Kapitulo 10

Maysa a Pagarian a “Dinto Maduprak”

1, 2. (a) Ania a kinapudno ti inaldaw a maipagpaganetget babaen kadagiti paspasamak ti lubong, ken kasano? (b) Ania ti kakaisuna a solusion?

DAGITI paspasamak ti lubong ti kada aldaw ipagpaganetgetna laeng ti kinapudno a di nasarakan ti tao ti ragsak babaen ti panangilaksidna ti kinasoberano ni Jehova ket, imbes ketdi, pinadpadasda ti panangituray ti bagbagida. Awan sistema ti natauan a gobierno ti nakaiyeg kadagiti gunggona nga awan panangidumdumana iti sangatauan. Nupay naparnuay ti tao ti sientipiko a pannakaammoda iti di maartapan a rukodna, saanda pulos a naparmek ti basol, ti sakit ken saanda a napagpatingga ti ipapatay, uray maysa laeng koma kadagiti iturayanda. Iti kasumbabangirna, agtultuloy ketdi dagiti nasnasion a mangpatpataud kadagiti baro ken nakabutbuteng pay nga ig-igam. Rumangrang-ay ti naranggas a krimen. Ti teknolohia, agum ken kinakuneng ti sangsangkamaysa a mangrugrugit iti daga, danum ken ti angin. Ti agpangpangato nga implasion ken kinaawan-panggedan ti nangparigat unay kadagiti adu a makagun-od kadagiti kasapulanda ti panagbiag. Kasapulan unay dagiti tattao ti pakaruaranda.​—Ecl. 8:9.

² Ania ti sungbat? Ti Pagarian ti Dios, nga isut’ insuro ni Jesus a kararagen dagiti paspasurotna. (Mat. 6:9, 10) Anian ti panagyamantayo a ti iyegna a pakabang-aran ti nakaas-asidegen!

3. (a) Maipapan iti daytoy a Pagarian, aniat’ napasamak idiay langit idi 1914 K.P.? (b) Apay a nasken dayta kadatayo?

³ Nanipud 1914 K.P., ti Pagarian ti Dios nga addan iti im-ima ni Jesu-Kristo ti agan-andaren.a Iti dayta a tawen dagiti pasamak a nakita ni Daniel iti sirmata ti padtona ti aktual a napasamaken idiay langit. Ti “Kadaanan dagiti Al-aldaw,” a ni Jehova a Dios, ti nangipataw iti Anak ti tao, a ni Jesu-Kristo, “iti panagturay ken dayag ken maysa a pagarian, nga amin dagiti il-ili, nasnasion ken pagsasao agserbida koma kenkuana.” Iti panangipakaammona iti dayta a sirmata, nagsurat ni Daniel: “Ti panagturayna agnanayon a panagturay a dinto mapalabas, ket ti pagarianna dinto maduprak.” (Dan. 7:13, 14) Babaen iti daytoy a Pagarian nga aramaten ti Dios a pangtagiragsakan dagiti managayat ti kinalinteg ti di mabilbilang a naimbag a bambanag a pinanggepna idi nga inkabilna dagiti immuna a tattao a nagannak kadatayo idiay Paraiso.

4. Ania dagiti detalye maipapan ti Pagarian ti makapainteres unay kadatayo, ken apay?

⁴ Dagiti nasungdo nga iturayan ti Pagarian ti interesadoda unay iti sangal ken panagandar daytoy a gobierno. Kayatda a maammuan no aniat’ ar-aramidenna itan, no aniat’ maaramidanna iti masanguanan ken no aniat’ kalikagumanna kadakuada. Suksukimatenda a siinget dayta, ket bayat nga ar-aramidenda dayta, ti panangapresiarda iti dayta ti dumakdakkel ken isagsaganada ti bagbagida a mangibaga iti dayta kadagiti dadduma.​—Sal. 48:12, 13.

Ti Makatignay-puso a Panangsukimat

5. (a) Kasanot’ panangipakita ti Kasuratan no makin-soberano ti naiyebkas babaen ti Mesianiko a Pagarian? (b) Gapuna kasanotayo a maapektaran iti intay maad-adal maipapan ti Pagarian?

⁵ Maysa kadagiti umuna a bambanag nga ipanayag ti kasta a panagsukimat a ta daytoy a Mesianiko a Pagarian ket ebkas ti mismo a kinasoberano ni Jehova. Isu ti nangted ti “panagturay ken dayag ken maysa a pagarian” iti Anakna. Gapuna, kalpasan ti panangrugi ti Pagarian nga agturay, maiyanatup ti panangiwaragawag dagiti timtimek idiay langit: “Ti pagarian ti lubong nagbalin a kukua ni Apotayo [ni Jehova a Dios] ken ni Kristona, ket isu [ni Jehova] agarinto nga awan inggana.” (Apoc. 11:15) Gapuna amin a mapaliiwtayo maipapan iti daytoy a Pagarian ken no aniat’ aramidenna ti mangiyasideg unay kadatayo ken ni Jehova a mismo. Ipasagepsep dayta kadatayo ti tarigagay nga agpasakop nga agnanayon iti kinasoberanona.

6. Apay a nangruna a makapainteres kadatayo a ni Jesu-Kristo ti pannakabagi nga agturay ni Jehova?

⁶ Anian a nagsayaat nga inkabil ni Jehova ni Jesu-Kristo iti trono kas ti agturay a pannakabagina! Kas ti Mamangulo nga Agobra nga inusar ti Dios a nangaramid ti daga ken tao, am-ammo a nasaysayaat ni Jesus dagiti kasapulantayo ngem ti ammo ti uray asinoman kadatayo. Mainayon pay, impakitanan manipud pay idi punganay ti natauan a historia ‘a pagrag-oanna ti pannakiadda kadagiti annak dagiti tao.’ (Prov. 8:30, 31; Col. 1:15-17) Nagdakkel unay dayta nga ayat nga isut’ personal nga immay ditoy daga ken impaayna ti biagna kas subbot para kadakuada. Gapuna intedna kadatayo ti pamay-an a pakawayawayaan manipud basol ken ipapatay, ken ti gundaway ti biag nga awan inggana.​—Mat. 20:28.

7. (a) Maigiddiat iti panagturay ti aniaman a tao, apay nga agpaut daytoy a gobierno? (b) Aniat’ pannakirelasion ti “matalek ken naannad nga adipen” iti dayta nailangitan a gobierno?

⁷ Maysa daytoy a natibker, manayon a gobierno. Dagiti manayon a kualidadna ti impasiguro ti kinapudno a ni Jehova mismo ket saan met a matay. (Hab. 1:12; Sal. 146:3-5, 10) Maigiddiat kadagiti natauan nga ar-ari, ni Jesu-Kristo, daydiay nangitalkan ti Dios ti kinaari, ti saan met a matay. (Roma 6:9; 1 Tim. 6:15, 16) Maikuyogto ken Kristo kadagiti nailangitan a trono isunto dagiti 144,000 a sabsabali pay, a nasungdo nga ad-adipen ti Dios a naggapu “iti amin a tribo ken pagsasao ken il-ili ken nasion.” Uray met dagitoy, ti naikkanda ti imortal a biag. (Apoc. 5:9, 10; 1 Cor. 15:42-44, 53) Ti kadakkelan a bilangdan ti addan idiay langit, ket ti natda pay kadakuada ditoy daga ti mangbukbukel ti klase “matalek ken naannad nga adipen,” a sisusungdo a mangiyad-adelantar kadagiti intereses dayta a Pagarian ditoy.​—Mat. 24:​45-47.

8, 9. (a) Ania ti mamagsisina, makarugit nga impluensia ti ikkaten ti Pagarian? (b) Gapuna, tapno ditay agbalin a kabkabusor ti Pagarian ti Dios, ania dagiti organisasion ken ar-aramid ti ditay koma pakaisinggalutan?

⁸ Iti saanen a mabayag, iti panawen nga inkeddeng ni Jehova, dagiti buybuyotna ti agtignaydanto a mangdalus iti daga. Dadaelendanto nga agnanayonen dagidiay tattao a gaput’ panangpilida saanda nga am-ammo ti Dios, saanda a binigbig ti kinasoberanona, ken linaisda dagiti naayat a sagana nga inaramidna babaen ken Jesu-Kristo. (2 Tes. 1:6-9) Isunto daytoy ti aldaw ni Jehova, ti nabayag nga inur-urayen a panawen a pannakaalangonna kas Sapasap a Soberano.

⁹ Amin nga ulbod a relihion, ken kasta met amin a natauan a gobierno ken dagiti buybuyotda, nga inturturayan ti di makitkita a dakes nga agturay daytoy a lubong, ti maikisapto met ti agnanayonen. Amin dagidiay ipabigbigda ti bagbagida kas pasetda iti daytoy a lubong gaput’ panangsursurotda kadagiti inaagum, sinisuitik, narugit a wagas ti panagbiag ti magessatdanto met ken patay. Maikkatton ni Satanas ken dagiti demoniona ti pannakilangenlangenda kadagiti agtaeng iti daga, a maipupokdanto iti sangaribo a tawen. Anian a pakabang-aran ti ipaayto daytoy kadagiti amin a managayat ti kinalinteg!​—Apoc. 18:21, 24; 19:11-16, 19-21; 20:1, 2.

Dagiti Kalatna​—Kasano a Maragpat

10. (a) Kasano nga itungpal ti Mesianiko a Pagarian ti panggep ni Jehova a maipaay iti daga mismo? (b) Anianto ti kaipapanan daytoy kadagiti tattao nga agnanaedto iti daga?

¹⁰ Itungpalton a naan-anay daytoy Mesianiko a Pagarian ti orihinal a panggep ti Dios iti daytoy a daga. (Gen. 2:8, 9, 15; 1:28) Agingga itoy nga aldaw, saan pay a naitungpal ti tao dayta a panggep. Nupay kasta, “ti mapagtaengan a daga nga umayto” ti maipasakopton iti Anak ti tao, ni Jesu-Kristo. Amin dagidiay makalasat ti pannakaibanag ti panangdusa ni Jehova iti daytoy daan a sistema ti makipagtrabahonto a sangsangkamaysa iti sidong ni Kristo kas Ari, a maragsakanda a mangaramid ti aniaman nga ibilinnanto tapno ti daga agbalinto a sangalubongan a Paraiso. (Heb. 2:5-9) Tagiragsakento ti sangatauan ti aramid dagiti im-imada ken magunggonaandanto a naan-anay iti aglaplapusanan a bunga ti daga.​—Sal. 72:1, 7, 8, 16-19; idiligyo iti Isaias 65:21, 22.

11. (a) Kasano a ti kinaperpekto ti isip ken bagi maiyegto nga agpaay kadagiti iturayan ti Pagarian? (b) Anianto ti iraman daytoy?

¹¹ Idi naparsua da Adan ken Eva perpektoda, ket panggep idi ti Dios a mapunno ti daga kadagiti putputotda, nga amin tagiragsakenda ti kinaperpekto ti isip ken bagida. Iti sidong ti panagturay ti Pagarian, dayta a panggep ti dumtengton iti nadayag a kaitungpalanna. Sapulen daytoy ti panangikkat iti amin nga epekto ti basol, ket gapu iti dayta agserbinto ni Kristo saanto laeng kas Ari no di ket kas Nangato a Padi met. Tulongannanto a siaanus dagiti natulnog nga iturayanna a magunggonaan manipud iti pateg ti makaabbong-basol ti mismo natauan a biag nga indatonna. Maluktanton dagiti matmata a bulsek. Makangngegton dagiti lapayag a tuleng. Ti lasag a dinadael ti kinalakay wenno ti sakit ti nasalsalibukagto pay ngem ti lasag ti maysa nga ubing. Dagiti napaut a kinakapuy ti mangiwayanton iti kinasalun-at. Umayton ti aldaw nga awanton ti pangikunaanda ti, “Masakitak,” ta mawayawayaanton dagiti tattao a managbuteng iti Dios manipud amin a panangpadagsen ti basol ken kadagiti nakasasaem nga epektona.​—Idiligyo iti Isaias 33:22, 24; 35:5, 6; Job 33:25; Luc. 13:11-13.

12. (a) Ania pay ti kasapulan ti natauan a kinaperpekto? (b) Kasanonto ti pannakaragpat dayta, ket anianto ti ibunga dayta?

¹² Ti pannakaragpat ti kinaperpekto, nupay kasta, ti ramanenna ti ad-adda pay ngem basta addaan ti nasalun-at a bagi ken nasalun-at nga isip. Ramanen dayta ti umiso a panangisarming kadagiti kualidad ti personalidad ni Jehova, ta naaramid ti tao ‘iti ladawan ti Dios, iti kaaspingna.’ (Gen. 1:26) Gapu iti dayta, adu nga edukasion ti kasapulan. Daytoy ti maysa a Baro Urnos a sadiay “pagtaenganto ti kinalinteg,” gapuna, kas impadto ni mammadto nga Isaias, “ti kinalinteg ti sursuruento dagiti agtaeng iti nabunga a daga.” (2 Ped. 3:13; Isa. 26:9) Daytoy a kualidad ti mangiturongto iti kappia​—kadagiti tattao iti amin a nasnasion, kadagiti nasinged nga agkakadua, iti pamilia ti maysa ken, kangrunaanna, iti Dios mismo. (Isa. 32:17; Sal. 85:10-13) Dagidiay nakaadalen ti kinalinteg ti sirarang-ay a masursuruanto met kadagiti pagayatan ti Dios kadakuada. Inton ti panagayat kadagiti dalan ni Jehova ti agramuten iti puspusoda, surotendanto dagitoy iti amin a paset ti panagbiagda. Nabalinan a kinuna ni perpekto a Jesus kas tao, ‘siak agnanayon nga aramidek dagiti makaay-ayo ken Amak.’ (Juan 8:29) Anian a makaparagsakto ti biag inton kastanto aminen ti sangatauan!

Makitkitan Dagiti Nagapuanan

13. Usarenyo dagiti salsaludsod iti ngato a mangitampok kadagiti gapuanan ti Pagarian ken no ania ti rebbeng met nga ar-aramidentayo.

¹³ Dagiti nakaskasdaaw a gapuanan ti Pagarian ti nabatad a makitkitan kadagiti tattao nga addaan mata ti pammati. Dagiti sumaganad a salsaludsod ken sitasion ti Kasuratan ti mangipalagip ti sumagmamano kadagitoy, agraman dagiti bambanag a maaramidan ken rebbeng nga ar-aramiden itattan amin dagiti iturayan ti Pagarian:

Maibusor iti siasino ti umuna a pagtignayan ti Ari, ket anianto ti ibungana? (Apoc. 12:7-10, 12)

Ti panangurnong kadagiti maudi a miembro ti ania a grupo ti naikkan ti insigida nga atension kalpasan ti pannakaitrono ni Kristo? (Mat. 24:31; Apoc. 7:1-4)

Idiay Mateo 25:31-33, ania pay ti sabali a trabaho nga impadto ni Jesus nga aramidenna kalpasan ti panangalana ti tronona ken sakbay ti panangdadaelna iti managdakdakes?

Kasanot’ pannakaibanag daytoy a trabaho? Asinoda dagiti makiramraman iti dayta? (Mat. 24:14; Sal. 110:3; Apoc. 14:6, 7)

Apay a di napasardeng dayta dagiti napolitikaan ken narelihiusuan a bumusbusor? (Ara. 5:38, 39; Zac. 4:6)

Kas resulta ti edukasional a trabaho a maar-aramiden, ania a panagbalbaliw ti mapaspasamaken iti biag dagiti tattao nga agpaspasakopen iti panagturay ti Pagarian? (Isa. 2:4; 1 Cor. 6:9-11)

Ti Manayon a Kualidad ti Pagarian

14. (a) Kasano kabayagto ti panagturay ni Kristo? (b) Anianto ti magapuanan iti dayta a tiempo?

¹⁴ Kalpasan ti pannakaigarangugong ni Satanas ken dagiti demoniona, ni Jesu-Kristo a kaduana dagiti 144,000 a makipagtawid kenkuana ti agturaydanton iti sangaribo a tawen. (Apoc. 20:6) Kabayatan dayta a panawen maiyegton ti sangatauan iti kinaperpekto. Amin a gobierno ken kinaturay ken pannakabalin a maibusor ken Jehova ti maikkatdanton. Inton malpasto daytan, iyawatto metten ni Jesus ti Pagarian nga isubli ken Amana, “tapno ti Dios isu koma amin kadagiti isuamin.”​—1 Cor. 15:24, 28.

15. Kasanot’ kinapudno a daytoy a Pagarian ‘kaanoman dinto maduprak’?

¹⁵ Ti posision ni Jesus a maitunos iti daga ngarud ti agbalbaliwto metten. Nupay kasta, ti panagturayna “agnanayon a panagturay” ket ti Pagarianna “dinto maduprak.” (Dan. 7:14) Iti ania a pamay-an? Iti pamay-an a ti panagturayna dinto maiyawat iti im-ima ti sabali nga addaan naiduma a panggepna. Dagiti gapuanan ti Pagarian ti ‘nikaanoman dinto madadael.’ No ania ti aramiden ti Pagarian a pangalangon ti nagan ken panggep ni Jehova maipapan iti daytoy a daga ti agtakderto iti agnanayon.

[Dagiti Footnote]

Repaso a Pagsasaritaan

● Apay a ti Pagarian ti Dios ti kakaisuna a solusion kadagiti parparikut ti sangatauan? Kaano ti panangrugina nga agturay?

● Aniat’ ad-adda a makaallukoy kadakayo maipapan ti Pagarian ti Dios ket no anianto ti magapuananna? Apay?

● Ania dagiti gapuanan ti Pagarian ti makitkitatayon? Aniat’ pasettayo kadagitoy?

[Ladawan iti panid 84, 85]

Kinalinteg ti maadalto dagiti tattao