Siasino Dagiti Tultuladek?

Iti daytoy nga artikulo, maammuam no

APAY a kasapulam dagiti mapagwadan

PAKASARAKAM kadakuada

KASANO a matuladmo ti ulidanda

APAY A KASAPULAM IDA

REALIDAD: Adda tendensiam a mangtulad kadagidiay ap-apresiarem ti kinataoda. Mabalin a pagsayaatam​—wenno pagdaksam dayta​—depende no siasinoda.

Ti kasapulam: Dagiti mapagwadan a maikari a tuladen.​—Filipos 3:17.

Ti problema: Adu ti mangap-apresiar kadagiti nalatak​—iti musika, isports, wenno pelikula​—uray no dakes ti reputasionda.

Panunotem daytoy: Iti Biblia, ti personalidadtayo ket nayarig iti kawes. (Colosas 3:9, 10) No gumatangka iti bado, ipalubosmo kadi a maysa a paralako a di naurnos ti panagkawkawesna ti mangibaga kenka no ania ti rumbeng nga isuotmo? Apay ngarud nga ipalubosmo a ti maysa a nalatak a tao a dakes ti reputasionna ti mangidiktar kenka no ania ti agbalin a personalidadmo? Imbes nga aramidem dayta wenno sumursurotka lattan iti kaaduan, makatulong kenka ti panangpilim kadagiti mapagwadan tapno (1) maammuam dagiti galad a kayatmo a patanoren a makatulong kenka nga (2) agpili a nainsiriban kadagiti agbalin a gagayyemmo ita ken iti masanguanan.

PAKASARAKAM KADAKUADA

Markaam ti sumaganad iti umiso wenno di umiso.

1. Ti mapagwadan ket rumbeng a nakitamon iti personal.

□Umiso □Di umiso

2. Ti mapagwadan ket rumbeng a perpekto.

□Umiso □Di umiso

3. Mabalinmo ti maaddaan iti adu a mapagwadan.

□Umiso □Di umiso

Dagiti sungbat

1. Di umiso. Mabalinmo met a pagwadan dagiti nagkauna a tattao. Dagiti kasayaatan kadakuada ket masarakan iti Biblia. Kas pagarigan, no basaem ti Hebreo kapitulo 11, innaganan ni apostol Pablo ti 16 a lallaki ken babbai a mapagwadan ti pammatida. Kangrunaan iti amin, iti sumaganad a kapitulo, pinaregta ni Pablo dagiti Kristiano a ‘kumita a sipapasnek’ ken Jesus ken tuladenda isuna. (Hebreo 12:2) Ni Jesus ti kasayaatan nga ulidantayo.​—Juan 13:15.a

2. Di umiso. Malaksid ken Jesus, awan ti perpekto a kaputotan ni Adan. (Roma 3:23) Uray ti natured a propeta a ni Elias ket “padatayo a tao.” (Santiago 5:17, Ti Baro a Naimbag a Damag Biblia) Kasta met laeng da Miriam, David, Jonas, Marta, ken Pedro. Ibatad ti Biblia dagiti nagkamalianda. Ngem mapagwadanda latta iti kaaduan a banag isu a nasayaatda nga ulidan.

3. Umiso. Mabalinmo ti maaddaan iti adu a pagwadan. Nalabit nagaget ti maysa, idinto ta naanus met ti sabali. Ti maysa pay ket mabalin a kanayon a positibo uray adda dagiti problema. (1 Corinto 12:28; Efeso 4:11, 12) Kitaem dagiti nasayaat a galad ti sabsabali. Iti kasta, makasarakka kadagiti kualidad a nasayaat a tuladen.​—Filipos 2:3.

KASANO A MATULADMO TI ULIDANDA

1. Paliiwem dagiti tultuladem. Kinuna ni apostol Pablo kadagiti Kristiano idi umuna a siglo: “Matmatanyo dagidiay magmagna iti wagas a maitunos iti ulidan nga impaaymi kadakayo.”​—Filipos 3:17.

2. Makilangenka. No posible, makikaduaka kadagiti napilim a mapagwadan. Kuna ti Biblia: “Daydiay makipagna kadagiti masirib a tattao agbalinto a masirib.”​—Proverbio 13:20.

3. Panunotem dagiti makaay-ayo a galad ti ibilangmo a mapagwadan. Kuna ti Hebreo 13:7: “Bayat nga ut-utobenyo ti pagbanagan ti kababalinda tuladenyo ti pammatida.”

Nakasaganaka kadin? Suratam dagiti blanko iti baba.

Dagiti Aramidem

Mangpilika iti galad a kayatmo a patanoren. (Kayatmo kadi ti agbalin nga ad-adda a mannakigayyem? naparabur? nagaget? natibker? mapagpannurayan? mapagtalkan?)

․․․․․

Mangpilika iti tao nga addaan iti galad a kayatmo a patanoren.b

․․․․․

No agpilika iti pagwadam, ti kalatmo ket saan nga agbalin nga eksakto a kas iti dayta a tao. Adda met dagiti bukodmo a nasayaat a kababalin. Ngem dagiti mapagwadan ti makatulong kenka tapno agbalinka a nasaysayaat a tao bayat nga agmatmataenganka. Malaksid iti dayta, no tuladem ida, agbalinkanto met a mapagulidanan iti sabsabali.

Ad-adu pay nga artikulo iti serye a “Young People Ask” ti masarakan iti Web site a www.watchtower.org/ype

[Footnotes]

[Blurb iti panid 21]

Apay nga ipalubosmo a ti maysa a nalatak a tao a dakes ti reputasionna ti mangidiktar kenka no ania ti agbalin a personalidadmo?

[Kahon/Dagiti Ladawan iti panid 22, 23]

TI KUNA DAGITI KAPATADAM

Layla​—Positibo ti gayyemko a ni Sandra. Kabesadona met ti Biblia isu a kanayon a kasla ammona ti solusion dagiti problema. Maibagak kenkuana ti amin a problemak, dakkel man wenno bassit dayta.

Terrence​—Ti gagayyemko a da Kyle ken David dida pulos tagibassiten ti rikna ti dadduma. Uray no adda problemada, kanayon a sisasaganada a tumulong iti sabsabali. Nagsayaatda nga ulidan kaniak.

Emmaline​—Ni nanangko ti kayatko a tuladen. Nagadu ti ammona maipapan iti Biblia ken kanayon nga ipamuspusanna nga iranud ti pammatina. Ibilangna ti ministeriona kas maysa a pribilehio, saan a narigat a trabaho. Bilibak ken ni Nanang gapu iti dayta!

[Kahon iti panid 23]

AGBASAKA ITI AD-ADU MAIPAPAN ITI DAYTA!

Kasapulam kadi ti tulong iti panagbirokmo kadagiti nasayaat nga ulidan? Basaem ti Hebreo kapitulo 11 ken mangpilika iti maysa kadagiti tattao a nadakamat sadiay. Rugiam ti maysa a proyekto iti panagadal a ti kalatmo ket tuladem dagiti makaay-ayo a galad ti napilim.

Ad-adu pay a mapagwadan a tattao iti Biblia ti masarakam kadagiti Tomo 1 ken 2 ti Dagiti Saludsod nga Iyimtuod ti Agtutubo​—Dagiti Sungbat nga Epektibo, nga impablaak dagiti Saksi ni Jehova. Kitaem ti “Indise ti Nasayaat nga Ulidan” iti likud dagita a libro.

[Kahon iti panid 23]

DAMAGEM KADAGITI NAGANNAKMO

Damagem kadagiti nagannakmo no siasino dagiti pagwadanda​—idi agtutuboda a kas kenka ken iti agdama. Kasano a nagunggonaanda iti kaadda dagiti tattao a tultuladenda?