Maipapan iti Salun-at

Lubong

Kuna ti World Health Organization a mangrugi inton 2035, tinawenton a 24 a milion a tattao ti madayagnos nga addaan iti kanser. Nangatngato dayta iti agarup 70% no idilig iti maipagarup a bilang dagiti nadayagnos ita a nasurok a 14 a milion. Natantiar a 50% kadagita ket maigapunto iti estilo ti panagbiagda a kas iti nalabes a panaginum, di panagehersisio, sobra a kinalukmeg, pannakaisarang iti radiasion, ken panagsigarilio.

Britain

Kalpasan a naipakita dagiti ebidensia, inimbestigaran ti gobierno ti Britain ti posibilidad a ti mad cow disease iti tao ket mabalin a maiwaras babaen kadagiti proseso a kas iti panangyalison iti dara. “Madanagankami unay idi naammuanmi dagiti ebidensia a dakkel pay la a risgo iti salun-at dagiti umili dayta a di maagasan a sakit,” kuna ni Andrew Miller a miembro ti Parliamento. Innayonna: “Naibaga kadakami [a mabalin a maiwaras daytoy nga impeksion] babaen iti nasaknap a pannakakontaminar ti suplay ti dara ken dagiti mai-transplant a paset ti bagi.”

Norway

Gapu iti depression, mabalin a ngumato agingga iti 40% ti posibilidad nga agsakit ti puso kas ipakita ti 11 a tawen a panangadal iti kabibiag ti dandani 63,000 a taga-Norway. Inadaw ti European Society of Cardiology ti kinuna ti maysa kadagiti autor dayta a panagadal a ti depression saanna la a riingen ken paaduen dagiti stress hormone a mabalin nga agresulta iti sakit ti puso, no di ket lapdanna pay ti abilidad ti tao a mangsurot kadagiti balakad a mangpasayaat iti salun-atna

United States

Ad-adalen dagiti sientista ti posible a peggad iti salun-at ti maaw-awagan a thirdhand cigarette smoke​—⁠a buklen dagiti subs­tansia a tedda iti panagsigarilio a mailaok iti tapok ken dumket wenno umagsep kadagiti paset iti uneg dagiti apartment, kuarto iti hotel, ken lugan. Ad-adda a makasabidong dagiti maur-urnong a kasta no bumaybayag.