Panangmatmat iti Lubong
“Makatulong dagiti selpon no dimo kayat ti makisarita—13% kadagiti addaan selpon ti agin-uusar kadagita tapno maliklikanda ti makisarita kadagiti adda iti aglawlawda.”—PEW RESEARCH CENTER, U.S.A.
Bayat ti napalabas a lima a kalgaw, nailista ti lima a kababaan pay laeng a rekord ti sukat ti yelo iti baybay ti Arctic.—BBC NEWS, BRITAIN.
“Di pay nakutkuti ti agarup 47% iti mabalin a talonen a daga idiay Africa.”—THE WITNESS, SOUTH AFRICA.
“Iti napalabas a 10 a tawen, pinagbalinen ti 10 a pagilian (Netherlands, Belgium, Canada, Spain, South Africa, Norway, Sweden, Portugal, Iceland, ken Argentina) a legal ti panagasawa dagiti agpada iti sekso.”—FAMILY RELATIONS, U.S.A.
Di Mapunas nga Epekto ti Panagaapa
Sigun iti surbey idiay Northern Ireland, di mapunas ti epekto sadiay ti napolitikaan ken narelihiosuan a panagaapa a maawagan iti “the Troubles.” Nagpaut dayta iti agarup 30 a tawen ken nakaigapuan ti nakaro a panagsagaba ti agarup 67% iti populasion. Naammuan ti University of Ulster’s Bamford Centre for Mental Health and Wellbeing nga agarup 1 iti kada 10 nga umili ti Northern Ireland ti nagpasar iti post-traumatic stress disorder. Dayta ti “maysa kadagiti kangatuan a bilang” iti lubong, kuna ti The Irish Times. Kuna pay ti diario a no mapagdilig ti bilang dagiti naapektaran ken ti populasion, ti “the Troubles ket karaman kadagiti kakaruan a dangadang iti lubong, a nakatayan ti 1 iti kada 500 a tao iti populasion.”
“Normalen” ti Abnormal a Paniempo
Umad-adu a karkarna a paniempo ti mapaspasaranen ti United States. “Normalen” ti dati a maibilang nga abnormal kas iti dadakkel a layus, makapapatay a tikag, ken sobra a panagbagyo iti niebe. Iti komperensia nga inorganisar ti Union of Concerned Scientists, kinuna ti eksperto iti klima iti Texas Tech University a ni Katharine Hayhoe kadagiti katrabahuanna: “Nairuamtayon iti dadduma a kasasaad ken nagadun ti mapaspasamak ita a ditay sigud a mapaspasaran.” Patien ni Hayhoe ken ti dadduma nga eksperto a dagiti aramid ti tao ti makagapu iti panagbalbaliw ti klima ken ti ikakaro ti karkarna a paniempo iti intero a lubong.