Kapitulo 22—Sangalubongan a Kinatalged iti Sidong ti “Prinsipe ti Kappia”
Ti Dios iti “Prinsipe ti Kappia” Agbalinen nga “Amin iti Isuamin”
1. Iti ania ti nangtedan ni Jesu-Kristo ti ulidan nga agpaay kadagiti amin a dadduma a parparsua idiay langit ken ditoy daga?
DIN agbayag kalpasan ti panagungarna, kuna ti “Prinsipe ti Kappia” iti maysa kadagiti adalanna: “Umuliak ken Amak ken Amayo ken iti Diosko ken Diosyo.” (Juan 20:17) Babaen kadagidiay a sasao binigbigna a ti nailangitan nga Amana ket isu met ti Diosna, Daydiay kakaisuna a pagdaydayawanna. Iti kasta a panagdayaw isu ti nangipakita ti ulidan para kadagiti amin a dadduma a parparsua iti intero a langit ken daga.
2, 3. (a) Kasanot’ panangiladawan ti 1 Corinto 15:24-26, 28 ti naisangsangayan nga aramid ni Jesus a panagpasakop ken Amana? (b) Anianto ti engrande a bungana?
2 Anian a nagdakkelan nga ulidan ti pagbalinanto ti “Prinsipe ti Kappia” kadagiti isuamin a naperpekto a sangatauan inton sisusungdo a paiturayanna ti bagina iti naisangsangayan a pamay-an iti Daydiay kasasayaatan a Soberano iti intero nga uniberso! Daytoyto ti di maartapan a maipanayag iti panagpatingga iti Sangaribo a Tawen a Panagturayna iti sangatauan, inton naisublinanton ti talna, kinatalged, ken panagtutunos iti intero a daga. Iti di agbiddut a padto, naipasiguro daytoy kadatayo:
3 “Kalpasanna, umay ti panungpalan, inton iyawatna ti pagarian iti Dios ken Ama, inton naikkatna aminen a panagturay ken amin a panguluen ken pannakabalin. Ta isu masapul nga agari agingga iti panangikabilna kadagiti kabkabusorna iti babaen dagiti saksakana. Ti maudi a kabusor a mapukawto, isu ni patay. Ket inton dagiti isuamin a banag paiturayandan kenkuana, no kasta, uray ti Anak met laeng paiturayanton iti Daydiay nangikabil iti babaen ti panagturayna kadagiti isuamin a banag, tapno ti Dios isu koma amin dagiti isuamin.” (1 Corinto 15:24-26, 28) Wenno kas ti panangipaulog ti The Amplified Bible iti maudi a paset ti bersikulo 28: “Tapno ti Dios isu koma ti amin iti isuamin—kayatna a sawen, isut’ isuamin iti tunggal maysa, katan-okan, ti pagtaengan ken mangtengtengngel iti biag.”
4. (a) Kasanonto ti panangabrasa dagiti agtataeng iti daga iti ulidan ti manangtagibi nga Amada? (b) Anianto a baro a paset ti panagpasakop ti addanto iti dayta?
4 Inton ti “Prinsipe ti Kappia” iyawatnan ti Pagarian iti Diosna inton panungpalan ti Sangaribo a Tawen a Panagturay, maipakaammonto daytoy nga aramid ti manangtagibina nga Amada kadagiti agnaed ditoy daga. Kenkuana kas ti Naarian nga Ulidanda, ipasakopdanto met dagiti bagbagida iti baro a pamay-an iti Kangatuan a Dios. Iti damdamona mangipaayda itan ti naayat a panagpasakop a direkta ken ni Jehova, wen, panagdayaw, iti amin a kinapasnek ken kinapudno, a dida kasapulanen ti serbisio ti kinapadi ni Jesus, urayto pay iti panagkararag.
5. Anianto ti kababalin dagiti 144,000 a kadua nga ar-ari ni Jesu-Kristo
5 Iti daytoy a pamay-an ti Kangatuan a Dios agbalinto manen nga Ari iti intero nga uniberso nga awanen ti naarian a pannakabagi nga agpaay kenkuana idiay langit wenno ditoy daga. Ket sumarsaruno a dagiti 144,000 a kakadua nga ar-ari a sinubbot ni Jesu-Kristo manipud ditoy daga agparintumengdanto metten iti sanguanan ti kangatuan a Naarian nga Agturay ket iti daytoy a nainayon a kaiyuloganna bigbigendanto kas ti Sapasap a Soberano.
Ti Maudi a Suot iti Sangatauan
6. (a) Anianto ti mapasamak kadagiti nasukir a tattao bayat ti Milenio a Panagturay ni Jesus? (b) Anianto ti kasasaad dagidiay iyawat ni Jesus iti nailangitan nga Amana?
6 Ti panangbigbig ken ni Jehova kas ti Kangatuan nga Ukom, tarigagayan ni Jesu-Kristo nga amin dagiti nasesita a nasantuan nga anamong ti maiyebkas kadagiti ar-aramid a nagapuanan ni Jesus bayat ti Milenio a Panagturayna. Kabayatan dayta a panagturay, dagidiay tattao a madi a makikumporme kadagiti pagalagadan ti kinalinteg ken sumukir iti Ari madadaeldanto. Iti kasta, dagidiayto nga iyawat ni Jesu-Kristo ken ni Jehova a Dios, ti maudi nga Ukom, isudanto dagidiay natulnog a nakaragpaten ti natauan a kinaperpekto.
7. (a) Anianto ti maikabil iti makasukisok a pannakasuot kalpasan ti panangisubli ni Jesus iti Pagarian? (b) Kasanonto a maikabil iti pannakasuot ti naperpekto a sangatauan?
7 Iti dayta a punto tiemponton a maipaay iti naandor a kababalin iti natauan a debosion maipapan iti Sapasap a Soberano, ni Jehova a Dios, ti maikabilen iti pannakasuot. Kas ken ni Job, ti saludsod ket: Ay-ayatenda aya ken agdaydayawda aya iti Dios gapu laeng kadagiti naimbag a bambanag a naaramidanna kadakuada, wenno isu ti ayatenda gapu iti kinaisuna met laeng—ti Nainkalintegan a Soberano ti Uniberso? (Job 1:8-11) Ngem kasano a ti naperpekto a sangatauan maikabilto iti pannakasuot iti kinasungdo ti pusona? Sumungbat ti Biblia: Ni Satanas a Diablo ken dagiti demoniona maluk-atandanto “iti apagbiit” manipud iti mangliwengliweng nga abut a nakaibaludanda iti sangaribo a tawen. (Apocalipsis 20:3) Babaen ti panangipalubos iti Diablo a mangsuot iti naisublin a sangatauan, dagiti miembro ti naperpekton a sangatauan ti mapaneknekanton ti indibidual a kinatarnawda iti Dios a naan-anay.—Idiligyo ti Job 1:12.
8. (a) Kalpasan ti pannakaibulosda manipud iti abut a mangliwengliweng, anianto ti pagreggetan nga aramiden ni Satanas ken dagiti demoniona? (b) Dagidiay mangipalubos iti bagbagida nga iyaw-awan ti Diablo ken dagiti demoniona ti mangal-alanto iti ania a kurso ti panagtignay?
8 Ti napalabas a pito a ribo a tawtawen, nabalinan ni Satanas a Diablo nga inallukoy ti perpekto nga Adan ken ni Eva nga agbasol babaen ti panangalada iti iniimut a kurso ti panagtignay. No anianto dagiti pamay-an a panangsulisog nga ipalubosto ni Jehova ken ni Satanas ken dagiti demoniona kalpasan ti pannakaibulosda manipud iti mangliwengliweng nga abut saan nga ibaga ti Kasuratan. Ngem awan duadua nga addanto manen ti panagapelar iti kinaagum ken iti tarigagay iti panagwaywayas manipud iti Dios. Kaskasdi kas maysa a managalsa a mismo a maibusor iti kinasoberano ni Jehova, desidido ti Diablo a mamagbalin iti sangatauan nga umalsa met. No ania ti eksakto a rukod ti panagballigi dagitoy naibulos a nademoniuan a puersa ket saan a naibaga, ngem addanto nawadwad a natauan nga umaalsa a mangted ti impresion ti maysa a dakkel a bunggoy. Ti basol iti biang ti aniaman a natauan a parsua, nga itan ket naperpektodan, ti siiintelihentento a maaramid ket, gapu itoy, daytanto ti ingagara, sipapakinakem. Ipamatmatto dayta ti ipapanaw manipud panagdayaw iti kakaisuna a pudno ken sibibiag a Dios ken panangala iti dasig ni Satanas a Diablo. (Apocalipsis 20:7, 8) Gapuna, iti kaso dagitoy a tattao a rebelioso, ni Jehova ket saanto nga agbalin nga “amin kadagiti isuamin.”
9. (a) Anianto ti mapasamak kadagidiay di mangsalimetmet iti kinatarnawda ken ni Jehova a Dios? (b) Kasanonto a mapaksiat ti di makita a paset dagiti isuamin a rebelde? (c) Ania nga engrande a kasasaad ti agramaramton iti intero a langit ken daga?
9 Nupay kasta, dagidiay nasungdo, didanto sumuko kadagiti argumento ken panangpilpilit dagiti naiyaw-awan, nasionalistiko a tattao. Awan duadua, dagiti nasungdo piliendanto a pagbalinen ni Jehova nga “amin kadagiti isuamin” iti kasoda. Agpaay iti kinahustisia a mismo, masapul a ti kinasoberano ni Jehova ti istrikto a maipaalagad. Kalpasanna, amin dagiti sataniko a naimpluensiaan a rebelde ditoy daga matalipuposdanto nga agnanayonen. Gunggonada! Ti di makita a paset ti sangaparsuaan madalusanto metten kadagiti amin a rebelde. Gapuna, tapno maiyeg a naan-anay ti sapasap a panagdalus, ni Satanas a Diablo ken dagiti demonio a buybuyotna matalipuposdanto, mapukawdanto a naan-anay. Gapuna dagiti langlangit ken ti daga madalusandanton iti isuamin a mantsa ti basol. (Apocalipsis 20:9, 10) Ti kinasanto ni Jehova ti agsaknapton iti uray sadino. (Idiligyo iti Zacarias 14:20.) Ti sagrado a nagan ti Kangatuan a Persona masantipikarton idiay langit ken ditoy daga. Amin nga agbibiag idiay langit ken ditoy daga ti siraragsakton a mangaramid ti katan-okan a pagayatanna.
10. Iti ania a pamay-an a ti daga addanto iti nakaisalsaluminaan iti agnanayon a dinto tagiragsaken dagiti dadduma a planeta?
10 Iti kinaagnanayon ti dagatayo addaanton ti pakailasinan a dinto tagiragsaken dagiti dadduma a planeta iti intero a law-ang iti awan inggana, nupay no ti daga ket mabalin a saanto nga isu ti kakaisuna a planeta a mapagtaengan. Naisalsalumina, daytanto ti di masuppiat a pakaalangonan ti sapasap a kinasoberano ni Jehova, a mangipasdek iti agnanayon ken sapasap a legal a pagwadan. Daytanto ti kakaisuna a planeta a nakidangadangan ni Jehova dagiti buybuyot “ti gubat ti dakkel nga aldaw ti Dios a Mannakabalin-amin.” Daytanto ti kakaisuna a planeta a nangibaonan ti Dios iti ingungotenna nga Anak nga agbalin a tao ket matay tapno maalaw dagiti agtataeng iti planeta manipud basol ken ipapatay. Daytanto ti kakaisuna a planeta a nangalaanto ni Jehova iti 144,000 kadagiti agnanaed kenkuana tapno agbalin nga “agtawid iti Dios, ken makipagtawid ken Kristo.”—Roma 8:17.
Dagiti Serafines, Kerubines, Angheles
11, 12. (a) Ania a kita dagiti espiritu a parparsua ti nakita ni Isaias iti maysa a parmata? (b) Dagitoy ti addaan ania a paginteresan kadatayo a tattao?
11 Ti Dios, ti nadayag a Gubuayan ti amin a parsua, a nailangitan ken naindagaan, agbalinton a “amin” saanto laeng a kadagiti 144,000 a makipagtawid ken Kristo no di ket kasta pay met kadagiti dadduma iti nailangitan a paset. Idiay kapitulo 6 iti libro ni Isaias, naikkantayo ti sirmata iti nailangitan a pangukoman. Sadiay mabasatayo: “Nakitak ni Jehova a situtugaw iti maysa a trono, a nangato ken natan-ok, ket ti gayadan ti kawesna pinunnona ti templo. Iti ngatona nagtakder dagiti serafin. Ti tunggal maysa adda innem a payakna. Dagiti dua pangabbongna iti rupana, ket dagiti dua pangabbongna kadagiti sakana, ket dagiti dua pagtayabna. Ket nagiikkisda iti maysa ken maysa a kinunada: ‘Santo, santo, santo ni Jehova dagiti buybuyot. Ti isuamin a daga napno iti dayagna.’”—Isaias 6:1-3.
12 Anian a naparaburan unay ni Isaias a makakita iti Daydiay kasasantuan iti intero nga uniberso a situtugaw iti nailangitan a tronona a pagserserbian dagiti nadayag a serafin! Anian a nakaskasdaaw a sirmata dayta, a nangipanayag iti naparaburan unay a posision nga inokuparan dagidiay a serafin, ta isu Daydiay Nasantuan Amin a ti kinasagradona binigbigda bayat a pinaneknekanda ti kinasantona babaen ti panangipaganetget iti dayta iti namitlo a daras! Interesado dagiti serafin iti panangtulong kadagiti managdaydayaw ken Jehova nga agbalin a nasantuan kas ti Dios ket nasantuan.—Isaias 6:5-7.
13. (a) Ania a naiduma a kita dagiti espiritu a parparsua ti ipanayag met ti Biblia kadatayo? (b) Kasano a nailadawan ni Jehova no maidilig kadakuada?
13 No kasano nga adda ti nagduduma a biag dagiti parparsua ditoy daga, a mangpampaneknek ti pannakabalin ni Jehova a Dios, kasta met addada parparsua a nagduduma a kita idiay lugar ti espiritu. Ipanayag ti Biblia a dagitoy isuda dagiti nadayag a kerubin, a mabalin a nakaparpartak ti panagtayabda. (Salmo 18:10; idiligyo iti Hebreo 9:4, 5.) Ipakita ti Genesis 3:24 a kalpasan ti panagbasolda Adan ken ni Eva a maibusor ti nasantuan a Dios ti langit babaen ti pannanganda iti naiparit a bunga, nangikabil ti Namarsua idiay daya ti dalan nga agsubli iti paraiso ti ragsak kadagiti kerubin agraman “ti maysa a sumilsilap a kampilan a simmango iti amin a turong.” Ni Jehova ti masasao kas “agtugaw iti ngatuen dagiti kerubin.” (Salmo 99:1; Isaias 37:16) Gapuna isut’ naipakita nga agturtrono iti ngatuen dagiti kerubin.
14. (a) Ania a dadduma a kita dagiti espiritu a parparsua ti rebbeng a di malipatan? (b) Kasano ti kaaduda?
14 Di met maliplipatan kadagiti umariwekwek a naespirituan a parparsua isu dagiti anghel. Adda adu a milion kadakuada. (Daniel 7:9, 10) Maysa kadakuada isu dagiti anghel a natudingan nga agserbi kadagiti managdaydayaw ken ni Jehova ditoy daga. Namakdaar ni Jesus nga awan koma ti rebbeng a mangitibkol iti asinoman kadagiti managdaydayaw ken ni Jehova gapu ta “dagiti anghelda sadi langit agnanayon a makitada ni Amak nga adda sadi langit.” (Mateo 18:10; Hebreo 1:14) Iti panagpatingga ti 40 nga al-aldaw a panagayunar ni Jesus idiay let-ang ken kalpasan ti naballigi a panangresistirna kadagiti tallo a kangitingitan a pannulisog ti Diablo, anian a pribilehio para kadagiti anghel nga agserbi kadagiti pisikal a kasapulan daydi rimmapis, nabisinan a Jesus!—Mateo 4:11.
15, 16. (a) Iladawanyo ti kasla pamilia a panagkaykaysa nga addanto idiay langit ken ditoy daga. (b) Ania a gunggona ti itedto ni Jehova kadagidiay naperpekto a tattao a makalasat a sibaballigi iti suot? (c) Kasanonto ti panangmatmat ni Jehova iti pannakaragpat iti orihinal a panggepna?
15 Idiay nailangitan a disso, dagiti agtataeng a nadayag nga espiritu ti agkakabsatdanto, idinto a ditoy daga ti naperpekton a natauan a pamilia mapagbalinto nga agkakabsat a lallaki ken babbai. Agbalindanto a ladawan ken kaasping ti Dios iti naindaklan a rukod a naadda idi kada Adan ken Eva, a kalkalpas pay laeng a pinarsua ti manamarsua nga im-ima ni Jehova a Dios, isuda a naparsua iti ‘ladawan ken kaasping’ ti Namarsuada. (Genesis 1:26, 27) Kalpasan ti ilalasatda iti maudi a suot, maitedton iti naperpekto a sangatauan ti kalintegan nga agbiag nga agnanayon ket siaayatdanton a maibilang a kas “ti annak ti Dios,” nga agragragsak iti nadayag a wayawaya, ken agbalindanton a paset ti sangsangkamaysa a pamilia ni Jehova idiay langit ken ditoy daga.—Roma 8:21.
16 Iti ania a ragsak ken panangitan-ok iti intero a biagna ti panangmatmatto ni Jehova a Dios iti pannakaragpatna iti orihinal a panggepna—ti di maartapan nga aramid a pannakaitungpal dagiti amin a bambanag sigun kadagiti immuna a pangngeddengna—nga amin a parparsua addada iti di maisin a naayat a pannakipagkaykaysa kenkuana!
17. Gapu kadagitoy amin, asinonto ti makatngel manipud iti panagaramid ti ania, a maitunos kadagiti sasao ti salmista?
17 Iti lawag amin daytoy, asino ti makabael a mangmedmed iti panangdayaw iti daytoy nakaskasdaaw a nadiosan a Managpanggep? Iti di naalas a panangitan-okna iti sasaona kadagiti nabilbileg ngem tao a parparsua, kuna ti salmista: “Bendituenyo ni Jehova, dakayo nga anghelesna, a mannakabalin iti bileg, a manungtungpal iti saona, a nangtimtimud iti timek ti saona. Bendituenyo ni Jehova, dakayo amin a buybuyotna, dakayo amin a ministrona a nagaramid iti pagayatanna.”—Salmo 103:20, 21.
18. Kasanot’ panangserra ti salmista iti libro dagiti Salmo?
18 Ti maragsakan, napaltiingan a salmista sinerraanna ti libro dagiti Salmo kadagitoy a sasao iti pammagbaga: “Idaydayawyo ni Jah! Idaydayawyo ti Dios iti santuariona. Idaydayawyo iti tangatang ti pannakabalinna. Idaydayawyo gapu kadagiti mannakabalin a gapuananna. Idaydayawyo kas maiyallubog iti mangnibinibi a kinadakkelna. Idaydayawyo iti aweng ti tangguyob. Idaydayawyo a madanggayan iti salterio ken arpa. Idaydayawyo iti pandereta ken sala. Idaydayawyo kadagiti pagtokaran a kuinerdasan ken pito. Idaydayawyo kadagiti piangpiang a naaweng. Idaydayawyo kadagiti piangpiang a nakalangiking. Amin nga adda angesna—idaydayawda koma ni Jah. Idaydayawyo ni Jah, dakayo a tattao!”—Salmo 150:1-6.
19. (a) Iti ania a singgalut ti pagkaykaysaanton ti uniberso? (b) Kas epektona, anianto ti kunaen amin a nasaririt a parparsua?
19 Iti kamaudiananna iti intero a nga uniberso ti makapagkaykaysanto met laengen iti naan-anay a singgalut nga agtalinaedton iti kinaagnanayon, ti singgalut ti maymaysa a panagdayaw iti nailangitan nga Ama gapu ta dagiti annakna ti agayat ken agdayaw kenkuana a nangruna ngem ti isuamin. Wen, iti kasta aminton dagiti nasaririt a parparsua kunaendanto, kaiyariganna, kas kinuna dagiti serafin: “Santo, santo, santo ni Jehova dagiti buybuyot. Ti isuamin a daga napno iti dayagna.” Kalpasanna, pudno unay, ti Dios ti “Prinsipe ti Kappia” agbalinton nga “amin kadagiti isuamin”—iti agnanayon nga awan inggana.