiti lallaki ti agpabaked. “Kasla tultuladen dagiti ubbing ti panangmatmat dagiti innada a kaaduan kadakuada ket saan a mapnek iti pammagida,” kuna dagiti nangaramid iti dayta a panagadal.
Ubbing nga Aggatang Babaen iti Internet
“[Iti United Kingdom], 1 iti kada 5 nga ubbing ti gumatgatang babaen iti Internet nga awan ti pammalubos ti nagannakda ken kagudua kadakuada ti agus-usar kadagiti credit card ti nagannakda,” kuna ti Daily Telegraph ti London. Adu nga ubbing ti makaammo kadagiti site ken password nga us-usaren ti nagannakda no gumatangda babaen iti Internet—isu a mabalin a nalakada a maammuan ken mausar ti numero ti credit card ti nagannakda. Manmano a nagannak ti mangipagarup a maitured ti annakda ti gumatang babaen iti Internet nga awan ti pammalubosda. Ti ipagarup dagiti nagannak nga ammo ti annakda ket “makapadanag ti naggidiatanna” iti talaga nga ammo ti annakda, kuna ti report. Maysa kadagiti pagbanagan ti kasta a kababalin ket posible a mabiktima dagiti nagannak iti panangallilaw. Daytoy ti balakad kadagiti nagannak nga aggatgatang babaen iti Internet: “Liklikanyo a pagtalinaeden iti Internet ti numero ti credit wenno debit card-yo,” agusarkayo laeng kadagiti mapagtalkan a Web site, ken “ag-log out kadagiti site no nalpasen ti panaggatangyo.”